سعودی سفیر نواف بن سعید المالکی نے بین الاقوامی اسلامی یونیورسٹی، اسلام آباد (IIUI) کو عطیہ کی گئی بسوں کا افتتاح کردیا
اسلام آباد: پاکستان میں سعودی عرب کے سفیر نواف بن سعید المالکی نے ایک تقریب میں بین الاقوامی اسلامی یونیورسٹی، اسلام آباد (IIUI) کو سعودی حکومت کی جانب سے بطور تحفہ دی گئی چار بسوں کا افتتاح کیا۔ یہ تقریب یونیورسٹی کے نئے کیمپس میں منعقد ہوئی۔اس موقع پر خطاب کرتے ہوئے سفیر نے کہا کہ پاکستان اور سعودی عرب کے درمیان برادرانہ تعلقات مثالی ہیں اور انہیں دنیا بھر میں تسلیم کیا جاتا ہے۔ انہوں نے مزید کہا کہ سعودی عرب کے دل میں اسلامی یونیورسٹی کے لیے ایک خاص مقام ہے۔ سفیر نے یونیورسٹی کے صدر اور انتظامیہ کا ان کی مہمان نوازی پر شکریہ ادا کیا۔
اسلامی یونیورسٹی کے صدر، پروفیسر ڈاکٹر احمد سعد الاحمد نے سعودی حکومت کا اس فراخدلانہ تحفے پر شکریہ ادا کیا۔ انہوں نے کہا کہ اس طرح کی حمایت سے دوطرفہ تعلقات مزید مضبوط ہوتے ہیں اور یونیورسٹی میں طلباء اور عملے کو سہولیات فراہم کرنے میں مدد ملتی ہے۔اس سے قبل، سید حسن آفتاب، ڈائریکٹر سنٹرل ٹرانسپورٹ یونٹ (CTU) نے سفیر نواف بن سعید المالکی کو اسلامی یونیورسٹی کی ٹرانسپورٹ سہولیات کے بارے میں بریفنگ دی۔اس تقریب میں اسلامی یونیورسٹی کے وائس پریذیڈنٹ، سعودی فیکلٹی ممبران اور یونیورسٹی کے سینئر عہدیداران نے بھی شرکت کی۔یہ تقریب یونیورسٹی کی ترقی اور بالخصوص بہتر ٹرانسپورٹ سہولیات کے ذریعے طلباء کو سہولت فراہم کرنے میں دلچسپی کا بھی اظہار تھی۔
