کراچی: نیشنل یونیورسٹی آف سائنسز اینڈ ٹیکنالوجی (نسٹ) کے فارمولا اسٹوڈنٹ ٹیم (این ایف ایس ٹی) نے پاکستانی انجینئرنگ اور پائیدار ٹرانسپورٹ کے شعبے میں ایک اہم سنگِ میل عبور کرتے ہوئے اپنی نئی ہائبرڈ ریسنگ کار NAS HV-26 (کار 268) کی رونمائی کر دی۔
یہ جدید ہائبرڈ گاڑی مکمل طور پر نسٹ کراچی کیمپس (پاکستان نیوی انجینئرنگ کالج) کے انڈرگریجویٹ طلبہ نے ڈیزائن اور تیار کی ہے۔ NAS HV-26 رواں سال ستمبر میں ترکیہ میں ہونے والے بین الاقوامی فارمولا اسٹوڈنٹ مقابلے میں پاکستان کی نمائندگی کرے گی۔
تقریبِ رونمائی کے موقع پر ٹیم کے اراکین نے بتایا کہ NAS HV-26 جدید الیکٹرک اور ہائبرڈ ٹیکنالوجی سے لیس ہے اور یہ گاڑی انجینئرنگ مہارت، جدت طرازی اور ماحول دوست ٹرانسپورٹ کے فروغ کے حوالے سے ٹیم کی تازہ ترین کامیابی کی عکاس ہے۔
نسٹ فارمولا اسٹوڈنٹ ٹیم کے مطابق اس منصوبے کا مقصد طلبہ کو عملی انجینئرنگ تجربات فراہم کرنے کے ساتھ ساتھ پاکستان کی تکنیکی صلاحیتوں کو عالمی سطح پر اجاگر کرنا ہے۔ ٹیم کو امید ہے کہ NAS HV-26 بین الاقوامی مقابلوں میں بہترین کارکردگی کا مظاہرہ کرتے ہوئے ملک کے لیے اعزاز حاصل کرے گی۔
