اہم خبریں

اسلامیہ یونیورسٹی بہاول پور اور ندیم خان پیتھالوجی لیبارٹری کے مابین یونیورسٹی کمیونٹی کو میڈیکل ٹیسٹوں میں سہولیات فراہم کرنے کے لیے مفاہمتی یادداشت پر دستخط ہوئے۔  وائس چانسلر اسلامیہ یونیورسٹی بہاول پور پروفیسر ڈاکٹر محمد کامران اور ڈائریکٹر پیتھالوجی لیب ندیم خان نے دستخط کیے۔ اس موقع پر ڈاکٹر سفینہ صدیق ڈائریکٹر ویمن ہیلتھ کیئر سنٹر اینڈ میٹرنٹی ہوم نے کہا کہ مذکورہ لیب اسلامیہ یونیورسٹی بہاول پور کے ملازمین کو میڈیکل ٹیسٹ میں 50فیصد رعایت دے گی۔ اس کے علاوہ اسلامیہ یونیورسٹی بہاول پور کے گریجویٹس کو ٹریننگ اور انٹرنشپ بھی فراہم کرے گی۔ اس موقع پر ڈاکٹر سمینہ اعجاز، ڈاکٹر سجاد حسین، ڈاکٹر شہزاد احمد خالد ڈائریکٹر پبلک ریلیشنز  موجود تھے۔

ویمن ہیلتھ کیئر سنٹر اینڈ میٹرنٹی ہوم کے زیر اہتمام فری میڈیکل کیمپ کا افتتاح

بعدا زاں وائس چانسلر پروفیسر ڈاکٹر محمد کامران نے ویمن ہیلتھ کیئر سنٹر اینڈ میٹرنٹی ہوم کے زیر اہتمام فری میڈیکل کیمپ کا افتتاح کیا۔ اس موقع پر وائس چانسلر چولستان یونیورسٹی آف ویٹرنری اینڈ اینیمل سائنسز بہاول پور پروفیسر ڈاکٹر مظہر ایاز، پروفیسر ڈاکٹر روبینہ بھٹی ڈین فیکلٹی آف سوشل سائنسز، سابق ایم پی اے فوزیہ ایوب قریشی، سابق سینڈیکیٹ ممبر ڈاکٹر نذیر اظہر و نامور معالجین ڈاکٹر منیر اظہر،پروفیسر ڈاکٹر قاضی مسرور احمداور پروفیسر ڈاکٹر اظہر خان موجود تھے ۔

نیشنل یونیورسٹی آف سائنسز اینڈ ٹیکنالوجی (NUST) نے اسکول آف سول اینڈ انوائرنمنٹل انجینئرنگ (SCEE) – نیشنل انسٹیٹیوٹ آف انفراسٹرکچر انجینئرنگ (NICE) کے پی ایچ ڈی طالب علم جُنید شاہ خان کو اسٹوڈنٹ ایوارڈ 2024 اورنیشنل یونیورسٹی آف سائنسز اینڈ ٹیکنالوجی (NUST) نے اسکول آف ہیلتھ سائنسز کے فیکلٹی ممبر پروفیسر ڈاکٹر یاسر وحید کو Distinguished Scientists کیٹیگری کے تحت OBADA پرائز جیتنے پر دلی مبارکباد پیش کی ہے۔

جُنید شاہ خان کی تحقیق میں مقامی طور پر تیار کردہ انٹرلاکنگ کمپریسڈ ارتھ بلاک (ICEB) میسنری سسٹمز کی زیادہ سے زیادہ متوقع زلزلہ (Maximum Considered Earthquake – MCE) کی شدت کے تحت حفاظت اور مضبوطی کی توثیق کی گئی ہے۔ یہ تحقیق زلزلہ زدہ  علاقوں میں کم لاگت، ماحول دوست اور پائیدار رہائشی حل فراہم کرنے کی جانب ایک اہم پیش رفت قرار دی جا رہی ہے۔

ڈیپارٹمنٹ آف ڈیٹا سائنس، فیکلٹی آف کمپیوٹنگ، دی اسلامیہ یونیورسٹی بہاولپور کے زیرِ اہتمام ٹیک لانسر سمٹ 3.0 اور مشاعرہ کا انعقاد کیا گیا۔ اس تقریب کا مقصد طلبہ میں ٹیکنالوجی فری لانسنگ، مہارتوں کی ترقی اور پائیدار آمدنی کے مواقع سے متعلق آگاہی فراہم کرنا تھا۔تقریب سے خطاب کرتے ہوئے وائس چانسلر پروفیسر ڈاکٹر محمد کامران نے کہا کہ تعلیمی سرگرمیوں کو جدید مارکیٹ کی ضروریات سے ہم آہنگ کرنا وقت کی اہم ضرورت ہے۔ انہوں نے کہا کہ ٹیک لانسر جیسے اقدامات طلبہ کو عالمی فری لانس مارکیٹ کے لیے تیار کرنے، خود انحصاری کے فروغ اور قومی معیشت کے استحکام میں اہم کردار ادا کرتے ہیں۔

اس موقع پر ڈاکٹر محمد فہیم مشتاق (فوکل پرسن و ایسوسی ایٹ پروفیسر) اور ڈاکٹر محمد ذیشان جھنڈیر (چیئرمین، ڈیپارٹمنٹ آف ڈیٹا سائنس) نے کہا کہ پروگرام کا بنیادی مقصد طلبہ کو جدید ٹیکنالوجیز میں عملی مہارتیں فراہم کرنا ہے۔ ڈاکٹر دوست محمد خان، ڈین فیکلٹی آف کمپیوٹنگ، نے صنعت سے ہم آہنگ مہارتوں کی اہمیت پر زور دیتے ہوئے کہا کہ اس سے طلبہ کی پیشہ ورانہ صلاحیتوں میں نمایاں اضافہ ممکن ہے۔تقریب میں شریک معروف انڈسٹری ماہرین اور ٹیکنالوجی پروفیشنلز نے فری لانسنگ کے مستقبل پر روشنی ڈالی اور ڈیٹا سائنس، مصنوعی ذہانت، سافٹ ویئر ڈویلپمنٹ اور سائبر سیکیورٹی جیسے شعبوں میں موجود مواقع پر تفصیلی گفتگو کی۔ مقررین نے ان شعبوں کو پاکستان کی ڈیجیٹل معیشت، زرِ مبادلہ میں اضافے اور نوجوانوں کے لیے روزگار کے نئے مواقع پیدا کرنے کا مؤثر ذریعہ قرار دیا۔

 وزیر اعلیٰ بلوچستان میر سرفراز بگٹی نے کہا ہے کہ نوجوان پاکستان کا روشن مستقبل اور قوم کا اصل سرمایہ ہیں، جنہیں درست تاریخی حقائق اور قومی بیانیے سے آگاہ کرنا وقت کی اہم ترین ضرورت ہے وہ اٹھارویں بلوچستان نیشنل ورکشاپ کے شرکاءسے خطاب کر رہے تھے . وزیر اعلیٰ نے کہا کہ پاکستان ایک مضبوط اور ناقابلِ تسخیر ریاست ہے اور ہمیشہ قائم و دائم رہے گا ریاست کبھی تھکتی نہیں، پاکستان کو کیک کی طرح تقسیم کرنے کا خواب دیکھنے والے عناصر ہمیشہ ناکام ہوں گے انہوں نے نوجوانوں پر زور دیا کہ وہ بغیر تحقیق کسی بھی منفی بیانیے کی اندھی تقلید کے بجائے مثبت اور سچ پر مبنی سوچ اپنائیں میر سرفراز بگٹی نے کہا کہ وہ نوجوانوں کے سخت سے سخت سوالات کا جواب دلیل، مکالمے اور حقائق کی بنیاد پر دینے کے لیے تیار ہیں اور ہر تعلیمی ادارے، ہر جامعہ اور ہر قومی فورم پر نوجوانوں سے مکالمے کے لیے ہمہ وقت دستیاب ہیں .

انہوں نے بتایا کہ صوبے میں 3200 سے زائد بند اسکول دوبارہ فعال کر دیے گئے ہیں جبکہ متعدد پسماندہ علاقوں میں قیامِ پاکستان کے بعد پہلی بار بنیادی طبی سہولیات فراہم کی گئی ہیں انہوں نے کہا کہ بینظیر بھٹو اسکالرشپ پروگرام بلوچستان کی تاریخ کا سب سے بڑا تعلیمی اسکالرشپ منصوبہ ہے، جس کے تحت سویلین شہدائ کے بچوں، اقلیتوں اور خواجہ سرا افراد کو بھی اسکالرشپس دی جا رہی ہیں وزیر اعلیٰ نے کہا کہ بلوچستان کا ہر طالب علم سائنسی مضامین میں دنیا کی اعلیٰ جامعات سے تعلیم حاصل کر سکتا ہے اور دو سو سے زائد عالمی جامعات میں پی ایچ ڈی کے مواقع کے دروازے کھول دیے گئے ہیں .

لودھراں میں منعقدہ تقریب میں وزیرِ اعلیٰ پنجاب مریم نواز نے بطور مہمانِ خصوصی شرکت کی، جہاں ملتان اور بہاولپور ڈویژن کے طلبہ میں لیپ ٹاپس اور ہونہار اسکالرشپس تقسیم کی گئیں۔تقریب سے خطاب کرتے ہوئے وزیرِ اعلیٰ نے اعلان کیا کہ پنجاب میں 2026 کو ’’سالِ نوجوانانِ پنجاب‘‘ قرار دیا جا رہا ہے۔

ہونہار اسکالرشپ پروگرام کے تحت گزشتہ ڈیڑھ سال کے دوران 80 ہزار باصلاحیت طلبہ کو وظائف دیے جا چکے ہیں، جبکہ رواں سال ایک لاکھ لیپ ٹاپس طلبہ میں تقسیم کیے جا رہے ہیں۔ وزیرِ اعلیٰ نے کہا کہ حکومتِ پنجاب نوجوانوں کو ڈیجیٹل سہولیات، تعلیمی مساوات اور جدت پر مبنی تعلیم کے مواقع فراہم کرنے کے لیے پُرعزم ہے۔تقریب میں چیئرپرسن پنجاب ہائر ایجوکیشن کمیشن پروفیسر ڈاکٹر اقرار احمد خان (HI, SI) نے بھی شرکت کی۔

یونیورسٹی کالج آف آرٹ اینڈ ڈیزائن، اسلامیہ یونیورسٹی آف بہاولپور نے گھرواپسی، امید اور شفا کا سفرکے تھیم کے تحت ایک چیریٹی پروگرام کا اہتمام کیا۔ اس پروگرام کا مقصد پاکستان کی سیلاب سے متاثرہ کمیونٹیز کی اخلاقی اور مالی مدد کرنا تھا۔ اس پروگرام میں ایک ہفتے کی چیریٹیبل فیکلٹی آرٹ ایگزیبیشن، سیلاب ریلیف مہم، فنڈ ریزنگ کالز اور پاکستان کے سیلاب سے متاثرہ لوگوں کے لیے گھریلو ضروریات اور نقد رقم جمع کرنے کے لیے انٹرایکٹو آرٹ سرگرمیاں شامل تھیں۔ یونیورسٹی کالج آف آرٹ اینڈ ڈیزائن کے فیکلٹی ممبران نے فن پارے بنائے۔ یونیورسٹی کالج آف آرٹ اینڈ ڈیزائن کے طلباء نے ضروری اشیاء، جیسے کمبل، استری شدہ کپڑے، جوتے، ادویات، سینیٹری کی اشیاء، برتن، کھانے پینے کی اشیاء، اور نقد رقم عطیہ کی۔ ڈاکٹر فرحانہ الطاف قریشی نے پورے پروگرام کی نگرانی کی تاکہ یونیورسٹی کالج آف آرٹ اینڈ ڈیزائن کمیونٹیز کے لیے فن سے وابستگی کا اعادہ کیا جا سکے۔ وائس چانسلر پروفیسر ڈاکٹر محمد کامران  نے چیریٹیبل فیکلٹی آرٹ ایگزیبیشن، سیلاب ریلیف مہم، فنڈ ریزنگ کا افتتاح کیا۔ وائس چانسلر نے چیریٹیبل فیکلٹی آرٹ ایگزیبیشن کا دورہ کیا اور فیکلٹی ممبران سے سیلاب سے متعلقہ مسائل اور بحالی کے جذبے کو پھیلانے میں آرٹ کمیونٹی کے کردار کے بارے میں بات چیت کی۔ پرنسپل ڈاکٹرفرحانہ الطاف قریشی نے اسلامیہ یونیورسٹی بہاولپور کو تعلیم اور سماجی ترقی کے مرکز کے طور پر قائم کرنے پر پروفیسر ڈاکٹر محمد کامران کی قیادت اور وژن پر شکریہ ادا کیا۔ اس موقع پر پروفیسر ڈاکٹر سید عامر سہیل، ڈین، فیکلٹی آف آرٹس اینڈ لینگویجز، پروفیسر ڈاکٹر آصف نوید رانجھا، چیئرمین، شعبہ سوشل ورک، ڈاکٹر شیخ سفینہ صدیق، ڈائریکٹر وومن ہیلتھ کیئر سنٹر اور میٹرنٹی ہوم، سینئر میڈیکل آفیسر محمد علی،جنوبی پنجاب کے نامور مصور افضل جلوانہ اور آرٹس کونسل بہاولپور کے ڈائریکٹرز/سب ڈائریکٹرز، عنبر تنصیر، بہاولپور کی معروف سماجی کارکن ڈاکٹر مریم، سینئر فیکلٹی ممبرڈاکٹر مسرت، طلباو طالبات موجود تھے۔

ڈاکٹر فرحانہ الطاف قریشی نے یونیورسٹی کالج آف آرٹ اینڈ ڈیزائن کے فیکلٹی ممبران کے ساتھ مل کر یونیورسٹی کالج آف آرٹ اینڈ ڈیزائن کے لوگوں کی طرف سے جمع شدہ رقم کا ایک چیک، کپڑوں، کمبلوں، بیڈ کوروں اور گھریلو ضروریات کی ایک بڑی رقم پروفیسر ڈاکٹر آصف نوید رانجھا، چیئرمین شعبہ سوشل ورک کے حوالے کی۔ انہوں نے یونیورسٹی کالج آف آرٹ اینڈ ڈیزائن کی جانب سے سیلاب سے متعلق آگاہی مہم کے لیے 50 ہزار روپے کے عطیہ پر بہاولپور ڈی ایچ اے کی انتظامیہ کا شکریہ ادا کیا۔ فلڈ آگاہی مہم کی اختتامی تقریب میں، ڈاکٹر فرحانہ الطاف قریشی نے یونیورسٹی کالج آف آرٹ اینڈ ڈیزائن کی طالبات کی فلڈ مہم میں سرشار کاوشوں کو سراہا اور سیلاب 2025 کے مشکل وقت میں اسلامیہ یونیورسٹی آف بہاولپور کے لوگوں کی فلاحی سرگرمیوں کے بارے میں ان کی رہنمائی کی۔