کوئٹہ میں چیئرمین ہائر ایجوکیشن کمیشن ڈاکٹر نیاز احمد اختر نے اپنے دورۂ کوئٹہ کے دوران ایچ ای سی ریجنل سینٹر کی افتتاحی تقریب میں شرکت کی۔ اس موقع پر گورنر بلوچستان شیخ جعفر خان مندوخیل بھی موجود تھے۔ ریجنل سینٹر کا قیام صوبے میں اعلیٰ تعلیم کے فروغ، تعلیمی سہولیات تک بہتر رسائی، اور جامعات، طلبہ و محققین کو مؤثر ادارہ جاتی معاونت فراہم کرنے کی سمت ایک اہم سنگِ میل قرار دیا گیا ہے۔

دورے کے دوران چیئرمین ایچ ای سی نے بلوچستان کی جامعات کے وائس چانسلرز سے بھی ملاقات کی، جس میں صوبے میں اعلیٰ تعلیم کی بہتری، درپیش چیلنجز اور مستقبل کی ترقیاتی حکمتِ عملی پر تفصیلی گفتگو کی گئی۔

بعد ازاں چیئرمین نے بوئٹمزکا دورہ کیا، جہاں یونیورسٹی کی سینئر انتظامیہ کے ساتھ ملاقات میں بلوچستان میں اعلیٰ تعلیمی اداروں کے کردار، مواقع اور مسائل پر تبادلۂ خیال ہوا۔ اس موقع پر تعلیمی ترقی اور ادارہ جاتی بہتری کے لیے مختلف تجاویز پر بھی غور کیا گیا۔

مزید برآں، کوئٹہ میں تعمیر نو ایجوکیشنل سسٹمکے دورے کے دوران چیئرمین نے طلبہ، اساتذہ، ماہرینِ تعلیم اور ادارہ جاتی قیادت سے ملاقات کی۔ انہوں نے ادارے کی معیاری تعلیم کے فروغ میں خدمات کو سراہا اور تعمیر نو یونیورسٹ کے قیام کے وژن کا خیرمقدم کرتے ہوئے کہا کہ ایچ ای سی بلوچستان میں تعلیمی معیار، تحقیق، جدت اور نوجوانوں کی ترقی کے لیے اپنا بھرپور کردار جاری رکھے گا۔

لندن: معروف ماہرِ نفسیات ایڈ رین فرن ھام نے کہا ہے کہ صرف اعلیٰ ذہانت تعلیمی اور پیشہ ورانہ کامیابی کے لیے کافی نہیں ہوتی، بلکہ کامیابی کے حصول میں متعدد شخصی خصوصیات بھی اہم کردار ادا کرتی ہیں۔اپنے حالیہ مضمون میں انہوں نے واضح کیا کہ کامیابی کا اندازہ علمی اعزازات، تحقیقی انعامات اور تعلیمی اداروں میں اعلیٰ عہدوں تک رسائی سے لگایا جا سکتا ہے۔ ان کے مطابق بعض عوامل ذہانت کے مثبت اثرات کو کم کر دیتے ہیں، جبکہ کچھ خصوصیات کامیابی کے امکانات میں اضافہ کرتی ہیں۔

مضمون کے مطابق حد سے زیادہ باریک بینی، وسواسی رویے، جذباتی ذہانت کی کمی اور مختلف قسم کی توجہ بٹانے والی سرگرمیاں کامیابی کی راہ میں رکاوٹ بن سکتی ہیں۔ کا کہنا ہے کہ ایسے افراد اکثر تخلیقی صلاحیتوں اور مؤثر سماجی روابط سے محروم رہ جاتے ہیں، جس سے ان کی پیشہ ورانہ ترقی متاثر ہو سکتی ہے۔دوسری جانب بلند حوصلہ، مقابلے کا جذبہ اور ثابت قدمی کو کامیابی کے اہم محرکات قرار دیا گیا ہے۔ ان کے مطابق وہ افراد جو مشکلات کا ڈٹ کر مقابلہ کرتے ہیں اور اپنے اہداف کے حصول کے لیے مسلسل محنت کرتے ہیں، کامیابی کے زیادہ امکانات رکھتے ہیں۔

ماہرِ نفسیات نے زور دیا کہ تعلیمی اور پیشہ ورانہ میدان میں کامیابی کے لیے صرف پر انحصار کافی نہیں، بلکہ جذباتی ذہانت، سماجی مہارتیں، محنت، توجہ اور مستقل مزاجی بھی ناگزیر ہیں۔……..ایڈ رین فرن ھام

لاہور:وائس چانسلرپروفیسرڈاکٹر محمد علی نے پنجاب یونیورسٹی کالج آف آرٹ اینڈ ڈیزائن شعبہ گرافک ڈیزائن کے زیر اہتمام انڈرگریجویٹ تھیسیزنمائش 2026 ء کا افتتاح کر دیا۔اس موقع پر ڈین فیکلٹی آف آرٹس اینڈ ہیومینیٹزپروفیسر ڈاکٹر محبوب حسین، پرنسپل کالج پروفیسرڈاکٹر ثمینہ نسیم،چیئرمین شعبہ گرافک ڈیزائن پروفیسرڈاکٹر احمد بلال، فیکلٹی ممبران،صنعت سے وابستہ معروف ڈیزائنرز اورطلباؤطالبات نے بڑی تعداد میں شرکت کی۔اپنے خطاب میں وائس چانسلر پروفیسر ڈاکٹر محمد علی نے کہا کہ نمائش میں طلباؤطالبات نے کمرشل بنیادوں پر چلنے والے تخلیقی منصوبے پیش کئے۔انہوں نے کہا کہ کالج کے طلباؤ طالبات کے پراجیکٹس کو کمپنیاں خرید رہی ہیں۔انہوں نے کہا کہ کالج آف آرٹ اینڈ ڈیزائن کے طلباؤ طالبات کو پڑھائی کے دوران نوکریاں بھی مل جاتی ہیں۔انہوں نے کہا کہ قومی وبین الاقوامی سطح پر کالج کے گریجوئیٹس نے اپنا نام بنایا ہے۔ انہوں نے کہا کہ نمائش میں طلباؤ طالبات نے ماحولیاتی آگاہی پیدا کرنے سے متعلق منصوبے پیش کئے۔ پروفیسر ڈاکٹر احمد بلال نے کہا کہ طلباؤ طالبات نے تخلیقی منصوبوں میں مختلف معاشرتی پہلوؤں کی عکاسی کی۔انہوں نے کہا کہ کالج آف آرٹ اینڈ ڈیزائن کی تاریخی گرینڈ ہال میں شعبہ گرافک ڈیزائن کے 85 طلبہ کے تخلیقی، تحقیقی اور جدید ڈیزائن پرمبنی تھیسزپراجیکٹس عوام کے لیے پیش کئے گئے۔ اس موقع پر جدید طرز پر تھیسز کا ڈیجیٹل کیٹلاگ بھی متعارف کرا یا گیا جو کالج آف آرٹ اینڈ ڈیزائن کی ویب سائٹ پر دستیاب ہیں۔ نمائش 12 جون تک جاری رہے گی۔

پنجاب یونیورسٹی شعبہ سوشل ورک نے کامن ویلتھ یونیورسٹی آف پنسلوانیا کے اشتراک سے ایک بین الاقوامی تعلیمی منصوبہ کامیابی سے مکمل کر لیا، 

پنجاب یونیورسٹی شعبہ سوشل ورک نے کامن ویلتھ یونیورسٹی آف پنسلوانیا کے اشتراک سے ایک بین الاقوامی تعلیمی منصوبہ کامیابی سے مکمل کر لیا، جس کے تحت طلبہ کو دو ورچوئل کورسز کرائے گئے۔ اس منصوبے کی قیادت شعبہ سوشل ورک کی ایسوسی ایٹ پروفیسرڈاکٹر سونیا عمرنے کی۔اس اقدام کے ذریعے طلبہ کو امریکہ کی ایک جامعہ سے بین الاقوامی تعلیمی تجربات اور سیکھنے کے قیمتی مواقع میسر آئے۔ طلبہ کو امریکہ میں جاری لائیو کلاسز میں بھی شامل کیا گیا، جہاں انہیں بین الاقوامی اساتذہ اور طلبہ کے ساتھ براہِ راست رابطے اور تبادلہ خیال کا موقع ملا اور انہوں نے حقیقی وقت میں عالمی تعلیمی ماحول کا تجربہ حاصل کیا۔کورسز کامیابی سے مکمل کرنے پر شریک طلبہ کو میزبان ادارے کی جانب سے اسناد بھی عطا کی گئیں۔ یہ منصوبہ یونیورسٹی کی متعلقہ انتظامیہ سے پیشگی اجازت حاصل کرنے کے بعد شروع کیا گیا تھا۔یہ اشتراک شعبہ سوشل ورک کے عالمی تعلیمی روابط کو مضبوط بنانے اور طلبہ کے تعلیمی تجربات کو مزید مؤثر بنانے کے عزم کی عکاسی کرتا ہے۔ منصوبے کی کامیاب تکمیل وائس چانسلرپروفیسر ڈاکٹر محمد علی کی متحرک قیادت اور بصیرت افروز ویژن کا بھی مظہر ہے، جن کی سرپرستی اور حمایت کے باعث پنجاب یونیورسٹی کے طلبہ کے لیے بین الاقوامی تعلیمی مواقع مسلسل فروغ پا رہے ہیں۔

وائس چانسلر نے نیشنل گیمز میں اعلیٰ کارکردگی پر یونیورسٹی کھلاڑیوں میں 23لاکھ کے انعامات تقسیم کئے  

وائس چانسلر پروفیسر ڈاکٹر محمد علی نے کہا ہے کہ شعبہ سپورٹس سے وابستہ افراد قومی خدمت کر رہے ہیں کیونکہ وہ نہ صرف کھیلوں کے ذریعے پاکستان کے سافٹ امیج کو اجاگر کررہے ہیں بلکہ نوجوانوں میدانوں میں لاکر ان کو منشیات اور دیگر منفی سرگرمیوں سے روک رہے ہیں۔ وہ پنجاب یونیورسٹی شعبہ سپورٹس کے زیر اہتمام ورلڈ روئنگ، نیشنل گیمز اور آل پاکستان انٹر ورسٹی کھیلوں میں نمایاں کارکردگی کا مظاہر ہ کرنے والے طلباؤطالبات کیلئے منعقدہ تقریب تقسیم انعامات سے خطاب کررہے تھے۔ اس موقع پر ڈائریکٹر سپورٹس ڈاکٹر شبیر سرور، ڈی جی ایس ای ایس پروفیسر ڈاکٹر ریحان صادق شیخ، طلباؤطالبات اور آفیشلز نے شرکت کی۔ اس موقع پر وائس چانسلر نے قومی سطح پر مختلف کھیلوں میں نمایاں پوزیشنز حاصل کرنے والے 17کھلاڑیوں اور 7کوچز میں 23لاکھ روپے کے انعامات تقسیم کئے۔

اسلام امن اور محبت کا مذہب کے موضوع پر ہمدرد شوریٰ لاہور کا ایک اہم اجلاس 6مئی بروز بدھ سہ پہر ساڑھے تین بجے ہوٹل فلیٹیز کے بورڈ روم اے میں منعقد ہوا۔ اجلاس میں اسپیکر کے فرائض محترم جناب پروفیسر ڈاکٹر میاں محمد اکرم نے انجام دئیے جبکہ ڈپٹی اسپیکرز جناب قیوم نظامی اور محترم عمر ظہیر میر تھے اجلاس میں اراکینِ شوریٰ محترمہ خالدہ جمیل چوہدری، جناب عثمان غنی، جناب حکیم راحت نسیم، جناب رانا امیر احمد خان، جناب پروفیسر ڈاکٹر خالد محمود عطا، محترمہ سیدہ فرح ہاشمی اور جناب کاشف ادیب جاویدانی سمیت دیگر معزز شخصیات شریک ہوئیں۔ اس موقع پر مبصرین کی ایک بڑی تعداد بھی موجود تھی جن میں محمد نصیر الحق ہاشمی، عبدالرزاق باجوہ، محمد صابر اعوان، سید اختر علی جعفری، شہریار اصغر مرزا، ڈاکٹر مہر محمد سعید اختر، مہر عبدالروف، ڈاکٹر مصطفیٰ کمال، ڈاکٹر کنول فیروز، انجینئر محمد آصف، ڈاکٹر نبیل احمد نبیل، جناب فریاد علی، جناب محمد اصغر اور قاری محمد فاروق اکرم شامل تھے۔اجلاس کی خاص بات بین المذاہب ہم آہنگی اور رواداری کا خوبصورت اظہار تھا، جس میں مسیحی برادری سے جناب نوخیز کھوکھر، سکھ برادری سے جناب سردار سکندر سنگھ اور ہندو مذہب سے تعلق رکھنے والے بھگت لال نے خصوصی شرکت کی۔پروگرام کا باقاعدہ آغاز قاری خالد محمود کی تلاوتِ کلامِ مجید سے ہوا جبکہ حضور نبی کریم صلی اللہ علیہ وآلہ وسلم کی بارگاہ اقدس میں گلہائے عقیدت حافظ حکیم مرغوب احمد ہمدانی نے پیش کیے۔اس موقع پر دینی سکالر و سابق پرنسپل اورینٹیل کالج جامعہ پنجاب پروفیسر ڈاکٹر سید محمد قمر زیدی جو مہمان خاص تھے انہوں نے اپنے خطاب کا آغاز کرتے ہوئے فرمایا کہ الحمدللہ رب العالمین، والصلاۃ والسلام علی اشرف الانبیاء والمرسلین، وعلی آلہ واصحابہ اجمعین۔معزز حاضرینِ مجلس!آج ہم جس موضوع پر جمع ہوئے ہیں، اس کے مختلف پہلو آپ سماعت فرما چکے ہیں۔ حقیقت یہ ہے کہ انسانی برادری میں مذاہب کا وجود انسان کی اصلاح، اس کے باطن کی پاکیزگی اور اس کے ظاہر کے حسن ا خلاق کے لیے ہے۔خواہ وہ آسمانی مذاہب ہوں یا انسانی اصلاح کی دیگر تحریکیں، سب کا بنیادی مقصد انسانیت کی فلاح اور اخلاقی تربیت ہے۔اسلام ان تمام میں ایک ممتاز، جامع اور ہمہ گیر پیغام ہے، جو اللہ تعالیٰ نے اپنے آخری نبی حضرت محمد ﷺ کے ذریعے پوری انسانیت کے لیے بھیجا۔ آپ ﷺ نہ صرف آخری نبی ہیں بلکہ رحمت اللعالمین ہیں، جن کی تعلیمات تمام انسانوں کے لیے ہدایت کا سرچشمہ ہیں۔ ڈاکٹر صاحب کا مزید کہنا تھا کہ ہم اکثر فخر سے یہ کہتے ہیں کہ نبی کریم ﷺ نے اعلیٰ ترین انسانی اخلاق کا نمونہ پیش کیا، لیکن سوال یہ ہے کہ کیا ہم نے اس کردار کو اپنی عملی زندگی میں بھی اپنایا؟ مکی دور کی سختیاں، مخالفتیں اور آزمائشیں ہمارے سامنے ہیں۔ ان حالات میں بھی آپ ﷺ کا رویہ محبت، صبر اور انسانیت سے بھرپور تھا۔ ایک غلام، ایک بیمار، ایک کمزور انسان کے ساتھ آپ ﷺ کا سلوک ہمیں یہ سکھاتا ہے کہ انسانیت مذہب، رنگ اور طبقے سے بالاتر ہے۔آج دنیا ایک گلوبل گاؤں بن چکی ہے۔ ہمارےالفاظ، ہمارے اعمال، سب دنیا کے سامنے ہیں۔ ایسے میں اگر ہمارا کردار ہمارے دعووں کے مطابق نہ ہو تو ہمارے الفاظ کی تاثیر ختم ہو جاتی ہے۔اسی لیے اصل سوال یہ ہے کہ کیا ہم اسلام کو صرف بیان کر رہے ہیں یا اس میں جِي بھی رہے ہیں؟انہوں نے کہا کہ برصغیر میں اسلام تلوار سے نہیں بلکہ صوفیاء کے اخلاق، محبت اور کردار سے پھیلا۔خواجہ نظام الدین اولیاءؒ جیسے بزرگوں نے بغیر کسی تفریق کے انسانوں کی خدمت کی۔ بھوکے کو کھانا، بیمار کی تیمارداری، اور انسان کو انسان سمجھنا درحقیقت یہی اسلام کا عملی چہرہ ہے ان صوفیاء کرام نے یہ سبق دیا کہ مذہب کا اصل جوہر انسان کی خدمت اور محبت ہے، نہ کہ تقسیم اور نفرت۔بدقسمتی سے آج ہم نے دین کو نظریات تک محدود کر دیا ہے اور عمل کو پسِ پشت ڈال دیا ہے۔ہم گفتگو میں تو اتحاد کی بات کرتے ہیں، لیکن عمل میں تفرقہ پیدا کرتے ہیں۔حالانکہ ہماری اصل وحدت صرف ایک ہے وہ ہے ،لا الٰہ الا اللہ محمد رسول اللہ ﷺجب یہ کلمہ ہماری زبان سے نکل کر ہمارے دل، ہمارے اعمال اور ہمارے معاشرے میں اتر جائے گا، تب ہی ہم حقیقی معنوں میں اسلام کے نمائندے بن سکیں گے۔ان کا کہنا تھا کہ اسلام صرف ایک عقیدہ نہیں بلکہ ایک مکمل ضابطۂ حیات ہے۔یہ انسان کو جوڑنے آیا ہے، توڑنے نہیں۔ یہ محبت سکھاتا ہے، نفرت نہیں۔یہ خدمت سکھاتا ہے، برتری نہیں۔

اختتامی کلمات میں معزز اراکین و مبصرین کی گفتگو کو سمیٹتے ہوئے اسپیکر پروفیسر ڈاکٹر میاں محمد اکرم نے تجاویز پیش کی جن میں کہا گیا کہ

٭      تمام مذاہب انسانیت، امن، محبت، برداشت اور بھائی چارے کا درس دیتے ہیں، لہٰذا معاشرے میں نفرت کے بجائے رواداری کو فروغ دیا جائے۔

٭      اسلام کی حقیقی تعلیمات کو صرف تقاریر تک محدود رکھنے کے بجائے عملی زندگی میں نافذ کیا جائے۔

٭      بین المذاہب مکالمے، مشترکہ تقریبات اور رابطوں کو فروغ دے کر قومی یکجہتی کو مضبوط بنایا جائے۔

٭      نوجوان نسل کو صوفیاء کرام کے کردار، محبت، خدمت اور انسان دوستی کے پیغام سے روشناس کرایا جائے۔

٭      اختلافِ رائے کے باوجود ایک دوسرے کے عقائد، مذاہب اور شخصیات کا احترام یقینی بنایا جائے۔

٭      معاشرے میں عدم برداشت، نفرت انگیزی اور انتہا پسندی کے خاتمے کے لیے اجتماعی شعور بیدار کیا جائے۔

٭      ضرورت مند، بھوکوں، بیماروں اور کمزور طبقات کی خدمت کو مذہبی اور قومی فریضہ سمجھا جائے۔

٭      تعلیمی اداروں، سماجی تنظیموں اور میڈیا کے ذریعے امن، محبت اور انسانی احترام کے پیغام کو عام کیا جائے۔

٭      “لا الٰہ الا اللہ محمد رسول اللہ ﷺ” کے پیغامِ وحدت کو عملی طور پر اپناتے ہوئے فرقہ واریت سے اجتناب کیا جائے۔

٭      ہر فرد اپنی اپنی ذمہ داری اور دائرۂ کار میں انسانیت کو جوڑنے، محبت بانٹنے اور خیر کے کاموں میں کردار ادا کرے