اہم خبریں

بسلسلہ صد سالہ تقریبات اسلامیہ یونیورسٹی بہاولپور آئی یو بی قرأت اینڈ نعت سوسائٹی ڈائریکٹوریٹ  اسٹوڈنٹس افیئرز اسلامیہ یونیورسٹی بہاول پور کے زیر اہتمام پرائم منسٹر یوتھ ڈویلپمنٹ سنٹر بغداد الجدید کیمپس میں مقابلہ حسن قرأت و حسن نعت رسول مقبول ﷺکا انعقاد کیا گیا۔ ڈاکٹر عدنان بخاری ایڈیشنل ڈائریکٹر اسٹوڈنٹس افیئرز اور منصفین پروفیسر ڈاکٹر روزینہ انجم سابقہ چیئرپرسن شعبہ فارسی، ڈاکٹر آصف ندیم ایڈوائزر پرفارمنگ آرٹ سوسائٹی، ڈاکٹر سجیلہ کوثرچیئرپرسن ڈیپارٹمنٹ آف ورلڈ ریلیجن اینڈ انٹرفیتھ ہارمنی، ڈاکٹر حافظ محمد صدیق، ڈاکٹر محمد شاکرحسین ڈیپارٹمنٹ اسلامک سٹڈیز، ڈاکٹر حافظ ذیشان احمد عارفین اور ڈاکٹر حافظ ذیشان راشد ڈیپارٹمنٹ الیکٹریکل انجینئرنگ نے سرانجام دیئے۔ ڈاکٹر شبانہ نذر ایڈوائزر آئی یو بی قرأت ونعت سوسائٹی نے خصوصی شرکت پر اساتذہ کرام کا شکریہ ادا کیا اور طلباء وطالبات کی پرجوش شرکت کو سراہا۔

گورنمنٹ کالج یونیورسٹی لاہور میں ڈیزیز اویئرنیس اینڈ پریوینشن سوسائٹی کے زیرِ اہتمام کینسر آگاہی سیمینار کا انعقاد کیا گیا۔تقریب سے سینئر کلینیکل سائیکالوجسٹ شاکت خانم میموریل اسپتال نوشین قریشی اور ماہرِ امراضِ سرطان ڈاکٹر عثمان رشید نے خطاب کیا، جبکہ اس موقع پر چیئرمین شعبہ زولوجی پروفیسر ڈاکٹر محمد طاہر اور مشیرِ سوسائٹی ڈاکٹر نائلہ ملکانی بھی موجود تھیں۔

نوشین قریشی نے اپنے خطاب میں کہا کہ کینسر کے مریض اکثر خوف، اضطراب اور ذہنی دباؤ کا شکار ہو جاتے ہیں، اس لیے ان کی بحالی کے لیے نفسیاتی مدد، خاندانی تعاون اور سماجی شمولیت نہایت ضروری ہے۔ڈاکٹر عثمان رشید نے کہا کہ بروقت تشخیص کے لیے ریگولر چیک اپ اور خود معائنہ انتہائی اہم ہے تاکہ مرض کو ابتدائی مرحلے میں ہی روکا جا سکے۔سیمینار کے اختتام پر طلبات نے خالی کرسی کے عنوان سے ایک علامتی ڈرامہ پیش کیا، جس میں معاشرے میں کینسر کے مریضوں کے حوالے سے پائی جانے والی لاعلمی، خاموشی اور غفلت کو مؤثر انداز میں اجاگر کیا گیا

 وائس چانسلر پنجاب یونیورسٹی پروفیسر ڈاکٹر محمد علی نے کہا ہے کہ ماں کا دودھ بچوں کی ذہنی و جسمانی صحت کے لئے بہت مفید ہے جس کا احساس دلانے کیلئے آگاہی پیدا کرنا ہوگی۔وہ پنجاب یونیورسٹی شعبہ پبلک ہیلتھ کے زیر اہتمام یونیسف کے اشتراک سے ’ماں کے دودھ کی اہمیت‘پرالرازی ہال میں منعقدہ آگاہی سیمینار سے خطاب کررہے تھے۔ اس موقع پر انچارج شعبہ پبلک ہیلتھ ڈاکٹر نعمان علی،پروفیسرڈاکٹر روبینہ ذاکر،ڈین فیکلٹی آف فوڈ سائنس اینڈ نیوٹریشن، بہاؤالدین ذکریا ملتان پروفیسر ڈاکٹر محمد ریاض،یونیسف سے اسماء مسعود، نعمان غنی،فیکلٹی ممبران اور طلباوطالبات نے بڑی تعداد میں شرکت کی۔اپنے خطاب میں وائس چانسلرپروفیسر ڈاکٹر محمد علی نے کہا کہ بچے کی پیدائش کے بعد والدین بغیر لالچ کے اس کی صحت کوبرقرار رکھنے کیلئے اپنا کردار ادا کرتے ہیں۔ انہو ں نے کہا کہ ماں کے دودھ پلانے کے حوالے سے قرآنی احکامات بہت واضح ہیں، جس پر عمل کرنالازم ہے۔انہوں نے کہا کہ قرآن کے ہر لفظ میں حکمت ہے اور بچے کی صحت کا براہ راست تعلق بریسٹ فیڈنگ سے ہے۔انہوں نے کہا کہ ماں کا دودھ صحت کے حصول کاقدرتی فارمولہ ہے جبکہ فارمولہ دودھ سے بچناچاہیے۔ انہوں نے بہترین سیمینار پر منتظمین کی کاوشوں کو سراہتے ہوئے امید ظاہر کی کہ شعبہ پبلک ہیلتھ کے طلباء اس حوالے سے معاشرے کو آگاہی فراہم کرنے میں اپنی ذمہ داری نبھائیں گے۔ ڈاکٹر نعمان علی نے کہا کہ بریسٹ فیڈنگ زچہ و بچہ کی صحت کے لئے ضروری ہے۔ انہوں نے کہا کہ بچے کی بہترین نشوونما کا آغاز ماں کے دودھ سے ہوتا ہے۔ انہوں نے کہا بریسٹ فیڈنگ بچے میں بیماریوں سے لڑنے کی طاقت پیدا کرتی ہے۔ انہوں نے کہا کہ خواتین کو بریسٹ فیڈنگ بارے تعلیم دینا ہوگی تاکہ ہربچے کو اس کا حق مل سکے۔ ڈاکٹر روبینہ ذاکرنے کہا کہ بچوں کو ماں کا دودھ نہ پلانا آئندہ نسل کیلئے نقصان دہ ثابت ہوگا۔ انہوں نے کہا ماں کا دودھ بچوں میں محبت کے جذبات پیدا کرنے کیلئے بھی ضروری ہے۔ انہوں نے کہا کہ بچے کی صحت بخش زندگی کے لئے ماں کو پیدائش کے ایک گھنٹہ کے اندر اپنا دودھ پلانا چاہیے۔سیمینار سے اسماء مسعود،نعمان غنی اورڈاکٹر محمد ریاض نے بھی اظہار خیال کیا۔

یونیورسٹی آف انجینئرنگ اینڈ ٹیکنالوجی (یو ای ٹی) لاہور میں ایلومنائی ہاؤس کی تزئین و آرائش اور بحالی کے منصوبے کا افتتاح وائس چانسلر پروفیسر ڈاکٹر شاہد منیر نے کیا۔یہ منصوبہ ہائر ایجوکیشن کمیشن (HEC) کے تعاون سے شروع کیا گیا ہے۔ جس پر 8.6 ملین روپے لاگت آئے گی اور تین ماہ میں مکمل کیا جائے گا۔ منصوبے کے تحت ایلومنائی ہاؤس کی جدید خطوط پر تزئین و آرائش، عمارت کی بحالی اور سہولیات میں بہتری شامل ہے۔

اس موقع پر وائس چانسلر پروفیسر ڈاکٹر شاہد منیر نے کہا کہ یونیورسٹی کے انفراسٹرکچر کی بہتری ادارے کے تعلیمی ماحول کو مزید موثر بنائے گی اور طلبہ، اساتذہ و سابق طلبہ کے لیے بہتر سہولیات فراہم کرے گی۔ انہوں نے کہا کہ یو ای ٹی اپنے تمام کیمپسز میں ترقیاتی منصوبوں کو جدید تقاضوں کے مطابق تیزی سے مکمل کر رہی ہے۔

:پنجاب یونیورسٹی شعبہ پلانٹ بریڈنگ اینڈ جینیٹکس کے زیر اہتمام چین کے معروف تحقیقی و زرعی اداروں کے ایک اعلیٰ سطحی وفد کے ساتھ اہم اجلاس منعقد ہوا جس کی صدارت چیئرمین پروفیسر ڈاکٹر محمد اشفاق نے ڈاکٹر محمد علی کلاسراکے ہمراہ کی جبکہ مختلف چینی تحقیقی و زرعی اداروں سے مسٹر شو اور مسٹر جیا بھی موجود تھے۔اجلاس میں زرعی سائنس اور ٹیکنالوجی کے شعبے میں اسٹریٹجک تعاون پر گفتگو کی گئی، جس میں موسمیاتی تبدیلیوں کے مقابلے کی صلاحیت رکھنے والی فصلوں کی اقسام کی تیاری اور غذائی تحفظ کو یقینی بنانے پر زور دیا گیا۔ شرکاء نے پاکستان اور چین میں پائیدار زراعت کے فروغ کے لیے موسمیاتی اثرات برداشت کرنے والی فصلوں کی منتقلی اور مشترکہ ترقی کے طریقہ کار پر تبادلہ خیال کیا۔اجلاس میں فصلوں کی بہتری سے متعلق مشترکہ سائنسی تحقیق بالخصوص جدید بریڈنگ ٹیکنالوجی کے ذریعے ہونگ لیان طرز کی ہائبرڈ چاول کی اقسام میں بہتری لانے پر بھی غور کیا گیا۔ دونوں ممالک کے درمیان زرعی تعلقات کو جدت اور مشترکہ ترقیاتی اہداف کے ذریعے مضبوط بنانے پر اتفاق کیا گیا۔دونوں ادارے سی پیک اور بیلٹ اینڈ روڈ انیشی ایٹو کے تحت ٹیکنالوجی کے تبادلے کو فروغ دیں گے۔اس کے علاوہ اداروں کے درمیان باہمی تعاون کے باضابطہ معاہدوں کو حتمی شکل دینے کے ساتھ ساتھ طلبہ و اساتذہ کے لیے علمی تبادلے کے پروگرامز کے قیام پر بھی اتفاق کیا گیا تاکہ سیکھنے اور استعداد کار میں اضافہ ہو سکے۔ڈاکٹر محمد اشفاق نے چینی وفد کے عزم اور آئندہ تعاون کے جذبے پر ان کا شکریہ ادا کرتے ہوئے کہا کہ یہ ملاقات زراعت میں بہترین کارکردگی کے مشترکہ ہدف کی جانب ایک امید افزا باب کی حیثیت رکھتی ہے۔

پنجاب یونیورسٹی کالج آف آرٹ اینڈ ڈیزائن کے شعبہ گرافک ڈیزائن کے زیر اہتمام ’سونک نیریٹیوز:ساؤنڈ ڈیزائن اینڈ سکورنگ فار فلم اینڈ ڈیجیٹل میڈیا‘ کے موضوع پر سیمینار

 پنجاب یونیورسٹی کالج آف آرٹ اینڈ ڈیزائن کے شعبہ گرافک ڈیزائن کے زیر اہتمام ’سونک نیریٹیوز:ساؤنڈ ڈیزائن اینڈ سکورنگ فار فلم اینڈ ڈیجیٹل میڈیا‘ کے موضوع پر سیمینارعلامہ اقبال کیمپس(اولڈ کیمپس)میں منعقد ہواجس میں چیئرمین پروفیسر ڈاکٹر بلال احمد، برطانیہ سے تعلق رکھنے والے میوزک پروڈیوسر اور ساؤنڈ ڈیزائنر روحیل جاوید، فیکلٹی ممبران، آرٹسٹس کے علاوہ نیشنل کالج آف آرٹس اور گورنمنٹ کالج آف ہوم اکنامکس سے بھی طلباؤطالبات نے بڑی تعداد میں شرکت کی۔ روحیل جاوید جو کہ فلم، اشتہارات، موسیقی اور ڈیجیٹل ساؤنڈ ڈیزائن کے میدان میں اپنے تخلیقی کام کے حوالے سے شہرت کے حامل ہیں،نے فلم اور ڈیجیٹل میڈیا میں ساؤنڈ ڈیزائن کے جدید رجحانات اور چیلنجز پر روشنی ڈالی۔ انہوں نے ساؤنڈ ڈیزائن کی چھ تہوں کی وضاحت اشتہاری مہمات کی مثالوں کے ساتھ پیش کی۔ ان کا کہنا تھا کہ ایک اچھا ساؤنڈ ڈیزائن نہ صرف جذبات کو ابھارتا ہے بلکہ کسی بھی میڈیا مہم کی کامیابی کو یقینی بناتا ہے۔اپنے خطاب میں ڈاکٹر بلال احمد نے کہا کہ یہ سیمینار صنعت اور اکیڈمیا کے درمیان مضبوط تعلقات کے فروغ کے سلسلے کی ایک کڑی ہے۔ انہوں نے سیمینار کی منتظم ڈاکٹر سیدہ عروج زہرہ رضوی کی کوششوں کو سراہا اور کہا کہ ایسے پروگرام طلبہ کو پیشہ ورانہ تخلیقی عمل کے لیے تیار کرتے ہیں۔ڈاکٹر عروج زہرہ رضوی نے کہا کہ یہ گفتگو بصری ابلاغ اور ساؤنڈسٹڈیز کے شعبے میں ایک اہم علمی مباحثے کی ابتدا ہے جس نے شرکاء کو ڈیزائن پر مبنی کہانیوں میں آواز کے بیانی اثرات کو سمجھنے کی نئی جہتوں کی کھوج کے لیے متاثر کیا۔

اسلامیہ یونیورسٹی بہاول پور اور قرشی فاؤنڈیشن کے درمیان مفاہمتی یادداشت پر دستخط ہوئے۔ مفاہمتی یادداشت پر وائس چانسلر اسلامیہ یونیورسٹی بہاول پور پروفیسر ڈاکٹر محمد کامران اور عدیل سعید میر چیف ایگزیکٹو آفیسر قرشی فاؤنڈیشن ٹرسٹ نے دستخط کیے۔ معاہدے کے تحت قرشی فاؤنڈیشن اسلامیہ یونیورسٹی بہاول پور کے طلباءوطالبات اور کمیونٹی کےلیے فلاحی اقدامات کرے گی۔ قرشی فاؤنڈیشن اسلامیہ یونیورسٹی بہاول پور میں قرشی کلینک آف نیچرل میڈیسن قائم کرے گی۔ قرشی فاؤنڈیشن اس مقصد کے لیے کوالیفائیڈ اور تربیت یافتہ عملہ فراہم کرے گی۔ قرشی فاؤنڈیشن ڈرگ ریگولیٹری اتھارٹی پاکستان سے منظور شدہ قدرتی ادویات مفت فراہم کرے گی۔ اسی طرح قرشی فاؤنڈیشن اسلامیہ یونیورسٹی بہاول پور کی کمیونٹی کے لیے مفت طبی مشاورت تشخیص اور ادویات فراہم کرے گی۔ اس موقع پر پروفیسر ڈاکٹر جواد اقبال ڈین فیکلٹی آف مینجمنٹ سائنس اینڈ کامرس، محمد شجیع الرحمن رجسٹرار، ڈاکٹر محمد عثمان چیمہ چیف میڈیکل آفیسر،  ڈاکٹر شہزاد احمد خالد ڈائریکٹر پبلک ریلیشنز، ڈاکٹر شیخ سفینہ صدیق، ڈائریکٹر وومن ہیلتھ کیئر سنٹر اینڈ میٹرنٹی ہوم اور سٹاف ممبران موجود تھے۔

#IUB#ILMIATONLINE

دبئی (نامہ نگار) — پاکستان کے قونصل جنرل برائے دبئی محترم حسین محمد نے سپیریئر یونیورسٹی راک (RAK) کیمپس کے فریش مین پروگرام کی گریجویشن تقریب میں مہمانِ خصوصی کے طور پر شرکت کی۔تقریب سے خطاب کرتے ہوئے حسین محمد نے کہا کہ تعلیم نوجوان نسل کو ہنر، اعتماد، اور تخلیقی صلاحیتوں سے آراستہ کرتی ہے، جو مستقبل میں جدت، ترقی، اور مثبت تبدیلی کے لیے ناگزیر ہیں۔ انہوں نے سپیریئر یونیورسٹی کی اس کاوش کو سراہا جو ایک ایسا علمی ماحول فراہم کر رہی ہے جہاں نصابی مہارت کے ساتھ ذاتی اور پیشہ ورانہ نشوونما کو بھی فروغ دیا جا رہا ہے۔

قونصل جنرل نے متحدہ عرب امارات کی قیادت کی طرف سے پاکستانی کمیونٹی کے تعلیمی منصوبوں اور مواقع کے لیے تعاون پر بھی گہری مسرت کا اظہار کیا۔ انہوں نے کہا کہ تعلیم اور ثقافتی تبادلے کے ذریعے پاکستان اور متحدہ عرب امارات کے درمیان برادرانہ تعلقات مزید مضبوط ہوں گے۔تقریب کے اختتام پر محترم حسین محمد نے فارغ التحصیل طلبہ میں سرٹیفیکیٹس تقسیم کیے اور ان کی کامیابیوں پر نیک خواہشات کا اظہار کیا۔

اسلام آباد (نمائندہ خصوصی) — بین الاقوامی اسلامی یونیورسٹی اسلام آباد (IIUI) اور نیشنل ریڈیو اینڈ ٹیلی کمیونی کیشن کارپوریشن (NRTC) ہری پور کے درمیان تحقیقی، اختراعی اور صنعتی و تعلیمی تعاون کے فروغ کے لیے ایک مفاہمتی یادداشت (MoU) پر دستخط کیے گئے۔یادداشت پر دستخط صدر IIUI پروفیسر ڈاکٹر احمد سعد الاحمد نے یونیورسٹی کی جانب سے، جبکہ بریگیڈیئر (ر) عمر عبدالرشید، ڈپٹی منیجنگ ڈائریکٹر، نے این آر ٹی سی کی جانب سے کیے۔این آر ٹی سی کے وفد میں بریگیڈیئر (ر) عمر عبدالرشید، ڈپٹی منیجنگ ڈائریکٹر، مسٹر شکیل احمد (جی ایم ریسرچ اینڈ ڈیویلپمنٹ)، مسٹر عمار رشاد (ہیڈ آف ایکسپورٹ)، ایئر وائس مارشل (ر) اسد اکرام (کنسلٹنٹ آر اینڈ ڈی) اور کرنل (ر) ثناءاللہ (چیف کوآرڈینیشن آفیسر) شامل تھے۔

تقریب میں IIUI کے ڈائریکٹر ORIC ڈاکٹر محمد عامر، ڈاکٹر محمد سقلین (انچارج لنکیجز آفس) اور دیگر متعلقہ عہدیداران نے بھی شرکت کی۔مفاہمتی یادداشت کے تحت دونوں ادارے تحقیق و مشاورت پر مبنی منصوبوں، مشترکہ انٹلیکچوئل پراپرٹی مینجمنٹ، اور IIUI کے طلبہ کے لیے انٹرن شپ و روزگار کے مواقع فراہم کرنے پر اتفاق کیا گیا۔ معاہدے میں اساتذہ کے لیے صنعتی تربیت، مشترکہ تحقیقی کانفرنسوں اور اعلیٰ ٹیکنالوجی کے منصوبوں کے لیے پروپوزلز جمع کروانے جیسے اقدامات بھی شامل ہیں۔

اسلام آباد (نمائندہ خصوصی) — بین الاقوامی اسلامی یونیورسٹی اسلام آباد (IIUI) کے صدر پروفیسر ڈاکٹر احمد سعد الاحمد نے سیکرٹری تعلیم و قائم مقام چیئرمین ہائر ایجوکیشن کمیشن (HEC) ندیم محبوب سے ملاقات کی۔ اس موقع پر یونیورسٹی کے وائس پریزیڈنٹ (ریسرچ اینڈ انٹرپرائز) پروفیسر ڈاکٹر احمد شجاع سید اور ڈائریکٹر (STBS & BIC) احسن مرزا بھی ان کے ہمراہ موجود تھے۔ملاقات خوشگوار اور تعمیری ماحول میں ہوئی جس میں باہمی تعاون کے امکانات اور اسلامی یونیورسٹی کے جاری منصوبوں پر تفصیلی گفتگو کی گئی۔ صدر IIUI نے قائم مقام چیئرمین ایچ ای سی کو یونیورسٹی میں جاری ترقیاتی اقدامات، تحقیقی منصوبوں اور ادارہ جاتی مضبوطی کے لیے اپنی قیادت میں کیے گئے حکمتِ عملی اقدامات سے آگاہ کیا۔

وائس پریزیڈنٹ (ریسرچ اینڈ انٹرپرائز) پروفیسر ڈاکٹر احمد شجاع سید نے یونیورسٹی کے جاری پروگرامز، ترجیحی تحقیقی شعبوں اور ادارے کی نمایاں خصوصیات پر روشنی ڈالی۔ انہوں نے اسلامی ترقیاتی بینک (IsDB) کے تعاون سے چلنے والے وقف پراپرٹیز انویسٹمنٹ پراجیکٹ کی پیشرفت اور آئندہ اہداف سے بھی آگاہ کیا۔ندیم محبوب نے اس منصوبے میں گہری دلچسپی کا اظہار کرتے ہوئے یونیورسٹی کو ایچ ای سی کی بھرپور معاونت کی یقین دہانی کرائی۔ صدر IIUI پروفیسر ڈاکٹر احمد سعد الاحمد نے اس موقع پر سعودی عرب میں اعلیٰ تعلیم کے بدلتے ہوئے منظرنامے اور تعاون و اختراع کے نئے مواقع پر بھی گفتگو کی۔سیکرٹری تعلیم و قائم مقام چیئرمین ایچ ای سی ندیم محبوب نے اسلامی یونیورسٹی کی پیش رفت کو سراہا اور کہا کہ ادارہ صدر IIUI کی قیادت میں مزید ترقی کرے گا۔ انہوں نے وزارت تعلیم اور ایچ ای سی کی جانب سے تمام متعلقہ امور میں مکمل تعاون کی یقین دہانی کرائی۔