Author: ilmati online

اسلام آباد: ہائر ایجوکیشن کمیشن (ایچ ای سی) اور آغا خان یونیورسٹی (اے کے یو) کے درمیان غذائیت سے متعلق آن لائن کورسز کی فراہمی کے لیے مفاہمتی یادداشت (ایم او یو) پر دستخط کر دیے گئے۔ اس معاہدے کے تحت IGNIT3 کے آن لائن نیوٹریشن کورسز کو ایچ ای سی کی نیشنل اکیڈمی آف ہائر ایجوکیشن (NAHE) کے لرننگ مینجمنٹ سسٹم (LMS) پر میزبانی فراہم کی جائے گی، جس کا مقصد پاکستان بھر کی جامعات میں غذائیت اور نرسنگ کے شعبوں سے وابستہ اساتذہ کی پیشہ ورانہ صلاحیتوں میں اضافہ کرنا ہے۔

معاہدے پر آغا خان یونیورسٹی کے پروفیسر و وائس پرووسٹ ریسرچ ڈاکٹر سلیم ویرانی اور این اے ایچ ای-ایچ ای سی کی منیجنگ ڈائریکٹر ڈاکٹر نور آمنہ ملک نے دستخط کیے۔

چیئرمین ایچ ای سی ڈاکٹر نیاز احمد اختر نے آغا خان یونیورسٹی کی ٹیم کے تعاون کو سراہتے ہوئے کہا کہ اس نوعیت کی مزید اسٹریٹجک شراکت داریوں کی ضرورت ہے۔ انہوں نے اس بات پر بھی زور دیا کہ ایسے معیاری کورسز کو جامعات کے نصاب کا حصہ بنایا جانا چاہیے۔

معاہدے کے تحت آغا خان یونیورسٹی نے غذائیت سے متعلق سات SCORM معیار کے مطابق تیار کردہ کورسز این اے ایچ ای کے ایل ایم ایس پر فراہم کیے ہیں۔ ان کورسز میں غذائیت کے بنیادی تصورات، غذائی قلت کی تشخیص اور علاج، بین الشعبہ جاتی مسائل، موسمیاتی تبدیلی اور صنفی پہلوؤں سمیت اہم موضوعات شامل ہیں۔ یہ کورسز لیکچررز، ڈیمانسٹریٹرز، پروفیسرز اور ڈائریکٹرز سمیت مختلف تدریسی عہدوں پر فائز اساتذہ کے لیے تیار کیے گئے ہیں۔

یہ شراکت داری این اے ایچ ای کے ذریعے ایچ ای سی کی اس مسلسل کوشش کا حصہ ہے جس کا مقصد جامعات کے اساتذہ کے لیے تسلیم شدہ مسلسل پیشہ ورانہ ترقی (Continuing Professional Development) کے مواقع کو وسعت دینا اور تعلیمی استعداد کار کو قومی ترجیحات، خصوصاً زچہ و بچہ کی صحت اور نومولود بچوں کی نگہداشت سے ہم آہنگ کرنا ہے۔ یہ مفاہمتی یادداشت 31 مارچ 2029 تک مؤثر رہے گی۔

ماہرین تعلیم اور محققین نے اس امر پر زور دیا ہے کہ جنوبی ایشیا کی علمی، فکری اور تہذیبی تاریخ کو سمجھنے کے لیے فارسی زبان اور اس سے وابستہ علمی ورثے کی جانب دوبارہ رجوع ناگزیر ہے۔ ان خیالات کا اظہار بین الاقوامی اسلامی یونیورسٹی اسلام آباد کے اسلامی تحقیقاتی ادارے (آئی آر آئی) کے زیر اہتمام منعقدہ ایک علمی لیکچر اور مکالمے کے دوران کیا گیا جس میں دانشوروں، اساتذہ اور طلبہ کی بڑی تعداد نے شرکت کی۔ لیکچر کے اختتام پر منعقدہ سوال و جواب کی نشست میں شرکا نے جنوبی ایشیا میں فارسی خواندگی کے بتدریج زوال، مقامی علمی روایات سے دوری اور مقامی دانش کے نظاموں کی اہمیت پر گفتگو کی۔ مقررین نے اس بات پر زور دیا کہ خطے کے فکری ورثے سے موثر استفادہ اسی صورت ممکن ہے جب نئی نسل کو اپنی تاریخی علمی روایت سے جوڑا جائے۔

تقریب کے اختتامی کلمات میں اسلامی تحقیقاتی ادارے کے ڈائریکٹر جنرل پروفیسر ڈاکٹر محمد اکرم نے کہا کہ برصغیر کے تاریخی مدارس کا نصاب عربی اور فارسی دونوں علمی روایات پر استوار تھا جس نے اصل متون، شروح اور حاشیوں کے مطالعے کی ایک مضبوط اور متحرک علمی ثقافت کو فروغ دیا۔ انہوں نے کہا کہ یہ علمی تسلسل اس تصور کی نفی کرتا ہے کہ مسلم معاشروں میں فکری زوال مکمل طور پر غالب آچکا تھا، بلکہ مسلم علمی روایت نے مختلف ادوار میں اپنی قوت اور لچک کا مظاہرہ کیا۔ انہوں نے مزید کہا کہ نوآبادیاتی دور میں پیدا ہونے والے شدید فکری اور مناظرانہ ماحول نے مسلم علماء کو اپنی ادبی اور علمی میراث کے دفاع اور اس کی نئی تشریحات پیش کرنے پر مجبور کیا جس کے نتیجے میں علمی مباحث اور فکری مکالمے کی نئی جہتیں سامنے آئیں۔

ڈاکٹر محمد اکرم نے کہا کہ مسلم علمی روایت کی تاریخ تحقیق، تنقیدی مطالعے اور علمی تبادلہ خیال سے عبارت ہے جس نے صدیوں تک علمی سرمائے کے تحفظ اور اس کی منتقلی کو یقینی بنایا۔ تقریب نے بین الاقوامی اسلامی یونیورسٹی اسلام آباد کے قائم مقام ریکٹر و صدر پروفیسر احمد سعد الاحمد کے اس وژن کی بھی عکاسی کی جس کے تحت علمی معیار، بین الاقوامی تعاون اور تحقیق پر مبنی مکالمے کے فروغ کو خصوصی اہمیت دی جا رہی ہے۔ اسلامی تحقیقاتی ادارے نے اس موقع پر اس عزم کا اعادہ کیا کہ وہ مستقبل میں بھی اسی نوعیت کی علمی سرگرمیوں، تحقیقی مکالموں اور قومی و بین الاقوامی جامعات و محققین کے ساتھ تعاون کے ذریعے علم و تحقیق کے فروغ میں اپنا کردار جاری رکھے گا۔

فیصل آباد۔ 24 جون (اے پی پی):زرعی یونیورسٹی فیصل آباد نے تعلیمی سال 2026-27 کے لئے انڈرگریجویٹ داخلوں کے پہلے انٹری ٹیسٹ کی رجسٹریشن کی تاریخ میں توسیع کر دی ہے۔شیڈول کے مطابق پہلے انڈرگریجویٹ انٹری ٹیسٹ کے لئے آن لائن رجسٹریشن اب 30 جون 2026تک جاری رہے گی جبکہ انٹری ٹیسٹ 5 جولائی 2026 بروز اتوار کو منعقد کیا جائے گا۔

زرعی یونیورسٹی فیصل آباد دنیا کی ممتاز جامعات میں اپنی نمایاں پوزیشن مزید مستحکم کر رہی ہے۔ کیو ایس ورلڈ یونیورسٹی سبجیکٹ رینکنگ 2026(زراعت و جنگلات) میں یونیورسٹی نے عالمی سطح پر 33ویں پوزیشن حاصل کی ہے اور پاکستان کی نمبر ایک زرعی یونیورسٹی کا اعزاز برقرار رکھا ہے۔

دلچسپی رکھنے والے امیدوار بروقت رجسٹریشن کروائیں اور تعلیم، تحقیق، جدت اور سماجی خدمت کے میدان میں اپنی بہترین روایات رکھنے والے اس ممتاز ادارے کا حصہ بنیں۔ داخلوں، اہلیت کے معیار اور ڈگری پروگراموں سے متعلق مزید معلومات یونیورسٹی کی ویب سائٹ پر دستیاب ہیں۔