پاکستان اور مالدیپ کی جامعات کے درمیان تعلیمی و تحقیقی تعاون کے فروغ کے لیے پانچ مفاہمتی یادداشتوں پر دستخط

ایچ ای سی پاکستان کی سہولت کاری سے مالدیپ نیشنل یونیورسٹی اور پانچ پاکستانی جامعات کے مابین معاہدے؛ مشترکہ تحقیق، طلبہ و اساتذہ کے تبادلے اور دوہری ڈگری پروگرامز کے امکانات روشن

اسلام آباد: ہائر ایجوکیشن کمیشن (ایچ ای سی) پاکستان کی سہولت کاری سے مالدیپ نیشنل یونیورسٹی (ایم این یو) اور پاکستان کی پانچ ممتاز جامعات کے درمیان تعلیمی و تحقیقی تعاون کو فروغ دینے کے لیے پانچ مفاہمتی یادداشتوں (ایم او یوز) پر دستخط کیے گئے ہیں۔ یہ پیش رفت مالدیپ کے صدر ڈاکٹر محمد معیزو کے پاکستان کے تاریخی تین روزہ سرکاری دورے کے موقع پر سامنے آئی۔مفاہمتی یادداشتوں پر مالدیپ نیشنل یونیورسٹی کی وائس چانسلر ڈاکٹر عائشہ شہناز آدم نے نیشنل یونیورسٹی آف سائنسز اینڈ ٹیکنالوجی (نسٹ)، پیر مہر علی شاہ ایرڈ ایگریکلچر یونیورسٹی راولپنڈی، یونیورسٹی آف واہ، گورنمنٹ کالج یونیورسٹی لاہور اور فاؤنڈیشن یونیورسٹی اسلام آباد کے سربراہان اور نمائندگان کے ساتھ دستخط کیے۔

ایچ ای سی سیکریٹریٹ اسلام آباد میں منعقدہ تقریب سے خطاب کرتے ہوئے چیئرمین ایچ ای سی پروفیسر ڈاکٹر نیاز احمد اختر نے کہا کہ یہ شراکت داریاں مشترکہ تحقیقی منصوبوں، اساتذہ اور طلبہ کے تبادلوں، علمی کانفرنسوں، سیمینارز اور مشترکہ و دوہری ڈگری پروگرامز کے ذریعے دونوں ممالک کے درمیان تعلیمی روابط کو مزید مستحکم کرنے میں اہم کردار ادا کر سکتی ہیں۔انہوں نے پاکستان اور مالدیپ کے درمیان اعلیٰ تعلیم کے شعبے میں مضبوط اور دیرپا شراکت داریوں کے فروغ کے لیے ایچ ای سی کے عزم کا اعادہ کیا۔

اس موقع پر ڈاکٹر عائشہ شہناز آدم نے بین الاقوامی تعلیمی روابط کے فروغ کے لیے ایچ ای سی کی کوششوں کو سراہتے ہوئے کہا کہ دونوں ممالک کی جامعات کے درمیان پوسٹ گریجویٹ تحقیق، طبی تعلیم، زراعت و غذائی علوم، قانون، سیاحت و مہمان نوازی، بحری علوم، ماحولیاتی پائیداری اور موسمیاتی تبدیلی جیسے شعبوں میں تعاون کے وسیع امکانات موجود ہیں۔