یو ای ٹی لاہور اور انرجی کانشیئس انجینئرنگ پرائیویٹ لمیٹڈ کے مابین مفاہمتی یادداشت پر دستخط……یو ای ٹی لاہور نیو کیمپس کالا شاہ کاکو میں 400 کلوواٹ سولر پاور سسٹم کی تنصیب کا معاہدہ طے ہو گیا

یونیورسٹی آف انجینئرنگ اینڈ ٹیکنالوجی (یو ای ٹی) لاہور نے اپنے نیو کیمپس کالا شاہ کاکو میں 400 کلوواٹ سولر پاور سسٹم کی تنصیب کیلئے انرجی کانشیئس انجینئرنگ پرائیویٹ لمیٹڈ کمپنی کیساتھ معاہدہ طے کر لیا ہے۔ اس موقع پر وائس چانسلر ڈاکٹر شاہد منیر کا کہنا تھا کہ یہ منصوبہ قابلِ تجدید توانائی کے فروغ، ماحول دوست انفراسٹرکچر کی ترقی اور وسائل کے مؤثر استعمال کے حوالے سے یونیورسٹی کے عزم کا مظہر ہے۔

انہوں نے کہا کہ اس منصوبے کے تحت شمسی توانائی کے استعمال کو فروغ ملے گا جبکہ بجلی کے اخراجات میں نمایاں کمی آئے گی۔ سولر پاور سسٹم کی تنصیب سے یونیورسٹی کو آئندہ برسوں میں خاطر خواہ مالی بچت حاصل ہوگی اور کیمپس کی گرین انرجی صلاحیت میں بھی اضافہ ہوگا۔

معاہدے کی دستاویزات پر ٹریژرر یو ای ٹی عابد شہزاد اسلم اور سی ای او انرجی کانشیئس انجینئرنگ نے دستخط کیے۔ وائس چانسلر نے مزید کہا کہ یونیورسٹی میں توانائی کے مؤثر استعمال، کم لاگت انفراسٹرکچر اور طلبہ دوست سہولیات کی فراہمی کیلئے متعدد اہم منصوبے کامیابی سے مکمل کیے جا رہے ہیں۔