ہائر ایجوکیشن کمیشن کی ہدایات کے مطابق، شعبہ تاریخ، اسلامیہ یونیورسٹی بہاولپور نے مغل سلطنت کے قیام کی 500 ویں سالگرہ کے موقع پر ایک آگاہی سیمینار کا انعقاد

ہائر ایجوکیشن کمیشن کی ہدایات کے مطابق، شعبہ تاریخ، اسلامیہ یونیورسٹی بہاولپور نے مغل سلطنت کے قیام کی 500 ویں سالگرہ کے موقع پر ایک آگاہی سیمینار کا انعقاد کیا۔ یہ تقریب اسلامیہ یونیورسٹی بہاولپور کے بغداد الجدید کیمپس میں واقع خواجہ غلام فرید آڈیٹوریم کے ویڈیو کانفرنس روم میں منعقد ہوئی۔ شعبہ تاریخ کی ایسوسی ایٹ پروفیسر اور چیئرپرسن، ڈاکٹرسمعیہ خالد تقریب کی فوکل پرسن تھیں، جبکہ ایسوسی ایٹ پروفیسر ڈاکٹر مظہر حسین نے سیمینار کے ناظم کے فرائض سرانجام دیے۔ اس تقریب میں طلباء اور فیکلٹی ممبران کی بڑی تعداد نے شرکت کی۔ سیمینار میں چیئرپرسن ڈاکٹر سمعیہ خالد نےپانچ صدیاں: اقتدار، ثقافت، کشمکش اور ورثہ کے موضوع پر گفتگو کی۔ ڈاکٹر مظہر حسین نے مغل طرزِ حکمرانی اور مذہبی تنوع: رواداری، اختیار اور سیاسی انضمام پر روشنی ڈالی۔ ڈاکٹر محمد شفیق نےمغل مقبرہ سازی: تدفینی روایات، باغات کے ڈیزائن اور شاہی ورثے کا تصور کے موضوع پر بات کی۔ ڈاکٹر صفیہ صدیقی نے تخت کے پسِ پردہ آوازیں: مغل سلطنت کی خواتین کے حوالے سے اظہارِ خیال کیا۔ لیکچرار ڈاکٹر ممتاز احمد خان نے مغل نظامِ مال گزاری اور اس کا تسلسل: ٹوڈر مل کے زمینی ریکارڈ سے لے کر جدید پٹواری نظام تک کے موضوع پر گفتگو کی۔ لیکچرار ڈاکٹر خضر حیات نے آگرہ کی بازگشت: ریاست بہاولپور کے شاہی فنِ تعمیر میں مغل طرزِ آرائشکے موضوع پر بات کی۔اس سیمینار نے ایک ایسا علمی پلیٹ فارم فراہم کیا جہاں جنوبی ایشیا کی تاریخ، سیاسی اداروں، نظامِ مال گزاری، صنفی تعلقات، تعمیراتی روایات، ثقافتی ورثے اور مذہبی تنوع پر مغل سلطنت کے دیرپا اثرات کا جائزہ لیا گیا۔ اس دوران ریاست بہاولپور کے تاریخی اور ثقافتی منظرنامے پر مغل فنِ تعمیر اور انتظامی روایات کے اثرات پر خصوصی توجہ دی گئی۔ یہ سرگرمی برصغیر پاک و ہند کے عظیم تاریخی ورثے کے بارے میں آگاہی پھیلانے، علمی مکالمے کو فروغ دینے اور تحقیق کو آگے بڑھانے کے لیے شعبہ تاریخ کے عزم کی عکاس تھی۔