وزیراعلی پنجاب مریم نواز کی سیلاب متاثرہ علاقوں کے طالب علموں کیلئے خصوصی پیکج کی منظوری……….سیلاب متاثرہ علاقوں کے تمام طلبا کی ایک سمسٹر کی فیس معاف کر دی گئی

– Advertisement –

لاہور۔24ستمبر (اے پی پی):وزیراعلیٰ پنجاب مریم نواز نے سیلاب متاثرہ علاقوں کے طالب علموں کیلئے خصوصی پیکج کی منظوری دے دی ہے۔ سیلاب متاثرہ علاقوں کے تمام طلبا کی ایک سمسٹر کی فیس معاف کر دی گئی۔ سیلاب متاثرہ اضلاع کے بی ایس فرسٹ ایئر کے طلبا کی داخلہ فیس بھی معاف کر دی گئی ہے۔سیلاب متاثرہ مظفرگڑھ، ملتان، لودھراں، وہاڑی، سیالکوٹ، نارووال، گجرات، چنیوٹ اور قصور کے طلبا کی سال اول کی فیس معاف کی گئی ہے۔ سیلاب متاثرہ ان اضلاع میں واقع تمام یونیورسٹیوں میں رجسٹریشن کی آخری تاریخ میں 20دن کی توسیع بھی کر دی گئی۔ہونہار سکالرشپ کیلئے درخواست دینے کی آخری تاریخ بھی ایک ماہ تک بڑھا دی گئی۔ مریم نوازنے سیلاب متاثرہ علاقوں کے طلبا کے والدین کی مالی مشکلات کم کرنے اور نوجوانوں کی سہولت کیلئے پیکج دیا ہے۔وزیراعلیٰ نے کہا کہ سیلاب کی تباہی کی وجہ سے اپنے بچوں اور بچیوں کی تعلیم متاثر نہیں ہونے دوں گی، پوری کوشش جاری ہے کہ سیلاب متاثرین کی پوری مدد یقینی ہو، جلد بحالی اور نقصانات کا ازالہ ہو۔