HEC News……قومی ویٹ لفٹنگ چیمپئن شپ 2026: خواتین اور مردوں دونوں کیٹیگریز میں ہائر ایجوکیشن کمیشن مجموعی چیمپئن قرار
لاہور: ہائر ایجوکیشن کمیشن نے قومی ویٹ لفٹنگ چیمپئن شپ 2026 میں شاندار کارکردگی کا مظاہرہ کرتے ہوئے خواتین اور مردوں دونوں کیٹیگریز میں مجموعی چیمپئن ہونے کا اعزاز اپنے نام کر لیا۔ یہ چیمپئن شپ پاکستان اسپورٹس بورڈ کوچنگ سینٹر، لاہور میں پاکستان ویٹ لفٹنگ فیڈریشن (عبوری کمیٹی) کے زیرِ اہتمام منعقد ہوئی۔خواتین کے مقابلوں میں HEC کی ٹیم نے 110 پوائنٹس کے ساتھ پہلی پوزیشن حاصل کی۔ ٹیم نے مجموعی طور پر 6 طلائی اور 2 چاندی کے تمغے جیتے۔ طلائی تمغے حاصل کرنے والی کھلاڑیوں میں ماہم قاسم (48 کلوگرام)، سحر وعین (58 کلوگرام)، اقصیٰ بشیر (69 کلوگرام)، عائشہ جہانگیر (77 کلوگرام)، زوہا جاوید (86 کلوگرام) اور فضا کھوکھر (+86 کلوگرام) شامل تھیں، جبکہ ارفع مشتاق (53 کلوگرام) اور سحر شفیق (63 کلوگرام) نے چاندی کے تمغے اپنے نام کیے۔
مردوں کے مقابلوں میں بھی HEC نے 96 پوائنٹس کے ساتھ مجموعی چیمپئن شپ جیت لی۔ ٹیم نے 4 طلائی، 3 چاندی اور ایک کانسی کا تمغہ حاصل کیا۔ طلائی تمغے سمیعر بٹ (65 کلوگرام)، قاسم تسنیم (71 کلوگرام)، عبداللہ لون (79 کلوگرام) اور احمد بٹ (+110 کلوگرام) نے جیتے، جبکہ مجاہد رسول (79 کلوگرام)، سید عزیر احمد (88 کلوگرام) اور نور مصطفیٰ (94 کلوگرام) نے چاندی کے تمغے حاصل کیے۔ بلال حسین (110 کلوگرام) نے کانسی کا تمغہ جیتا۔
چیمپئن شپ کے دوران پنجاب کے فرقان احمد نے 88 کلوگرام کیٹیگری میں شاندار کارکردگی کا مظاہرہ کرتے ہوئے تین نئے قومی ریکارڈ بھی قائم کیے۔ انہوں نے اسنیچ میں 145 کلوگرام، کلین اینڈ جرک میں 180 کلوگرام اور مجموعی طور پر 325 کلوگرام وزن اٹھا کر قومی ریکارڈ اپنے نام کیا۔