لاہور: نامور ریڈیولوجسٹ اور اولڈ راوین پروفیسر ڈاکٹر صفدر علی ملک کی جانب سے گورنمنٹ کالج یونیورسٹی لاہور کے اینڈوومنٹ فنڈ ٹرسٹ کو 10 لاکھ روپے کی رقم عطیہ۔ اس رقم سے ہر سال میرٹ پر ایک مستحق طالب علم کو اسکالرشپ دی جائے گی۔ یہ پروفیسر صفدر کی جانب سے عطیہ کی جانے والی ساتویں سکالرشپ ہے۔پروفیسر ڈاکٹر صفدر علی ملک نے 10 لاکھ روپے کا چیک وائس چانسلر پروفیسر ڈاکٹر محمد عمر چوہدری کو وائس چانسلر آفس میں ایک تقریب کے دوران پیش کیا۔ اس موقع پر پروفیسر ڈاکٹر خالد منظور بٹ اور یونیورسٹی آف بلتستان، اسکردو کے وائس چانسلر پروفیسر ڈاکٹر مسعود اختر بھی موجود تھے۔وائس چانسلر پروفیسر ڈاکٹر محمد عمر چوہدری نے عطیے پر پروفیسر ڈاکٹر صفدر علی ملک کا شکریہ ادا کرتے ہوئے ہدایت کی کہ اس رقم کو میرٹ اسکالرشپ میں تبدیل کیا جائے، تاکہ ہر سال ایک مستحق طالب علم کو تعلیمی معاونت فراہم کی جا سکے۔ انہوں نے کہا کہ ایک اسکالرشپ ایک طالب علم کی زندگی بدل دیتی ہے اور تعلیم کے ذریعے پورا خاندان بہتر مستقبل کی طرف بڑھتا ہے۔

ہائر ایجوکیشن کمیشن (HEC) کے ریسرچ اینڈ انوویشن ڈویژن کے تحت نیشنل ریسرچ پروگرام فار یونیورسٹیز (NRPU) نے کال 2025–26 کے لیے سخت اور شفاف بلائنڈ ریویو عمل کا پہلا مرحلہ کامیابی سے مکمل کر لیا ہے۔ایچ ای سی کو اس سال ملک بھر سے 6,926 تحقیقی تجاویز موصول ہوئیں، جو اب تک کی سب سے زیادہ تعداد ہے اور پاکستان میں تحقیقی سرگرمیوں میں غیر معمولی اضافہ ظاہر کرتی ہے۔

شفافیت، میرٹ اور علمی دیانت داری کو یقینی بنانے کے لیے ملک کی ممتاز جامعات سے تعلق رکھنے والے معروف ماہرینِ مضامین اور ریویورز کو اسلام آباد اور تمام علاقائی مراکز، بشمول پشاور، لاہور، کراچی اور کوئٹہ میں، نیز آن لائن پلیٹ فارمز کے ذریعے شامل کیا گیا۔ این آر پی یو ٹیم نے ہزاروں تحقیقی تجاویز کی جانچ کا مشکل مرحلہ منظم ٹیم ورک، سخت ضابطۂ کار کی پابندی اور ایچ ای سی کی اعلیٰ قیادت کی بھرپور معاونت سے مقررہ وقت میں مکمل کیا۔ایچ ای سی نے اس قومی ذمہ داری میں حصہ لینے والے تمام ریویورز کی خدمات کو سراہتے ہوئے ان کا شکریہ ادا کیا ہے، جبکہ دوسرے مرحلے کے لیے منتخب ہونے والے درخواست گزاروں کو مبارکباد دی ہے۔

ایچ ای سی کے مطابق تفصیلی تحقیقی تجویز جمع کرانے کی آخری تاریخ 6 فروری 2026 مقرر کی گئی ہے۔

پنجاب یونیورسٹی شعبہ امتحانات نے ایسوسی ایٹ ڈگری آرٹس، سائنس اور کامرس پارٹ ون اور پارٹ ٹوسالانہ امتحانات 2026 ء اور بی اے سماعت سے محروم افراد کے سالانہ امتحان 2026ء کے لیے آن لائن داخلہ فارم جمع کرانے کا شیڈول جاری کردیا۔ تفصیلات کے مطابق آن لائن داخلہ فارم سنگل فیس کے ساتھ 20 فروری 2026 ء تک جمع کرائے جاسکتے ہیں۔یہ شیڈول ریگولر امیدواروں، لیٹ کالج امیدواروں،پرائیویٹ امیدواروں اور ڈویژن میں بہتری کے لیے درخواست دینے والے امیدواروں پر لاگو ہوگا۔واضح رہے کہ پارٹ ون میں داخلے صرف ان امیدواروں کے لیے کھلے ہیں جن کے سپلی پیپرزہیں اورجن کے پاس امتحان میں شرکت کے لیے مواقع موجود ہیں، نئے امیدواروں کو پارٹ ون میں امتحان دینے کی اجازت نہیں ہوگی۔مزید برآں کوئی داخلہ فارم بذریعہ ڈاک یا دستی وصول نہیں کیا جائے گا اور تمام امیدواروں کو اپنے داخلہ فارم صرف آن لائن ہی جمع کرانا ہوں گے۔تفصیلات پنجاب یونیورسٹی کی ویب سائٹ www.pu.edu.pkپر دیکھی جاسکتی ہیں۔

الجزیرہ کی رپورٹ کے مطابق بھارت کے زیرِ انتظام کشمیر میں قائم شری ماتا ویشنو دیوی انسٹی ٹیوٹ آف میڈیکل ایکسی لینس کو دائیں بازو کی ہندو تنظیموں کے شدید احتجاج کے بعد بند کر دیا گیا ہے۔ احتجاج کی وجہ ادارے کے پہلے ایم بی بی ایس بیچ میں مسلم طلبہ کی واضح اکثریت بتائی جا رہی ہے۔

میڈیا رپورٹس کے مطابق 50 رکنی پہلے بیچ میں  42 مسلمان، 7 ہندو اور ایک سکھ طالب علم شامل تھا۔ داخلے کا یہ عمل بھارت بھر میں نافذ مرکزی داخلہ امتحان (NEET) کے ذریعے مکمل ہوا، جو مذہب سے بالاتر ایک مسابقتی نظام سمجھا جاتا ہے۔یہ ادارہ ایک ہندو مذہبی فلاحی ٹرسٹ کے تحت قائم کیا گیا تھا اور جزوی طور پر سرکاری فنڈز سے بھی مدد حاصل کرتا تھا۔ جس پر ہندو تنظیموں نے اعتراض کرتے ہوئے داخلوں کی منسوخی اور بعد ازاں کالج کی بندش کا مطالبہ کیا۔ مظاہرین کا کہنا تھا کہ چونکہ ادارہ ایک ہندو مذہبی ٹرسٹ سے منسلک ہے، اس لیے مسلمان طلبہ کو وہاں داخلہ نہیں ملنا چاہیے۔

صورتحال کے پیشِ نظر نیشنل میڈیکل کمیشن نے 6 جنوری کو کالج کی منظوری منسوخ کرتے ہوئے مؤقف اختیار کیا کہ ادارہ تدریسی عملے، مریضوں کی تعداد اور دیگر بنیادی سہولیات کے مطلوبہ معیار پر پورا نہیں اترتا۔

تاہم طلبہ، والدین اور ماہرین تعلیم نے اس فیصلے کو متنازع قرار دیتے ہوئے کہا ہے کہ یہ اقدام تعلیمی معیار کے بجائے مذہبی دباؤ کا نتیجہ ہے۔ سیاسی مبصرین نے بھی سوال اٹھایا ہے کہ اگر واقعی خامیاں موجود تھیں تو ادارے کو ابتدا میں منظوری کیوں دی گئی۔

کشمیر کے وزیر اعلیٰ عمر عبداللہ نے اعلان کیا ہے کہ متاثرہ طلبہ کو دیگر میڈیکل کالجز میں ایڈجسٹ کیا جائے گا تاکہ ان کی تعلیم متاثر نہ ہو۔ انہوں نے اس معاملے کو تعلیم کو مذہبی بنیادوں پر تقسیم کرنے کی خطرناک مثال قرار دیا۔

یہ واقعہ بھارت میں اقلیتوں کے حقوق، میرٹ پر مبنی نظامِ تعلیم اور تعلیمی اداروں کے سیاسی استعمال پر ایک بار پھر سنجیدہ سوالات کھڑے کر رہا ہے۔