اسلام آباد: پارلیمانی سیکرٹری برائے تعلیم رابعہ نعیم فاروقی نے Higher Education Commission (ایچ ای سی) سیکرٹریٹ کا دورہ کیا، جہاں چیئرمین ایچ ای سی ڈاکٹر نیاز احمد اختر اور سینئر انتظامیہ نے انہیں ادارے کے اسٹریٹجک پروگرامز اور آئندہ اقدامات کے بارے میں جامع بریفنگ دی۔
بریفنگ کے دوران ایچ ای سی کی جانب سے اعلیٰ تعلیم کے نظام کو جدید تقاضوں سے ہم آہنگ بنانے، جامعات میں تحقیق اور جدت کے فروغ، اور تعلیمی معیار کو بہتر بنانے کے لیے جاری منصوبوں پر تفصیل سے روشنی ڈالی گئی۔
پارلیمانی سیکرٹری تعلیم نے کمیشن کی کارکردگی کو سراہتے ہوئے کہا کہ حکومت ملک کی ترقی کے لیے اعلیٰ تعلیم کو بنیادی ستون کی حیثیت دیتی ہے اور اس شعبے کی مضبوطی کے لیے ہر ممکن تعاون جاری رکھا جائے گا۔
اجلاس میں تعلیمی اصلاحات اور ڈیجیٹل اقدامات پر بھی تفصیلی تبادلہ خیال کیا گیا، جن کا مقصد پاکستان بھر کی جامعات میں تعلیمی پروگراموں کے معیار کو بہتر بنانا اور ان کی رسائی کو مزید وسیع کرنا ہے۔
