پنجاب یونیورسٹی آفس آف ریسرچ انوویشن اینڈ کمرشلائزیشن (اورک)کے زیر اہتمام یو ایس پیٹنٹ فائلنگ پر سیمینار کا انعقاد کیاگیا جس میں امریکہ کے پیٹنٹ بھرنے کے عمل پرخصوصی توجہ دی گئی۔ اس موقع پر یونیورسٹی آف سنٹرل مشی گن امریکہ کے ڈاکٹر وسیم حیدر، پروفیسرڈاکٹرگل حمید اعوان، ڈائریکٹرانسٹیٹیوٹ آف میٹالرجی اینڈ میٹریلز انجینئرنگ پروفیسر ڈاکٹر محسن علی رضا، قائمقام ڈائریکٹر اورک پروفیسر ڈاکٹر عقیل انعام، ڈپٹی ڈائریکٹرز ڈاکٹر خالد محمود،ڈاکٹر محمد عرفان، محققین، فیکلٹی ممبران، صنعتی ماہرین اور طلباؤطالبات نے شرکت کی محققین، فیکلٹی ممبران، صنعتی ماہرین اور طلباؤطالبات نے شرکت کی۔ اپنے کلیدی لیکچر میں،ڈاکٹر وسیم حیدر نے پیٹنٹ کے قانون کی بنیادی باتوں، درخواست کے عمل، عام خامیوں اور کامیاب پیٹنٹ فائلنگ کے لیے حکمت عملیوں پر روشنی ڈالی۔ سیمینار کے شرکاء کو بین الاقوامی سطح پر اپنی ایجادات اور نظریات کی حفاظت کے لیے ضروری علم اور آلات سے آگاہ کیا گیا۔

سیچوان ایگریکلچرل یونیورسٹی عوامی جمہوریہ چین کے زیر اہتمام بین الاقوامی تعلیمی فورم میں اسلامیہ یونیورسٹی بہاولپور کی طالبہ رابعہ طاہر نے بہترین ریسرچر کا اعزاز حاصل کیا ہے۔ اس موقع پر 10 عالمی تعلیمی اداروں کے 36 چینی اور غیر ملکی طلبہ نے اپنی تعلیمی کامیابیاں پیش کیں۔ فورم میں تین ذیلی فورم اینیمل سائنسز گروپ، فوڈ سائنس، پلانٹ اینڈ انوائرمینٹل انجینئرنگ گروپ، اور ایگریکلچرل اینڈ فاریسٹری اکنامک مینجمنٹ گروپ شامل تھے۔ اسلامیہ یونیورسٹی بہاول پور کی طالبہ رابعہ طاہر نے پاکستان کی نمائندگی کی اور بہترین ریسرچ پیپر ایوارڈ جیتا۔ وہ سیچوان ایگریکلچرل یونیورسٹی میں اسلامیہ یونیورسٹی آف بہاولپور اور سیچوان ایگریکلچرل یونیورسٹی چین کے  مابین طے شدہ ایم او یو کے تحت زیر تعلیم ہیں۔ انٹرنیشنل اسٹوڈنٹ اکیڈمک فورم کا انعقاد انٹرنیشنل کمپیٹینس انہانسمنٹ ایکشن کے اہم اقدامات میں سے ایک ہے تاکہ بین الاقوامی طلباء کے درمیان علم کے اشتراک کو بھرپور طریقے سے فروغ دیا جا سکے۔ وائس چانسلر پروفیسر ڈاکٹر نویدا ختر، ڈین فیکلٹی آف ایگریکلچر اینڈ اینوائرمنٹ پروفیسر ڈاکٹر تنویر حسین ترابی نے رابعہ طاہر کو اس کامیابی پر مبارکباد دی ہے۔

 ہوم اکنامکس  یونیورسٹی کی سنڈیکیٹ نے
آئندہ تعلیمی سال کے لیے طالبات کو ریلیف دینے کا فیصلہ کیا ہے جس میں
فیسوں میں بڑی کمی کا اہم فیصلہ بھی شامل ہے۔ ہوم اکنامکس یونیورسٹی کی
سنڈیکیٹ میں  ایک ارب 14 کروڑ روپے مالیت کے  بجٹ کی منظوری دے دی گئی ہے۔
ہوم اکنامکس یونیورسٹی کا طالبات کی فیسوں میں بڑی کمی کرنے کی منظوری دے
دی  ہے۔ یونیورسٹی میں نئے داخل ہونے والی طالبات کے لیے انٹرمیڈیٹ کی
فیسوں میں 31 فیصد تک کمی، ایم فل کی فیسوں میں 38 فیصد تک کمی کر دی گئی
ہے۔ ہوم اکنامکس یونیورسٹی  کا ٹرانسپورٹ اور ہاسٹل کی فیسوں میں اضافہ نہ
کرنے کا فیصلہ بھی کیا گیا ہے۔ ہوم اکنامکس یونیورسٹی نے اینڈومنٹ فنڈ کے
لیے 315 ملین روپے  مختص کر دیے ہیں۔ سنڈیکیٹ اجلاس میں  فنانشل ایڈ اور
سکالر شپ ریگولیشن، ہاسٹل رولز، ایگزامینیشن ریگولرائزیشن کی منظوری دی گئی
ہے جبکہ یونیورسٹی میں زکوۃ فنڈز اور پنشن فنڈز کے لیے رقم مختص کرنے کی
منظوری دے دی گئی ہے۔ حکومت پنجاب کی پالیسی کے مطابق یونیورسٹی  کے اساتذہ
و ملازمین کی تنخواہوں میں اضافہ کی بھی منظوری دے دی گئی ہے۔ یونیورسٹی
میں  نئے ریسرچ جرنلز، مختلف مضامین کے سکیم آف اسٹڈیز کی بھی منظوری دے
دی گی ہے۔ بجٹ میں ریسرچ کے لیے 40 لاکھ روپے مختص کیے گئے ہیں۔ ہوم
اکنامکس یونیورسٹی کے سنڈیکیٹ اجلاس میں وائس چانسلر پروفیسر ڈاکٹر فلیحہ
زہرا کاظمی، سیکرٹری ہائیر ایجوکیشن  ڈاکٹر فرخ نوید ،  پروفیسر ڈاکٹر 
نسیم احمد، ڈاکٹر رخسانہ ڈیوڈ، شاہد محمود، محمد انور رشید اور  ڈاکٹر
عنبرین جاوید ، رجسٹرار شجاعت منیف قریشی نے بھی شرکت کی۔  وائس چانسلر
پروفیسر ڈاکٹر فلیحہ زہرا کاظمی کا کہنا ہے کہ یونیورسٹی کا بجٹ طالبات کی
سہولیات و ضروریات کو مد نظر رکھتے ہوئے تیار کیا گیا ہے جس سے سرکاری
یونیورسٹی میں طالبات کو معیاری تعلیم حاصل کرنے کا موقع میسر آئے گا۔
—

چیئرمین پرائم منسٹر یوتھ پروگرام، رانا مشہود احمد خان نے  چیئرمین ہائر ایجوکیشن کمیشن (ایچ ای سی) ڈاکٹر مختار احمد کے ساتھ ایک میٹنگ  میں پاکستان کے نوجوانوں کے لیے مثبت مشغولیت اور ترقی کے مواقع کو فروغ دینے کے لیے حکمت عملیوں پر تبادلہ خیال کیا۔ ملاقات کے دوران چیئرمین رانا مشہود احمد خان اور ڈاکٹر مختار احمد دونوں نے ملک بھر میں نوجوانوں کی آبادی کے لحاظ سے مہارتوں، تعلیم اور مجموعی طور پر بااختیار بنانے کے لیے مشترکہ کوششوں کی اہمیت پر زور دیا۔ انہوں نے مختلف اقدامات اور پروگراموں پر غور کیا جو نوجوانوں کو مؤثر طریقے سے شامل کرنے اور انہیں بااختیار بنانے کے لیے لاگو کیے جا سکتے ہیں، یعنی وزیر اعظم کا نیشنل انوویشن ایوارڈ، پرائم منسٹر یوتھ لیپ ٹاپ سکیم، قومی رضاکار کور اور کئی دیگر۔" آج کے نوجوان کل کے لیڈر ہیں، اور یہ  ضروری ہے کہ ہم انہیں ترقی کے مواقع فراہم کریں،" چیئرمین رانا مشہود احمد خان نے کہا۔ "ایچ ای سی جیسے اداروں کے ساتھ مشترکہ کوششوں اور شراکت داری کے ذریعے، ہمارا مقصد ایک ایسا سازگار ماحول بنانا ہے جہاں ہر نوجوان پاکستانی اپنی پوری صلاحیتوں کا ادراک کر سکے۔" ڈاکٹر مختار احمد نے کہا"وزیراعظم کے یوتھ پروگرام اور ایچ ای سی کی مشترکہ کوششیں ہمیں وسائل اور مہارت کو مؤثر طریقے سے استعمال کرنے کے قابل بنائے گی، اس طرح نوجوانوں کی ترقی پر ہمارے اثرات زیادہ سے زیادہ ہوں گے،" انہوں نے تصدیق کی۔ میٹنگ مزید بات چیت اور نشاندہی کی گئی حکمت عملیوں کو نافذ کرنے کے لیے ٹھوس اقدامات کے عزم کے ساتھ اختتام پذیر ہوئی۔ چیئرمین رانا مشہود احمد خان اور ڈاکٹر مختار احمد دونوں نے پاکستان میں نوجوانوں کی ترقی کے مستقبل کے بارے میں پرامید اظہار کیا اور اس مشترکہ مقصد کے لیے مل کر کام کرنے کے عزم کا اعادہ کیا۔

وفاقی وزارت تعلیم پاکستانی نوجوانوں میں عام بول چال کی مہارت کو فروغ دینے کے لیے “امپاورنگ وائسز، شیپنگ فیوچرز” مہم کا آغاز کرے گی۔آکسفورڈ ڈیبیٹنگ یونین کے صدر اسرار خان کی قیادت میں اس مہم کا مقصد ذاتی اور پیشہ ورانہ ترقی کے لیے ضروری عوام میں بولنے کی مہارت کے ساتھ نوجوانوں کو بااختیار بنانا ہے۔

اعتماد، تنقیدی سوچ اور موثر مواصلت میں اضافہ ہے۔ اس حوالہ سے ایک قومی ایونٹ کے دوران سوشل میڈیا مہم، عوامی تقریری ورکشاپس، مباحثے اور علاقائی مقابلوں کا انعقاد کیا جائے گا۔ مہم کا مقصد پاکستان کے نوجوانوں کی صلاحیتوں سے پردہ اٹھانا اور ملک کے روشن مستقبل کی تشکیل ہے۔

اکستان میں اٹلی کی سفیر ماریلینا آرمیلن نے انٹرایکٹو ریڈیو انسٹرکشن (آئی آر آئی) کے ذریعے پاکستان میں اسکول نہ جانے والے بچوں کو تعلیم دینے کے لیے ”ریڈیو ایجوکیشن” اقدام اٹھانے کا اعلان کیاہے جس کا آغاز آئندہ ماہ سے ہوگا، اقدام کا مقصد تعلیم کے فروغ کے لئے پاکستان کی کوششوں کو تقویت دینا ہے، اس اقدام سے پاکستان کے دیہی علاقوں میں تعلیم سے دور بہت سے بچوں کے ریڈیو نشریات کے ذریعہ اندراج، تعلیم کے فوائد کو اجاگر کرنے، سکولوں کے لئے پائیدار ترقی کے طریقوں کے بارے میں عملی معلومات کے تبادلے میں مدد ملے گی۔ اے پی پی کے ساتھ ایک خصوصی انٹرویو میں، سفیر نے انکشاف کیا کہ آئی آر آئی کا ایک اہم پروگرام اگلے ماہ شروع کیا جائے گا، جسے اسکول نہ جانے والے لاکھوں بچوں کے لئے تعلیم تک رسائی کو از سر نو ترتیب دینے کے لئے تیارکیا گیا ہے۔

اٹلی کی سفیر ماریلینا آرمیلن

اٹلی مقامی شراکت داروں کے اشتراک اور یونیسکو کے تعاون سے پاکستان بھر میں تعلیمی خلا کو پر کرنے اور پسماندہ طبقات کو بااختیار بنانے کے لئے”ریڈیو ایجوکیشن” پروگرام شروع کرے گا۔ پاکستان کو 62 فیصد شرح خواندگی اور تعلیمی رسائی میں نمایاں عدم مساوات کے چیلنجز کا سامنا ہے۔ وزیر اعظم شہباز شریف کی حالیہ”تعلیمی ایمرجنسی” نے اسکول نہ جانے والے لاکھوں بچوں کو تعلیمی شعبے میں ضم کرنے کے لئے ایک جامع کوشش کا عہد کیا ہے۔ یہ اقدام پاکستان کے جامع تعلیم اور معاشی ترقی کی کوششوں کی جانب ایک اہم قدم ہے۔ مارلینا نے ایک سوال کا جواب دیتے ہوئے ایک مضبوط تعلیمی نظام کو فروغ دینے میں حکومت، اساتذہ اور والدین کے اہم کردار پر روشنی ڈالی۔

انہوں نے کہا کہ اٹلی نے اپنے شاندار تعلیمی ورثے کے ساتھ دور دراز علاقوں میں ریڈیو تعلیم جیسے یونیسکو کے تعاون سے چلنے والے منصوبوں کے ذریعے پاکستان کی مدد کی ہے۔ انہوں نے مزید کہا کہ اس منصوبے کا مقصد نہ صرف سیکھنے کو فروغ دینا ہے بلکہ کمیونٹیز کو پائیدار طریقوں کو اپنانے کے لئے بااختیار بنانا اور ماحولیاتی چیلنجوں کے خلاف لچک کو بڑھانا ہے۔ تعلیم کے علاوہ، اٹلی اور پاکستان اقتصادی ہم آہنگی کے خواہاںہیںاور بڑھتے ہوئے تجارتی تعلقات اور زراعت، توانائی اور سیاحت میں مشترکہ مفادات کے ساتھ، دونوں ممالک اپنی اپنی صلاحیتوں سے فائدہ اٹھانا چاہتے ہیں۔ میلان اور لاہور کے درمیان براہ راست پروازوں کے امکانات، اٹلی میں مقیم متحرک پاکستانی تارکین وطن کی ضروریات کو پورا کریں گی جو دوطرفہ رابطوں اور ثقافتی تبادلے کے لئے ایک امید افزا مستقبل کا اشارہ ہے۔

جیسا کہ پاکستان اپنے تعلیمی منظرنامے اور معاشی امنگوں کے ساتھ آگے بڑھ رہا ہے، ایسے میں اٹلی کے ساتھ تعاون امید اور مواقع کی کرن ہے۔ مشترکہ کوششوں اور مشترکہ وژن کے ذریعے، دونوں ممالک ایک ایسے مستقبل کی طرف کوشاں ہیں جہاں تعلیم معاشرتی خوشحالی اور جامع ترقی کی بنیاد ہے۔ اٹلی کے سفیر ماریلینا نے کہا کہ پاکستان میں اٹلی کی حمایت تعلیم اور ماحولیاتی استحکام کے لیے مختلف منصوبوں کے ذریعے نمایاں تبدیلی لا رہے ہیں۔

انہوں نے اپنے ملک کی کوششوں کو بھی اجاگر کیا، جس میں پاکستان اور اٹلی کے درمیان قرضوں کے تبادلے کا معاہدہ (پی آئی ڈی ایس اے) بھی شامل ہے، جس میں ملک بھر میں 48 منصوبوں کی مالی اعانت شامل ہے، انہوں نے مزید کہا کہ گلگت بلتستان میں، وہ ماحولیاتی حکمت عملی میں مدد کر رہے ہیں اور ایکو سیاحت کو فروغ دے رہے ہیں۔ یونیسکو کے ساتھ ان کے تعاون میں لڑکیوں کے تعلیم کے حق کی حمایت 6570 طالبات کا اندراج اور 457 اساتذہ کو جدید طریقوں سے تربیت دینے جیسے منصوبے شامل ہیں۔انہوں نے کہا کہ ”ریڈیو ایجوکیشن”منصوبے میں اسکول کے بعد کی تعلیم اور کمیونٹی لچک کو بڑھانے کے لئے انٹرایکٹو ریڈیو ہدایات کا استعمال کیا جائے گا۔ سفیر نے افراد کو بااختیار بنانے اور سماجی و اقتصادی نتائج کو بہتر بنانے میں خواندگی کے کردار پر زور دیا۔

شیئر کریں

:وفاقی نظامت تعلیمات (ایف ڈی ای) کے سکولوں میں نئی تعلیم دوست پالیسی متعارف کرا دی گئی ہے جس کے تحت پرائمری جماعت تک کے بچے یکم اگست سے بغیر بیگ کے سکول آیا کریں گے۔ جمعہ کو وزارت وفاقی تعلیم و پیشہ وارانہ تربیت کے حکام نے بتایا کہ اسلام آباد کے سرکاری سکولوں میں زیر تعلیم بچوں کے لئے یہ ایک اچھی خبر ہے، ان کو بھاری بھرکم سکول بیگ اب اٹھانا نہیں پڑے گا۔

اسلام آباد کے سرکاری پرائمری سکول کے لیے متعارف دوستانہ پالیسی کے تحت طلباء کے سکول کی کتابوں کو ذخیرہ کرنے کے لیے کلاس رومز میں کیبن فراہم کئے جائیں گے۔ اس اقدام کا مقصد بھاری سکول بیگز کا وزن کم کرنا اور طلباء کے لیے صحت مند اور خوشگوار سیکھنے کے تجربے کو فروغ دینا ہے۔

حکام نے بتایا کہ یہ فیصلہ والدین اور طلباء دونوں کے لیے ایک خوش آئند اقدام ثابت ہو گا۔ نئی پالیسی یکم اگست سے نافذ العمل ہو گی، تمام سرکاری پرائمری سکولوں میں ضروری انتظامات کیے جا رہے ہیں۔

وزیر اعلی مریم نواز سے الائیڈ،ٹیک ویلی،گوگل فار ایجوکیشن کے وفد نے ریجنل ہیڈ پال ہچنگس کی قیادت میں ملاقات کی۔ملاقات میں اہم فیصلے کیے گئے،جس کے مطابق آسٹریلیوی ادارہ الائیڈ کے اشتراک سے ”کروم بکس” کی سمبلنگ پنجاب میں کی جائے گی۔پنجاب کے سرکاری سکولوں کے 50ہزار طلبہ کوگوگل آئی ڈی مفت فراہم کیا جائے گا۔ سرکاری سکولوں کے ایک ہزار ٹیچرز کو فری ڈیجیٹل سرٹیفکیشن کورسز کرائے جائیں گے،15 ہزار یونیورسٹیز طلبہ کے لئے بھی مفت سرٹیفکیشن کورسز پراجیکٹ اور ڈیڑھ کروڑ ڈالر فیس کے لئے گوگل فار ایجوکیشن معاونت کرے گا۔ پنجاب میں ڈیجیٹل سکول آن ویل پراجیکٹ لانچ کرنے کا اصولی فیصلہ بھی کیاگیا۔

وزیراعلی سے پال ہچنگس کی قیادت میں وفد کی ملاقات میں ڈیجیٹل ایجوکیشن منصوبوں،سمارٹ کلاس روم اور ڈیجیٹل ایجوکیشنل ایکو سسٹم میں تعاون کے امکانات کا جائزہ لیا۔آئوٹ آف سکول بچوں کا مستند ڈیٹا مرتب کرنے کے لئے گوگل فارایجوکیشن کی تکنیکی معاونت حاصل کرنے پر اتفاق کیاگیا۔وزیر تعلیم رانا سکندر حیات نے بریفنگ میں بتایا کہ پنجاب کے سرکاری سکولوں کے طلبہ گوگل آئی ڈی کے ذریعے لاگ ان کر سکیں گے۔یونیورسٹی سٹوڈنٹس کو اینٹی وائرس، آرٹیفیشل انٹیلی جنس اور دیگر کی سرٹیفکیشن کرائی جائیگی۔ لیول ون اور لیول ٹو سرٹیفکیٹ حاصل کرکے سٹوڈنٹس دنیا بھر میں آسانی سے جاب حاصل کرسکیں گے۔ سکول آن ویل کے دو پائلٹ پراجیکٹ چند ہفتوں میں لانچ کر دیئے جائیں گے۔سکول آن ویلز میں طلبہ اپنے گوگل آئی ڈی کو لاگ ان کرکے سٹڈیز کرسکیں گے۔ کروم بکس کے ذریعے طلبہ کو کوئی ایپلی کیشن ڈان لوڈ نہیں کرنا پڑے گی۔طلبہ کے زیر استعمال کروم بکس کا ڈیٹا بھی مانیٹر کیا جاسکے گا۔وزیراعلی نے کہاکہ نظام تعلیم میں خامیوں اور کمزوریوں کا تعین کرکے بہتری کے لئے کوشاں ہیں۔ایجوکیشن سسٹم ری ویمپ کیے بغیر مثبت تبدیلی ممکن نہیں،سرکاری سکولوں کے بار بار وزٹ صورتحال کا جائزہ لے رہی ہوں اگر ہمارے طلبہ کو مواقع میسر ہوتو کما ل کر سکتے ہیں۔

مریم نواز نے وفد سے گفتگوکرتے ہوئے کہا کہ آئی ٹی سرٹیفکیٹس کے ذریعے نوجوانوں کو مقامی اور عالمی مارکیٹ میں روزگار کے حصول کے قابل بنایا جائے گا۔پنجاب حکومت گوگل فار ایجوکیشن کیساتھ کام کرنے کیلئے پر عزم ہے۔ انہوں نے کہا کہ آئی ٹی اور آرٹیفیشل انٹیلی جنس میں مہارت نوجوانوں کو معاشی خود مختاری کی راہ پر گامزن کرے گی، کروم بکس کی مقامی سطح پر اسمبلنگ میں بھرپور معاونت کریں گے، گوگل فارایجوکیشن کے وفد نے حکومت پنجاب کے پہلی سرکاری آٹیزم سکول پراجیکٹ میں دلچسپی کا اظہار کیا۔سکولوں میں تحقیق، جدت لانے سمیت بیشتر متعلقہ امور پر تبادلہ خیال بھی کیا گیا۔وزیراعلی نے گوگل ٹیم کو پنجاب حکومت کے آئی ٹی انیشیٹیوز سے آگاہ کیا۔گوگل فار ایجوکیشن ریجنل ہیڈپال ہچنگس نے کہا کہ ڈیجیٹل ایجوکیشن تک رسائی آسان بنانے کیلئے پنجاب حکومت کے ساتھ مل کر کام کرنے کے خواہشمند ہیں، پنجاب میں نظام تعلیم کو جدت کی راہ پر گامزن کرنے کے لئے مریم نواز اور ان کی ٹیم کی کوششیں قابل تحسین ہیں۔پنجاب میں وزیراعلی مریم نواز اور ان ٹیم کے ساتھ کام کرکے خوشی محسو س کریں گے۔وفد میں گوگل فار ایجوکیشن کے کرس ہارٹ،حارث سفیان،الائیڈ کارپوریشن کے سی ای او آرون سیتھر جیکسن،آپریشنز لیڈ جنید شہاب،ٹیک ویلی کے سی ای او عمر فاروق،مارکیٹنگ اینڈ کمیونیکیشن لیڈ نشوا ابرار،آٹ ریچ اینڈ کوآرڈینیشن منیجر مدیحہ منگول شامل تھے جبکہ صوبائی وزیر تعلیم رانا سکندر حیات، چیف سیکرٹری زاہد اختر زمان اور دیگر حکام بھی اس موقع پر موجود تھے۔

:وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی نے کہا ہے کہ صرف پڑھی لکھی قوم ہی ملک کو بدل سکتی ہے اور اسے ترقی وخوشحالی کی راہ پر گامزن کر سکتی ہے۔ہفتہ کو یہاں ایچ ای سی کے ریجنل آفس میں سندھ میں تعلیمی اداروں کے کیمپسز کے قیام کے حوالے سے منعقدہ اجلاس کے بعد میڈیا سے گفتگو کرتے ہوئے انہوں نے کہا کہ ہمیں اس ایمرجنسی کو ابھرتے ہوئے پاکستان میں تبدیل کرنا ہے اور یہ صرف تعلیم کے ذریعے ہی ممکن ہے۔ڈاکٹر صدیقی نے کہا کہ وہ پاکستان کے ہر بچے،علاقے، گاؤں اور کچی آبادی کو خوشحالی کی منزل پر لے جانے کی کوشش کر رہے ہیں۔انہوں نے کہا کہ پاکستانی پاکستان کو ڈیجیٹل کر سکتے ہیں۔وفاقی وزیر نے کہا کہ پاکستان خود گوگل کے لیے اچھا موقع ہے۔ہمیں یہ موقع دنیا اور عمر رسیدہ اقوام کو دکھانا ہے، انہوں نے مزید کہا کہ جاپان، جرمنی اور روس میں پہلے ہی بحران پیدا ہو چکے ہیں اور وہاں آبادی کم ہو رہی ہے۔

ڈاکٹر خالد مقبول صدیقی نے کہا کہ پاکستانی نوجوانوں کو اس کے لیے استعمال کیا جا سکتا ہے۔پاکستان دنیا بھر میں آنے والے بحرانوں سے نمٹ سکتا ہے۔گوگل یہاں مواقع کی وجہ سے پاکستان پر توجہ دے رہا ہے۔انہوں نے مزید کہا کہ تعلیم کے لیے دو لاکھ طلباء کے حوالے سے ہواوے کے ساتھ معاہدہ بھی ہوا ہے۔ایک سوال کے جواب میں انہوں نے کہا کہ طلبہ یونینز کا معیار گر چکا ہے لیکن وہ اپنی اصل شکل میں اس بدلتے وقت میں اہم کردار ادا کر سکتی ہیں۔ایک سوال کے جواب میں انہوں نے کہا کہ یہ دور انفارمیشن کا نہیں بلکہ معلومات کی آلودگی کا ہے اور اس دور میں سچائی کا پتہ لگانا مشکل ہے۔ایک اور سوال کے جواب میں انہوں نے کہا کہ 18ویں ترمیم کا مقصد اقتدار کی منتقلی تھا لیکن یہ طاقت کا ذخیرہ ثابت ہوئی۔ایک سوال کے جواب میں انہوں نے کہا کہ تعلیم پر جی ایس ٹی کا معاملہ قومی اسمبلی میں اٹھایا جائے گا۔

شیئر کریں

متعلقہ خبریں