لاہور: ہائر ایجوکیشن کمیشن (HEC) نے امریکی محکمہ خارجہ کے میرٹ اینڈ نیڈز بیسڈ اسکالرشپ پروگرام (MNBSP) کے تحت 2025 کو لاہور کالج فار ویمن یونیورسٹی میں “Pathways to Career Counselling and Practical Guide to Soft Skills” کے عنوان سے دو روزہ ورکشاپ کا انعقاد کیا۔اس ورکشاپ میں پاکستان کے سیلاب سے متاثرہ علاقوں کے اسکالرشپ یافتہ طلبہ کو ڈیجیٹل لٹریسی، انٹرپرینیورشپ، نیٹ ورکنگ، کمیونیکیشن اور کیریئر ریڈینس جیسی بنیادی مہارتوں سے آراستہ کیا گیا۔

افتتاحی اجلاس سے خطاب کرتے ہوئے ایچ ای سی کے ایڈوائزر اسکالرشپس محمد رضا چوہان نے کہا کہ پاکستان کے نوجوان قومی چیلنجز کے حل میں کلیدی کردار ادا کرسکتے ہیں اور انہیں بین الاقوامی اسکالرشپس کے مواقع سے بھرپور فائدہ اٹھانا چاہیے۔وائس چانسلر پروفیسر ڈاکٹر عظمیٰ قریشی نے اس اقدام پر ایچ ای سی کی تعریف کی اور طلبہ کو اس موقع سے بھرپور استفادہ کرنے کی تلقین کی۔

ورکشاپ کے اختتامی سیشن میں شرکاء کو اسناد تقسیم کی گئیں۔ طلبہ نے ورکشاپ کو انتہائی مفید قرار دیتے ہوئے کہا کہ اس سے انہیں ایڈاپٹ ایبلٹی، ٹیم ورک اور ایموشنل انٹیلیجنس جیسی جدید سافٹ اسکلز کی اہمیت کو سمجھنے اور اپنی پیشہ ورانہ زندگی کے لیے بہتر تیاری کرنے کا موقع ملا۔

MDCAT 2025………پاکستان میڈیکل اینڈ ڈینٹل کونسل (PMDC) نے پنجاب اور سندھ میں شدید سیلاب کے باعث میڈیکل اینڈ ڈینٹل کالج ایڈمیشن ٹیسٹ (MDCAT) 2025 کی تاریخ باضابطہ طور پر تبدیل کر دی ہے۔ ۔

پہلے امتحان کی تاریخ 5 اکتوبر مقرر تھی، تاہم اب اسے 26 اکتوبر 2025 (اتوار) تک مؤخر کر دیا گیا ہے۔ یہ فیصلہ تمام صوبوں، آزاد جموں و کشمیر اور گلگت بلتستان کے تعلیمی نمائندوں سے مشاورت کے بعد کیا گیا۔وفاقی وزیر صحت سید مصطفیٰ کمال نے کہا کہ یہ توسیع ایک اہم اقدام ہے تاکہ وہ تمام طلبہ بھی امتحان میں شریک ہو سکیں جو سیلاب سے متاثرہ علاقوں میں رہنے کی وجہ سے پہلے شامل نہیں ہو پا رہے تھے۔

MDCAT 2025: اہم اصلاحات اور نیا ڈھانچہ

پی ایم ڈی سی نے اس سال کے داخلہ امتحانات کے نظام میں بڑی تبدیلیاں متعارف کروائی ہیں۔ MDCAT 2025 کے لیے ایک ڈیجیٹل سوالیہ بینک تشکیل دیا گیا ہے تاکہ امتحانات زیادہ شفاف اور جدید ٹیکنالوجی کے مطابق ہوں۔پی ایم ڈی سی کے صدر پروفیسر ڈاکٹر رضوان تاج نے کہا کہ طلبہ کی رجسٹریشن اور نگرانی کونسل کے ذمے ہوگی، جبکہ سوالات کی تیاری، امتحان کے انعقاد اور نتائج کی جانچ سرکاری جامعات کریں گی۔ ذمہ داریوں کی یہ تقسیم پورے ملک میں شفافیت اور مساوات کو یقینی بنانے کے لیے کی گئی ہے۔نیا سوالیہ بینک ایک ایسے نصاب پر مبنی ہے جس پر تمام صوبے متفق ہیں، تاکہ ہر امیدوار کو یکساں مواقع اور تیاری کے مساوی مواقع مل سکیں۔

MDCAT 2025: امتحانی تفصیلات

• اہلیت کے لیے کم از کم 65 فیصد نمبر ایف۔ایس۔سی (پری میڈیکل) یا مساوی امتحان میں درکار ہوں گے۔
• طلبہ کو اپنے ڈومیسائل کے علاقے میں امتحان دینا ہوگا۔ تاہم بیرونِ ملک مقیم طلبہ کے لیے ریاض (سعودی عرب) میں بھی سینٹر قائم کیا گیا ہے۔
• امتحان میں 180 ایم سی کیو سوالات ہوں گے (پہلے 200 تھے) اور وقت 3 گھنٹے ہوگا۔

MDCAT 2025: نصاب

• بائیولوجی: سیل بایولوجی، جینیٹکس، فزیالوجی، ایکالوجی اور انسانی نظام۔
• کیمسٹری: اسٹوکیومیٹری، پیریاوڈک ٹرینڈز، آرگینک ری ایکشنز اور تھرموڈائنامکس۔
• فزکس: حرکت، توانائی، بجلی، الیکٹرو میگنیٹزم اور جدید طبیعیات۔
• انگلش: الفاظ کا ذخیرہ، گرامر اور فہم۔
• لاوجیکل ریزننگ: پیٹرن پہچاننا، دلائل اخذ کرنا اور مسئلہ حل کرنے کی تکنیکیں۔

اب تک 97,000 سے زائد طلبہ MDCAT 2025 کے لیے رجسٹرڈ ہو چکے ہیں، اور یہ تعداد آخری تاریخ تک بڑھ کر 1,50,000 تک پہنچنے کا امکان ہے۔ امتحان ملک بھر میں 30 مقررہ مراکز میں منعقد ہوگا۔

گوادر، ۔ جی ڈی اے ہائر سیکنڈری اسکول میں آج یومِ دفاع پاکستان کی مناسبت سے ایک شاندار اور پروقار تقریب کا انعقاد کیا گیا، جس کے مہمانِ خصوصی ڈائریکٹر جنرل گوادر ڈویلپمنٹ اتھارٹی معین الرحمٰن خان تھے۔تقریب کا آغاز تلاوتِ قرآنِ پاک اور قومی ترانے سے ہوا، جس کے بعد طلبہ و طالبات نے اسی دن کے مناسبت سے ملی نغمے، تقاریر اور خوبصورت ٹیبلو پیش کیے۔ ان پیشکشوں نے حاضرین کو وطن سے محبت کے جذبات سے سرشار کر دیا اور شہداء پاکستان کی عظمت کو اجاگر کیا۔تقریب میں نمایاں تعلیمی کارکردگی، ہم نصابی سرگرمیوں اور مثالی نظم و ضبط کا مظاہرہ کرنے والے طلبہ، اساتذہ اور دیگر عملے کو انعامات اور تعریفی اسناد بھی دی گئیں۔مہمانِ خصوصی ڈائریکٹر جنرل جی ڈی اے نے اپنے خطاب میں کہا یومِ دفاع ہمیں یہ سبق دیتا ہے کہ وطن کا تحفظ صرف افواج پاکستان کی نہیں بلکہ ہر پاکستانی کی ذمہ داری ہے۔ نوجوان نسل کو چاہیے کہ وہ تعلیم، محنت اور قومی خدمت کے جذبے کو اپنا شعار بنائے، کیونکہ آج کے یہ طلبہ کل کے پاکستان کے معمار ہیں۔انہوں نے مزید کہا کہ جی ڈی اے ہائر سیکنڈری اسکول کو جدید تعلیمی سہولیات سے آراستہ کیا جا رہا ہے۔ تعلیمی معیار، نظم و ضبط اور انفراسٹرکچر میں بہتری کے لیے جی ڈی اے ہر ممکن تعاون فراہم کرے گی تاکہ یہ ادارہ مستقبل کے قابل اور باصلاحیت طلبہ پیدا کر سکے۔تقریب میں پرنسپل راجہ امتیازنے خطاب کرتے ہوئے طلبہ کی شاندار کارکردگی کو سراہا اور یوم دفاع سے متعلق طلبہ و طالبات کو آگاہی فراہم کی۔

جامعہ بلوچستان کا 95 واں اکیڈمک کونسل اجلاس سینیڈیکیٹ ہال میں منعقد ہوا۔ اجلاس کی صدارت وائس چانسلر پروفیسر ڈاکٹر ظہور احمد باذئی نے کی، جبکہ پرو وائس چانسلر پروفیسر ڈاکٹر غلام رزاق شاہوانی، ایڈیشنل سیکریٹری کالجز، ہائر اینڈ ٹیکنیکل ایجوکیشن حکومت بلوچستان جناب جہانزیب مندوخیل، رجسٹرار محمد طارق جوگیزئی، پرنسپل یونیورسٹی لا کالج ڈاکٹر عسمت اللہ، ڈینز، ڈائریکٹرز، شعبہ جات کے سربراہان، کنٹرولر امتحانات اور اکیڈمک کونسل کے دیگر ممبران شریک ہوئے۔

وائس چانسلر ڈاکٹر ظہور احمد باذئی نے اجلاس سے خطاب کرتے ہوئے تین نکات پر زور دیا: اچھی طرزِ حکمرانی، فیصلوں پر مؤثر عملدرآمد، اورتدریسی و انتظامی بہتری۔ انہوں نے کہا کہ جامعہ کی تعلیمی ترقی کے لیے شفافیت، مشاورت اور نتیجہ خیز اقدامات ناگزیر ہیں۔ انہوں نے تمام شعبہ جات پر زور دیا کہ وہ طلبہ کی فلاح، معیاری تعلیم، اور بروقت ڈگری کی تکمیل کو یقینی بنانے کے لیے باہمی تعاون اور ہم آہنگی کے ساتھ کام کریں۔اجلاس میں اہم تعلیمی و انتظامی امور زیر غور آئے، جن میں کورسز میں ترامیم، شعبہ جاتی کارکردگی، طلبہ کے مسائل، داخلہ پالیسی، امتحانات، اسکالرز کے کیسز اور شعبہ AI کے کورسز کی منظوری شامل تھی۔ اراکین نے مختلف تجاویز پیش کیں اور متعدد نکات پر اتفاقِ رائے سے فیصلے کیے.

 پنجاب یونیورسٹی اوریونیورسٹی آف ہوم اکنامکس کے درمیان تعلیمی تعاون کا معاہدہ طے پاگیا۔ معاہدے کی رو سے پنجاب یونیورسٹی ہوم اکنامکس یونیورسٹی لاہور کو اپنے وسائل تک رسائی فراہم کرے گی۔اس سلسلے میں مفاہمتی یاداشت پر دستخط کی تقریب وائس چانسلر پنجاب یونیورسٹی آفس کے کمیٹی روم میں منعقد ہوئی۔تقریب میں وائس چانسلر پنجاب یونیورسٹی پروفیسر ڈاکٹر محمد علی اوروائس چانسلر ہوم اکنامکس یونیورسٹی پروفیسر ڈاکٹر زیب النساء حسین نے دستاویزات پر دستخط کیے۔ اس موقع پر پنجاب یونیورسٹی کی ڈائریکٹر ایکسٹرنل لنکجز پروفیسر ڈاکٹر یامینہ سلمان،ڈائریکٹر اورک یونیورسٹی آف ہوم اکنامکس ڈاکٹر ارم رباب و دیگرنے شرکت کی۔ ایم او یو کا بنیادی مقصد پنجاب یونیورسٹی اور ہوم اکنامکس یونیورسٹی کے درمیان تعاون پر مبنی رشتہ قائم کرنا ہے تاکہ پنجاب یونیورسٹی میں دستیاب منتخب لیبارٹری اور شعبہ جاتی وسائل کو استعمال کرتے ہوئے ہوم اکنامکس یونیورسٹی کے طلباء کی تعلیمی اور عملی تربیتی ضروریات کو پورا کیا جا سکے۔پنجاب یونیورسٹی کالج آف انفارمیشن ٹیکنالوجی، انسٹیٹیوٹ آف اپلائیڈ سائیکالوجی اور کالج آف آرٹ اینڈ ڈیزائن یونیورسٹی آف ہوم اکنامکس کے طلباء کو کمپیوٹنگ پروگراموں، نفسیاتی جانچ کے آلات اور بی ایس سائیکالوجی کے طلباء کے لیے تجرباتی سیٹ اپس کے لیے مصنوعی ذہانت اور ڈیجیٹل لاجک ڈیزائن لیبز تک رسائی فراہم کرے گا اور مشترکہ کام کی نمائش یا مشترکہ کام کے مواقع بھی فراہم کرے گا۔اس موقع پر بات چیت کرتے ہوئے پروفیسر ڈاکٹر محمد علی نے سماجی چیلنجوں سے نمٹنے میں سرکاری یونیورسٹیوں کی شراکت داری کے کردار پر زور دیا۔ انہوں نے امید ظاہر کی کہ دونوں یونیورسٹیاں اختراعی آئیڈیاز کے لیے کام کریں گی جس سے معاشرے کو فائدہ پہنچے۔ پروفیسر ڈاکٹر زیب النساء حسین نے کہا کہ یہ اشتراک ہوم اکنامکس یونیورسٹی کے طلباء کو ان کے علم میں اضافہ کرکے بااختیار بنانے میں مفید ثابت ہوگا۔ 

لاہور (نیوز ڈیسک) پنجاب ایجوکیشن کریکولم ٹریننگ اینڈ اسیسمنٹ اتھارٹی (PECTAA) کے زیرِ اہتمام ایک روزہ بین الاقوامی کانفرنس بعنوان “بہتری کی جانب: پنجاب میں اساتذہ کی سرٹیفیکیشن کے لیے عالمی بصیرت” 10 ستمبر 2025 کو لاہور میں منعقد ہوئی۔کانفرنس کی صدارت سی ای او پِکٹا و سیکرٹری اسکول ایجوکیشن ڈیپارٹمنٹ، جناب خالد نذیر وٹو نے کی۔ تقریب میں وزیر برائے اسکول ایجوکیشن کے مشیر جناب شکیل احمد بھٹی، اسپیشل سیکرٹری ایس ای ڈی جناب اقبال حسین، ایم ڈی اکیڈیمکس ڈاکٹر اطہر سعید اور سابق سیکرٹری اسکول ایجوکیشن عبدالجبّار شاہین سمیت اساتذہ یونین کے نمائندوں نے بھی شرکت کی۔

تقریب کے دوران مختلف قومی و بین الاقوامی اداروں کے نمائندگان نے اپنے تحقیقی ماڈلز اور بصیرتیں پیش کیں۔ برٹش کونسل کے جناب طلحہ چشتی نے برطانیہ اور اسکاٹ لینڈ کے سرٹیفیکیشن ماڈلز پر روشنی ڈالی، جبکہ جائیکا کے جناب عابد گل نے جاپان کے ماڈل کی تفصیلات پیش کیں۔ سندھ میں اساتذہ کے لائسنسنگ عمل پر اسٹیڈا سندھ کے ڈاکٹر زین لغاری نے کیس اسٹڈی پیش کی۔اس کے علاوہ آغا خان یونیورسٹی کے ڈاکٹر ساجد علی نے وائٹ پیپر کی تیاری کے عمل، پنجاب یونیورسٹی کے ڈاکٹر عامر ہاشمی نے صوبے میں بنیادی مطالعہ، ورچوئل یونیورسٹی کے ڈاکٹر منور مرزا نے مجوزہ فریم ورک، اور بی-ٹیگ کے جناب بلال احمد نے عالمی معیار کے مطابق تجاویز پیش کیں۔

اساتذہ یونینز اور اسٹیک ہولڈرز نے سرٹیفیکیشن کے عمل میں درپیش چیلنجز اور مستقبل کے راستے پر اپنے خیالات کا اظہار کیا۔ کانفرنس کے اختتام پر یہ فیصلہ کیا گیا کہ بین الاقوامی تجربات سے استفادہ کرتے ہوئے پنجاب میں اساتذہ کے لیے مؤثر، شفاف اور عالمی معیار کے مطابق سرٹیفیکیشن نظام تشکیل دیا جائے گا۔

ہائر ایجوکیشن کمیشن (HEC) نے ڈاکٹر آف فارمیسی (Pharm.D)، فوڈ سائنس اینڈ ٹیکنالوجی (FST) اور ہیومن نیوٹریشن اینڈ ڈائیٹیٹکس (HND) کے شعبوں کے لیے نظرثانی شدہ نصاب کا اعلان کر دیا ہے۔یہ نیا نصاب انڈرگریجویٹ ایجوکیشن پالیسی 2023 کے تحت تیار کیا گیا ہے تاکہ موجودہ دور کی ضروریات، صنعتی مطالبات اور بین الاقوامی معیار کے مطابق تعلیم فراہم کی جا سکے۔

اس نصاب کی تیاری میں ماہرین تعلیم، ایکریڈیٹیشن کونسلز اور صنعتی ماہرین کی آراء شامل کی گئی ہیں تاکہ اس کی مطابقت، معیار اور عالمی سطح پر برابری کو یقینی بنایا جا سکے۔ یہ نیا نصاب تمام اعلیٰ تعلیمی اداروں کو عمل درآمد کے لیے بھیج دیا گیا ہے اور یہ طلباء، فیکلٹی اور اداروں کے لیے ایچ ای سی کی ویب سائٹ پر بھی دستیاب ہے۔