خبریں

پاکستان  پوسٹ نے اسلامیہ یونیورسٹی بہاول پور کی 100 سالہ تقریبات کی مناسبت سے 100 روپے کا یادگاری ٹکٹ جاری کیا ہے۔ اس موقع پر پروفیسر ڈاکٹر محمد کامران وائس چانسلر اسلامیہ یونیورسٹی بہاول پور نے کہا ہےکہ سال 2025 اسلامیہ یونیورسٹی بہاول پور کی تاریخ میں سنگ میل کی حیثیت رکھتا ہے۔ سال 1925 میں نواب سر صادق محمد خان عباسی والی ریاست نے جامعہ عباسیہ بہاولپور قائم کی جو آج ایک نامور پبلک سیکٹر یونیورسٹی کے طور پر قومی اور عالمی افق پر جگمگا رہی ہے۔ پرو وائس چانسلر پروفیسر ڈاکٹر عبدالروف نے کہا ہے کہ جامعہ عباسیہ کے قیام کی 100 سالہ تقریبات گزشتہ سال سے جاری ہیں اور اساتذہ کرام طلباو طالبات ایلومینائی اور سول سوسائٹی ان تقریبات کو بھرپور انداز سے منا رہی ہے۔ 1925 میں قائم ہونے والی جامعہ عباسیہ بہاول کی بنیاد دراصل 1879 میں نواب محمد صادق چہارم نے مدرسہ صدر دینیات کی شکل میں رکھی جو ترقی کرکے جامعہ عباسیہ کہلائی ۔ 1964 میں ویسٹ پاکستان آرڈیننس کے تحت اسے جامعہ اسلامیہ بہاولپور کا درجہ دے دیا گیا ۔ سال 1975 میں حکومت پنجاب نے جامعہ اسلامیہ کو اپ گریڈ کر کے مکمل پبلک سیکٹر یونیورسٹی چارٹرڈ کا درجہ دے دیا۔ اسلامیہ یونیورسٹی بہاول پور  کے اسوقت 6 کیمپسز ہیں جو بہاول پور, بہاولنگر ، رحیم یار خان اور لیاقت پور میں قائم ہیں۔ اس وقت 40000 آن کیمپس اور 1 لاکھ سے زائد آف کیمپس طلباوطالبات کو  1200 اساتذہ کرام 300 مضامین میں زیور تعلیم سے آراستہ کر رہے ہیں۔ اسلامیہ یونیورسٹی بہاول پور میں قائم فیکلٹیز میں ایگریکلچر اینڈ اینوائرمنٹ، انجینئرنگ، انفارمیشن ٹیکنالوجی اینڈ آرٹیفیشنل اینٹیلیجنس ، سائینسز،  ہیلتھ اینڈ میڈیکل سائنسز، اسلامک اسٹڈیز، لینگوئجز، لاء اور سوشل سائنسز نمایاں ہیں۔ اسلامیہ یونیورسٹی بہاول پورکا قومی اور علاقائی سطح پر فروغ تعلیم کے ساتھ ساتھ ثقافتی ، سماجی اور معاشی اثر نمایاں ہے۔ یہ جامعہ اردو، انگریزی ، سرائیکی، عربی اور فارسی زبانوں کی ترویج کے ساتھ ساتھ قوم کو ماہرین تعلیم ، سیاست دان ، سول سرونٹس ، سائنس دان ،بزنس مین، اور مذہبی سکالرز فراہم کر رہی ہے۔ اسلامیہ یونیورسٹی بہاول پورعلاقے کے عظیم تہذیبی ورثے کی پاسدار اور امین ہے۔ ڈائریکٹر جنرل پاکستان پوسٹ حکومت پاکستان نے اسلامیہ یونیورسٹی بہاول پورکی سو سالہ تاریخی اہمیت کو اجاگر کرنے کے لیے یادگاری ٹکٹ جاری کیا۔ اس یادگاری ٹکٹ پر فیکلٹی آف ایگریکلچر اینڈ اینوائرمنٹ کی عمارت کی تصویر کو نمایاں کیا گیاہے جو اسلامیہ یونیورسٹی بہاول پورکی علاقائی اور قومی اہمیت اور زرعی تحقیق و معیشت میں نمایاں کردار کو ظاہر کرتی ہے۔

اسلامی تعاون تنظیم کی سائنسی کمیٹی (کامسٹیک) کے کوآرڈینیٹر جنرل پروفیسر ڈاکٹر اقبال چوہدری نے یونیورسٹی آف لاہور کا دورہ کیا، جہاں انہوں نے جامعہ کی اعلیٰ قیادت سے ملاقاتیں کیں اور بین الشعبہ جاتی تحقیق کے فروغ سے متعلق امور پر تبادلہ خیال کیا۔ جمعہ کو کامسٹیک سے جاری پریس ریلیز کے مطابق پروفیسر ڈاکٹر اقبال چوہدری نے دورے کے دوران یونیورسٹی آف لاہور کے بورڈ آف گورنرز کے چیئرمین اویس روف، قاسم علی شاہ فاؤنڈیشن کے سربراہ قاسم علی شاہ، ریکٹر پروفیسر ڈاکٹر محمد اشرف، ڈین فیکلٹی آف سائنسز پروفیسر ڈاکٹر احمد بلال وقار، آفس آف ریسرچ، انوویشن اینڈ کمرشلائزیشن (او آر آئی سی) کے ڈائریکٹر پروفیسر ڈاکٹر محمد اقبال اور انٹر ڈسپلنری ریسرچ سینٹر کے کوآرڈینیٹر ڈاکٹر عمر یونس سے ملاقاتیں کیں۔ ملاقاتوں کے دوران جامعہ میں بین الشعبہ جاتی تحقیق کے فروغ کے امکانات کا تفصیلی جائزہ لیا گیا۔

اس موقع پر اس بات پر زور دیا گیا کہ پیچیدہ سائنسی اور سماجی مسائل کے موثر حل کے لیے مختلف تعلیمی شعبہ جات کے مابین قریبی تعاون ناگزیر ہے۔ شرکا نے تحقیقی صلاحیتوں کو مزید مضبوط بنانے، بین الشعبہ روابط کو فروغ دینے اور کثیرالجہتی تحقیقی پروگرامز کے آغاز پر اتفاق کیا۔ او آئی سی کامسٹیک کے کوآرڈینیٹر جنرل نے یونیورسٹی آف لاہور کی جانب سے تحقیق کے فروغ کے لیے کئے گئے اقدامات کو سراہتے ہوئے کہا کہ کامسٹیک کے پلیٹ فارم کے ذریعے اسلامی تعاون تنظیم (او آئی سی) کے رکن ممالک کے ساتھ سائنسی تعاون اور بین الاقوامی شراکت داری کو مزید وسعت دی جا سکتی ہے۔ جامعہ کی قیادت نے اعلیٰ معیار کی بین الشعبہ جاتی تحقیق کے فروغ کے عزم کا اعادہ کیا اور مستقبل میں مشترکہ تحقیقی اقدامات کو آگے بڑھانے پر اتفاق کیا تاکہ تحقیقی پیداوار اور جدت کو فروغ دیا جا سکے۔ دورے کے اختتام پر اس امر پر اتفاق کیا گیا کہ موثر حکمت عملیوں اور مربوط پروگرامز کے ذریعے بین الشعبہ جاتی تحقیق کو مزید مستحکم بنایا جائے گا، جو نہ صرف پاکستان بلکہ عالمی سطح پر سائنسی ترقی میں اہم کردار ادا کرے گی۔

معاشی بحران کے پیش نظر پنجاب کے تمام تعلیمی ادارے آن لائن موڈ پر منتقل کر دیے گئے۔ آن لائن منتقلی کا اعلان وزیر تعلیم نے اپنی ٹویٹ  اور فیس بک کے ذریعے کیا۔وزیر تعلیم پنجاب رانا سکندر حیات   نے کہا گریڈ 8 کے امتحانات شیڈول کے مطابق ہوں گے۔ سکول بیسڈ اسسمنٹ کا عمل بھی متاثر نہیں ہوگا۔ بورڈ امتحانات بھی شیڈول کے مطابق جاری رہیں گے

پٹرول بحران ختم ہونے تک صوبائی وزراء کیلئے سرکاری فیول بند  کردیا ، سرکاری افسران کی گاڑیوں کے پٹرول و ڈیزل الاونس میں 50 فیصد فوری کمی کردی ، وزراء اور اعلیٰ افسران کے پروٹوکول میں چلنے والی اضافی گاڑیوں پر پابندی لگا دی ، سکیورٹی کیلئے صرف ایک گاڑی وزراء اور اعلیٰ افسران کے ساتھ ہوگی ۔ پنجاب کے سرکاری دفاتر میں ورک فرام ہوم کا فیصلہ، صرف ضروری عملہ آئے گا ۔

سکول، کالج اور یونیورسٹیاں 10 مارچ سے 31 مارچ تک بند رہیں گی ۔
امتحانات شیڈول کے مطابق ہوں گے، تعلیمی اداروں کو آن لائن کلاسز کی اجازت دے دی گئی ۔ شہریوں کیلئے ای بزنس اور “مریم کی دستک” سروسز جاری رہیں گی ۔سرکاری امور کیلئے آن لائن اجلاس اور ٹیلی کانفرنسز ہوں گی ۔پنجاب میں تمام سرکاری آؤٹ ڈور تقریبات پر پابندی عائد کردی گئیں ۔ ہارس اینڈ کیٹل شو کا ثقافتی میلہ بھی ملتوی کر دیا گیا۔
ہر ضلع میں ڈسٹرکٹ پٹرولیم مانیٹرنگ کمیٹیاں بنانے کا حکم دے دیا۔ پی آئی ٹی بی کو پٹرولیم کیلئے ٹریک اینڈ ٹریس سسٹم بنانے کا ٹاسک مل گیا ۔ انتظامیہ، پولیس، پیرا ودیگر اداروں کے نمائندے ٹیم میں شامل ہونگے ۔
ٹرانسپورٹ کرایوں کی سخت نگرانی، زائد کرایہ لینے والوں کیخلاف کارروائی کا حکم دے دیا۔ اشیائے خورونوش کی طلب و رسد پر سخت نگرانی کی ہدایت کی گئی ۔ عوام سے غیر ضروری خریداری اور ذخیرہ اندوزی سے گریز کی اپیل  کی گئی ۔ شہریوں سے رات گئے شاپنگ سے اجتناب کرنے کی درخواست کردی گئی ۔

پنجاب یونیورسٹی ہیلی کالج آف کامرس کے لیکچرارحافظ فواد علی نے اٹلی کے شہر فلورنس میں منعقد ہونے والا پروگرام ’فیرینزے 12واں ونٹر سکول برائے ریسرچ میتھڈالوجی اِن سوشل سائنسز، اربن سٹڈیز اینڈ اسپیشل پلاننگ‘ کامیابی سے مکمل کر لیا۔ اس کے ساتھ ساتھ انہوں نے ’ٹریننگ سکول آن اپلائیڈ اونٹولوجی فار کنسیپچول اینالیسس اینڈ سسٹمیٹائزیشن‘میں بھی شرکت کی۔یہ پروگرام فلورنس کی یونیورسٹی،ڈگلی سٹڈی ڈی فیرینزے کی میزبانی میں منعقد ہوا جسے یورپی اربن ریسرچ ایسوسی ایشن (یورا) اور اٹلی کی کئی جامعات کی معاونت حاصل تھی۔ اس پروگرام کا مقصد کلیدی لیکچرز، ورکشاپس اور تحقیقی طریقہ کار کی تربیت کے ذریعے تحقیقاتی صلاحیتوں کو فروغ دینا تھا۔ونٹر سکول کے دوران شرکاء کو کلاسیکی اور جدید تحقیقی طریقہ کار، عملی تجزیاتی آلات اور باہمی سیکھنے کی حکمت عملیوں سے روشناس کرایا گیا۔ یہ تربیت عالمی شہرت یافتہ سکالرز کی نگرانی میں منعقد کی گئی۔حافظ فواد علی کو اس پروگرام میں شرکت کے لیے منتظمین کی جانب سے مسابقتی گرانٹ بھی دی گئی۔ ان کی اس بین الاقوامی تربیت کی کامیاب تکمیل ان کے علمی تحقیق کو آگے بڑھانے اور عالمی تعلیمی روابط کو مضبوط بنانے کے عزم کی عکاسی کرتی ہے۔

پنجاب یونیورسٹی:ایسو سی ایٹ ڈگری کے داخلہ فارم جمع کرانے کی آخری تاریخ میں توسیع  

پنجاب یونیورسٹی شعبہ امتحانات نے ایسوسی ایٹ ڈگری اِن آرٹس،سائنس ا ور کامرس پارٹ ون اور پارٹ ٹوسالانہ امتحانات 2026 اور بی اے (سماعت سے محروم امیدواروں کیلئے) سالانہ امتحان 2026ء کے آن لائن داخلہ فارم جمع کرانے کی آخری تاریخ میں توسیع کر دی ہے۔تفصیلات کے مطابق امیدواراب 12 مارچ 2026 ء تک سنگل فیس کے ساتھ اپنے آن لائن داخلہ فارم جمع کرا سکتے ہیں۔یہ شیڈول ریگولر،لیٹ کالج،پرائیویٹ اورڈویژن کی بہتری کے لیے درخواست دینے والے امیدواروں پر لاگو ہوگا۔واضح رہے کہ پارٹ ون میں داخلے صرف ان امیدواروں کے لیے کھلے ہیں جن کے سپلی پیپرزہیں اورجن کے پاس امتحان میں شرکت کے لیے مواقع موجود ہیں،نئے امیدواروں کو پارٹ ون میں امتحان دینے کی اجازت نہیں ہوگی۔یہ شیڈول اُن امیدواروں کے لیے بھی ہے، جنہوں نے ایسوسی ایٹ ڈگری اِن آرٹس/سائنس اور کامرس پارٹ ون اور پارٹ ٹو کے ضمنی امتحان 2025 ء میں شرکت کی۔مزید برآں کوئی داخلہ فارم بذریعہ ڈاک یا دستی وصول نہیں کیا جائے گا اور تمام امیدواروں کو اپنے داخلہ فارم صرف آن لائن ہی جمع کرانا ہوں گے۔مزیدتفصیلات پنجاب یونیورسٹی کی ویب سائٹ www.pu.edu.pkپر دیکھی جاسکتی ہیں۔

ڈی پی آئی سیکنڈری ایجوکیشن سکولز پنجاب کے  جاری کردہ ڈویژنل ڈائریکٹرز ، ڈی ای او سیکنڈری ایجوکیشن DEAs، تمام سربراہان ادارہ ھائی و ھائر سیکنڈری سکولز پنجاب کے نام مراسلہ کے مطابق۔ سیکورٹی خدشات پیش نظر کے پیش نظر حکومت پنجاب ،محکمہ داخلہ پنجاب اور سکول ایجوکیشن ڈیپارٹمنٹ پنجاب نے بچوں اور سکولز کی حفاظت کے لیے فوری اقدامات کی ھدایت کی ھے ۔ یہ درج ذیل ھیں ۔

صبح کی اسمبلی تاحکم ثانی معطل رھے گی۔

– تمام سکولز میں CCTV CAMERAS فنکشنل کرنا فوری ضروری ھیں ۔ اپنے اپنے اضلاع میں NSB، سکولز کو Release کروانے کا اھتمام کریں ۔ سکول ایجوکیشن ڈیپارٹمنٹ بقیہ قسطوں کے فوری اجرا کا بندو بست کر رھا ھے ۔
– سیکورٹی گارڈ کا بندو بست فوری کریں جن سکولز میں موجود ھیں ان کی ڈیوٹی گیٹ اور اطراف پہ فوری لگائیں ۔اساتذہ کی ڈیوٹی بھی اس کام کے لیے لگائی جا سکتی ھے ۔
– Ensure that Punjab Safe City App is downloaded by each Teacher on Android Phone , which is available free on Play Store.
– سکولز کے مین گیٹ اوقات کار میں کھلے نہ ھوں۔
– اپنے اپنے سکولز میں ایمرجنسی ڈرلز کروائیں ۔ Exit پوائنٹس کا سب کے علم میں ھو۔ بچوں سے بار بار ڈرلز کروائیں ۔اور ان کو آ گاھی دیں ۔

ھم سب مل کر اپنے بچوں کو محفوظ کریں ۔ ھائی سکولز کے بچوں کو کسی بھی احتجاج میں شریک نہ ھونے دیں ۔دوران معائنہ بچوں کے تعلیمی معیار کا معائنہ نہ بھولیں ۔ نئے داخلوں کی ھدایات بھی دیں اور ساتھ ساتھ SIS پہ اندراج یقینی بنائیں ۔

پنجاب یونیورسٹی میں نیشنل آؤٹ ریچ پروگرام برائے فیکلٹی اور نیشنل آؤٹ ریچ پروگرام برائے مینجمنٹ کی اختتامی تقریب کا انعقاد انسٹیٹیوٹ آف ایڈمنسٹریٹو سائنسز میں مشترکہ طور پرہواجس میں وائس چانسلرپروفیسر ڈاکٹر محمد علی،منیجنگ ڈائریکٹر نیشنل اکیڈمی آف ہائیرایجوکیشن، اسلام آبادسے ڈاکٹر نور آمنہ ملک، ٹریننگ کوآرڈینیٹر ڈاکٹر سنیہ ملک، صدر اکیڈمک اسٹاف ایسوسی ایشن ڈاکٹر امجد مگسی، اساتذہ کرام و دیگرنے شرکت کی۔ اپنے خطاب میں وائس چانسلر پروفیسر ڈاکٹر محمد علی نے ان پروگراموں کو شرکاء کے لیے اپنی صلاحیتوں کو اجاگر کرنے اور بروئے کار لانے کا موقع قرار دیا۔ انہوں نے مثبت سوچ اور مسلسل سیکھنے کے رجحان کو اپنانے پر زور دیتے ہوئے کہا کہ ہر فرد کو اپنی منفرد صلاحیتوں پر توجہ مرکوز کرنی چاہیے۔ تصوف کے ہمہ گیر اصولوں کا حوالہ دیتے ہوئے، جہاں مساوات اور باہمی احترام طبقاتی اور مسلکی تقسیم سے بالاتر ہوتے ہیں، انہوں نے شرکاء پر زور دیا کہ وہ اپنی پیشہ ورانہ زندگی میں بھی ان اقدار کو اپنائیں۔ انہوں نے پروگراموں کے کامیاب انعقاد پر ڈاکٹر سنیہ ملک کی کاوشوں کو سراہتے ہوئے شرکاء کو مبارکباد پیش کی۔ڈاکٹر نور آمنہ ملک نے مینجمنٹ آفیسرز ٹریننگ پروگرام کے شرکاء کے ساتھ ایک تعاملی اور فکری طور پر متحرک سیشن منعقد کیا، جسے شرکاء نے نہایت متاثر کن اور حوصلہ افزا قرار دیا۔ انہوں نے دونوں پروگراموں کے کامیاب انعقاد پر اطمینان کا اظہار کیا اور وائس چانسلر پروفیسر ڈاکٹر محمد علی کی قائدانہ صلاحیتوں کو خراج تحسین پیش کیا۔ انہوں نے شرکاء کو یونیورسٹی کے ویژن سے ہم آہنگ ہونے اور اپنے اپنے شعبہ جات میں پیشہ ورانہ ترقی کے سفیر کا کردار ادا کرنے کی تلقین کی۔انہوں نے زور دیتے ہوئے کہا کہ شرکاء حاصل شدہ علم اور مہارتوں کو اپنے پیشہ ورانہ امور کی انجام دہی تک منتقل کریں۔ انہوں نے اعلان کیا کہ مستقبل میں شرکاء کو بین الاقوامی تربیتی مواقع کے لیے بھی زیر غور لایا جائے گا، جبکہ اگلے مرحلے میں شعبہ جات کے سربراہان کے لیے خصوصی تربیتی پروگرام شروع کرنے کا منصوبہ بھی زیر غور ہے۔

انہوں نے اس اہم تعلیمی سفر کی تکمیل پر شرکاء کو مبارکباد دی۔ڈاکٹر امجد مگسی نے یونیورسٹی میں مثبت تبدیلی کو فروغ دینے میں شرکاء کے بامعنی کردار کو اجاگر کیا۔قبل ازیں ڈاکٹر سنیہ ملک نے دونوں پروگراموں کا تفصیلی تعارف پیش کرتے ہوئے ان کے دائرہ کار، ماڈیولز اور نتائج پر روشنی ڈالی۔ انہوں نے نیشنل اکیڈمی آف ہائر ایجوکیشن کی جانب سے 39 لاکھ روپے کی گرانٹ پر اظہار تشکر کیا جس کی بدولت یہ پروگرام کامیابی سے منعقد ہوئے۔ انہوں نے بتایا کہ تمام ریسورس پرسنز نے شرکاء کی کارکردگی کو سراہا جو جامعہ پنجاب کے مضبوط انسانی سرمائے کی عکاسی کرتا ہے۔ شرکاء نے بھی اس موقع پر فراہم کیے گئے مواقع پر دلی تشکر کا اظہار کیا۔ تقریب کے اختتام پر شرکاء میں تعریفی اسناد تقسیم کی گئیں۔تقریب میں ڈین فیکلٹی آف ہیلتھ سائنسز پروفیسر ڈاکٹر ریحان شیخ، ڈائریکٹر اورک ڈاکٹر عقیل انعام، ڈائریکٹرآئی اے ایس ڈاکٹر کاشف راٹھور، ڈپٹی ڈائریکٹر این اے ایچ ای محمد منیب اور ریزیڈنٹ آڈیٹر رائے حسن رؤف نے بھی شرکت کی۔

لاہور: نامور ریڈیولوجسٹ اور اولڈ راوین پروفیسر ڈاکٹر صفدر علی ملک کی جانب سے گورنمنٹ کالج یونیورسٹی لاہور کے اینڈوومنٹ فنڈ ٹرسٹ کو 10 لاکھ روپے کی رقم عطیہ۔ اس رقم سے ہر سال میرٹ پر ایک مستحق طالب علم کو اسکالرشپ دی جائے گی۔ یہ پروفیسر صفدر کی جانب سے عطیہ کی جانے والی ساتویں سکالرشپ ہے۔پروفیسر ڈاکٹر صفدر علی ملک نے 10 لاکھ روپے کا چیک وائس چانسلر پروفیسر ڈاکٹر محمد عمر چوہدری کو وائس چانسلر آفس میں ایک تقریب کے دوران پیش کیا۔ اس موقع پر پروفیسر ڈاکٹر خالد منظور بٹ اور یونیورسٹی آف بلتستان، اسکردو کے وائس چانسلر پروفیسر ڈاکٹر مسعود اختر بھی موجود تھے۔وائس چانسلر پروفیسر ڈاکٹر محمد عمر چوہدری نے عطیے پر پروفیسر ڈاکٹر صفدر علی ملک کا شکریہ ادا کرتے ہوئے ہدایت کی کہ اس رقم کو میرٹ اسکالرشپ میں تبدیل کیا جائے، تاکہ ہر سال ایک مستحق طالب علم کو تعلیمی معاونت فراہم کی جا سکے۔ انہوں نے کہا کہ ایک اسکالرشپ ایک طالب علم کی زندگی بدل دیتی ہے اور تعلیم کے ذریعے پورا خاندان بہتر مستقبل کی طرف بڑھتا ہے۔