خبریں

اسلامیہ یونیورسٹی بہاولپور کے شعبہ اکاؤنٹنگ اینڈ فنانس نے یونیورسٹی کے کیمپسز میں مسکراہٹ مہم 2026 کا آغاز کیا ہے، جس کا مقصد طلباء اور عملے کے درمیان شفقت، مہربانی اور مثبت رویوں کے جذبے کو فروغ دینا ہے۔  یہ اقدام ظاہر کرتا ہے کہ کس طرح روزمرہ کے جذبات اور رویے بالخصوص ایک سادہ سی مسکراہٹ انسانی تعلق کو مضبوط بنا سکتی ہے اور کیمپس کے ماحول کو بہتر بنا سکتی ہے۔  لیکچر ہال سے لے کر دالان تک مہم ٹیم ورک حوصلہ افزائی اور باہمی احترام کے لمحات کا اظہار ہے جو یونیورسٹی کو ایک خوش آئند کمیونٹی کا احساس دلاتی ہے۔ وائس چانسلر پروفیسر ڈاکٹر محمد کامران نے  اس مہم سے جڑے اساتذہ اور طلبا وطالبات کی حوصلہ افزائی کرتے ہوے انکے انسانی اقدار کے جذبے کو سراہتے ہوئے کہا ہے کہ یہ کاوش ایک خواشگوار تعلیمی ثقافت کی تشکیل کرتی ہے۔ انہوں نے اس بات پر زور دیا کہ اساتذہ اور طلباء کے درمیان مثبت تعامل سیکھنے کو ہر ایک کے لیے قابل رسائی اور دل چسپ بنانے میں اہم کردار ادا کرتا ہے۔

جامعہ پشاور کے شعبہ جغرافیہ و جیو میٹکس سے وابستہ ممتاز ماہرِ جغرافیہ پروفیسر ڈاکٹر عطاالرحمن کو نیشنل کریکولم ریویو کمیٹی (NCRC) برائے جغرافیہ کا کنوینر منتخب کر لیا گیا ہے۔ہائر ایجوکیشن کمیشن (HEC) کے زیرِ اہتمام کراچی میں واقع ایچ ای سی ریجنل آفس میں نیشنل کریکولم ریویو کمیٹی برائے جغرافیہ کا اجلاس منعقد ہوا، جس میں ملک بھر سے آئے ہوئے سینئر ماہرینِ جغرافیہ نے متفقہ طور پر پروفیسر ڈاکٹر عطاالرحمن (جامعہ پشاور) کو NCRC کا کنوینر منتخب کیا۔

دو روزہ مشاورتی اجلاس کے دوران کمیٹی نے بیچلر آف سائنس (BS) جغرافیہ، ماسٹر آف سائنس (MSc) اور ماسٹر آف فلسفی (MPhil) جغرافیہ کے لیے نیا نصابی فریم ورک اور کورسز ترتیب دیے۔ نصاب کی تیاری میں مارکیٹ کی ضروریات، جدید عالمی معیارات اور جغرافیہ کے شعبے میں تیز رفتار ترقی کو خصوصی طور پر مدنظر رکھا گیا۔اختتامی تقریب سے خطاب کرتے ہوئے پروفیسر ڈاکٹر عطاالرحمن نے جغرافیہ سے وابستہ علمی برادری، معزز NCRC اراکین اور ہائر ایجوکیشن کمیشن کے نمائندگان کا شکریہ ادا کیا اور اس اعتماد کو اعزاز قرار دیا۔

یہ پیش

:وائس چانسلرپنجاب یونیورسٹی پروفیسر ڈاکٹر محمد علی نے کہا ہے کہ مسائل کے حل کے لئے مباحثے ضروری ہیں، کتابوں کے ذریعے علم اور اعتماد میں اضافہ ہوتا ہے۔ وہ پنجاب یونیورسٹی انسٹیٹیوٹ آف انرجی اینڈ انوائرمینٹل انجینئرنگ کے آڈیٹوریم میں سابق وائس چانسلر علامہ اقبال اوپن یونیورسٹی اورماہرتعلیم پروفیسرڈاکٹر شاہد صدیقی کی دو کتابوں کی تقریب رونمائی سے خطاب کررہے تھے۔ اس موقع پرپروفیسر ڈاکٹر شاہد صدیقی، لمزسے ڈاکٹر طیبہ تمیم، ڈائریکٹر ادارہ تعلیم و تحقیق ڈاکٹر عبدالقیوم چوہدری،ڈائریکٹر انسٹیٹیوٹ آف سوشل اینڈ کلچرل سٹڈیز ڈاکٹر فرحان نوید یوسف،چیئرپرسن شعبہ جینڈر سٹڈیز ڈاکٹر راعناملک، سیکریٹری اکیڈمک سٹاف ایسو سی ایشن ڈاکٹر محمد اسلام، محققین، تعلیم دان، فیکلٹی ممبران اور طلباؤطالبات نے بڑی تعداد میں شرکت کی۔ اپنے خطاب میں وائس چانسلر پروفیسرڈاکٹر محمد علی نے طلباؤطالبات کو نصیحت کرتے ہوئے کہا کہ دنیاجس تیزی سے بدل رہی ہے اگر اس تبدیلی کو ڈرائیو کرنا ہے تو مطالعے کی عادات کو اپنانا ہوگا۔ انہوں نے کہا کہ آئندہ پانچ سال میں زراعت، ابلاغیات، مواصلات، درس و تدریس کے ذرائع بدل جائیں گے، لہذاطلباؤطالبات کو صرف ڈگری نہیں بلکہ سیکھنے کے لئے پڑھنا ہوگا۔ انہوں نے کہا کہ طلبہ 30فیصد اپنے کلاس رومز میں جبکہ 70فیصد کلاس رومز سے باہر سیکھتے ہیں جس کیلئے ایسی سرگرمیوں کا انعقاد جاری رہنا چاہیے۔ انہوں نے کہا کہ ڈاکٹر شاہد صدیقی ملن سار، قابل اور محنتی شخص ہیں جن سے ہمیشہ سیکھنے کو ملتا ہے۔ انہوں نے کہا کہ مصنف نے اپنی تصانیف میں تعلیم، سیاست اور جینڈر کے مختلف پہلوؤں پرتفصیلی روشنی ڈالی ہے۔ ڈاکٹر شاہد صدیقی نے کہا کہ ہمیں ایسے گرایجوئیٹس پیدا کرنے ہیں جو معاشرے کے مسائل اور چیلنجز سے آگاہ ہوں۔انہوں نے کہا کہ طلبہ کی تخلیقی صلاحیتوں اور تنقیدی سوچ کو فروغ دینے کی ضرورت ہے۔ انہوں نے کہا کہ یہ کتب میرے ذاتی عملی مشاہدات کا نچوڑ ہیں جنہیں محققین، پالیسی ساز، طلبہ اور عام لوگ با آسانی سمجھ سکتے ہیں۔ انہوں نے کہا کہ دونوں کتب انٹر ڈسپلنری ہیں اور ہر باب میں کوئی نہ کوئی مسئلہ اجاگر کیا گیا ہے۔ انہوں نے تقریب کے انعقاد پر وائس چانسلر ڈاکٹر محمد علی اور ان کی ٹیم کا شکریہ اداکیا۔ ڈاکٹر طیبہ تمیم نے کہا کہ مصنف نے کتاب میں تعلیم کی اہمیت جس انداز سے اجاگر کیا ہے وہ قابل تعریف ہے جبکہ ان کتابوں کا ٹائٹل بھی قابل دید ہے۔ انہوں نے کہا کہ ہر شعبہ زندگی میں ترقی کیلئے تعلیم کا کردار بہت اہم ہوتاہے۔ انہوں نے کہا کہ ڈاکٹر شاہد صدیقی نے کتاب میں اساتذہ و طلبہ کے درمیان تعلقات پر آسان زبا ن میں بیان کیا ہے جسے پڑھ کر سوچ کے دریچے کھُلتے ہیں۔ ڈاکٹر عبد القیوم چوہدری نے کہا کہ ڈاکٹر شاہد صدیقی نے رینکنگ میں بہتری، آؤٹ آف سکول بچوں کے حوالے سے کتب بینوں کو اپنے نقطہ نظر سے انتہائی خوبصورتی سے آگاہ کیا ہے۔ ڈاکٹر فرحان نوید یوسف نے بہترین تصانیف پر ڈاکٹر شاہد صدیقی کو مبارک باد پیش کرتے ہوئے ان کی تحریرکو علمی دنیا میں خوبصورت اضافہ قرار دیا۔

:وائس چانسلرپنجاب یونیورسٹی پروفیسر ڈاکٹر محمد علی نے کہا ہے کہ دنیا تیزی سے بدل رہی ہے ہمیں ٹیکنالوجی اور جاب مارکیٹ کے مطابق اپنے آپ کو ڈھالنا ہے۔وہ پنجاب یونیورسٹی شعبہ زوالوجی فش ریسرچ فارم کے زیر اہتمام سپریم ایکوا فیڈ کے تعاون سے ورلڈ فشریز ڈے پر منعقدہ تقریبات سے اظہار خیال کررہے تھے۔ اس موقع پر آبی حیات سے متعلق آگاہی ریلی و سیمینار کا انعقادکیا گیا۔ مچھلیوں کی مختلف اقسام پر نمائش کے علاوہ مختلف مچھلیوں کے فوڈ سٹال بھی لگائے گئے۔ان سٹالز میں مچھلی سے بنے کیک، اچار، نگٹس، بریانی، کباب، شوارما، کوفتے، سینڈوچ، پاستا، ڈمپلنگ و دیگر اشیا کی نمائش کی گئی۔ اس موقع پر وائس چانسلر پروفیسر وائس چانسلر ڈاکٹر محمد علی،ڈی جی فشریز رانا محمد سلیم،عبدالمجید چیمہ، ڈائریکٹر شعبہ زوالوجی ڈاکٹر نبیلہ روحی، انچارج فش ریسرچ فارم ڈاکٹر نور خان،پروفیسر ایمریطس ڈاکٹر نعیم خان، فیکلٹی ممبران اور طلباؤطالبات نے بڑی تعداد میں شرکت کی۔ واک میں شریک طلبہ نے آبی حیات سے متعلق آگاہی پوسٹرز اور بینرز اٹھا رکھے تھے۔اپنے خطاب میں وائس چانسلر پروفیسر ڈاکٹر محمد علی نے کہا کہ بچے ڈگری کے بعد نوکری کی بجائے اپنا کاروبار شروع کرنے کو ترجیح دیں۔انہوں نے کہا کہ خواتین کے آگے آئے بغیر خاندان اور ملکی معیشت بہتر نہیں ہو سکتی۔انہوں نے کہا کہ پاکستان میں کاروبار میں خواتین کی شرکت بہت کم ہے۔انہوں نے کہا کہ ہم نے تربیت کے مینوئل کو تبدیل کرنا ہے تاکہ سٹوڈنٹ بین الاقوامی مارکیٹ کے لئے تیار ہوسکیں۔ انہوں نے کہا کہ بچے اپنی مہارتیں استعمال کر کے دوسروں کی بجائے اپنے آپ کو مالی طور پر مضبوط بنائیں۔انہوں نے کہا کہ ورلڈ فشریز ڈے پر تقریبات سے طلباء کو سیکھنے کا عملی موقع مل رہا ہے۔انہوں نے کہا کہ طلباء میں فشریز سیکٹر سے متعلق دلچسپی ہے انہیں عملی تربیت کی ضرورت ہے۔ رانا محمد سلیم نے کہا کہ ماحول ایکواکلچر پر اثر انداز ہو رہا ہے۔انہوں نے کہا کہ حکومت تمام سٹیک ہولڈرز کو ساتھ لے کر فشریز سیکٹر کو فروغ دے رہی ہے۔انہوں نے کہا کہ کسانوں کے مسائل حل کرنے کے لئے تحقیق کی اشد ضرورت ہے۔انہوں نے کہا کہ ایم فل اور پی ایچ ڈی ریسرچ عملی مسائل پر ہونی چاہیے۔ انہوں نے کہا کہ طلباؤطالبات کو عملی میدان کے مسائل پتہ ہوں گے تو ڈگری کے بعد کام آسان ہو گا۔انہوں نے کہا کہ فشریز میں غیر ملکی کنسلٹنٹس ہائر کرنا پڑ رہے ہیں۔انہوں نے کہا کہ ہم پنجاب میں 6 نئے ایکوا بزنس حب قائم کر رہے ہیں۔انہوں نے کہا کہ حکومتی پراجیکٹس سے طلباؤ طالبات کے لئے روزگار و کاروبار کے نئے مواقع پیدا ہو رہے ہیں۔ عبدالمجید چیمہ نے فشریز میں پیداوار بڑھانے کے لئے جدید تکنیک کواپنانے پر زور دیا اورطلبہ کوبھی اسی پر فوکس کرنے کی نصیحت کی۔ ڈاکٹر نعیم خان نے کہا کہ فشریز سیکٹر کا بہترین سرپرست ڈاکٹر محمد علی کی صورت میں ملا ہے جن کے اقدامات سے پنجاب یونیورسٹی میں فشریز میں تحقیق کو فروغ مل رہا ہے۔ انہوں نے کہا کہ بلوچستان اور سندھ میں میرین فشریز کے حوالے سے گائیڈ لائن فراہم کرنی چاہیے۔ نور خان نے کہا کہ پاکستان مین فش فارمنگ کا شعبہ فروغ پا رہا ہے اورحکومت کی بھرپور دلچسپی سے جدید طریقے فش فارمنگ میں اپنائے جا رہے ہیں۔ انہوں نے کہا کہ 225 ملین میٹرک ٹن کی سالانہ ٹریڈ ہو رہی ہے۔ انہوں نے کہا کہ پاکستان میں فش فارمنگ میں تربیت یافتہ افرادی قوت کا بہت سکوپ ہے۔ انہوں نے کہا کہ حکومت طلباؤطالبات کو بھی فش فارمنگ سکیمز میں شامل کرے۔وائس چانسلر ڈاکٹر محمد علی و دیگر نے مچھلیوں کے مختلف تالابوں کا دورہ بھی کیا۔

#world fisheries day#pu #ilmiat online

لاہور: گورنمنٹ دیال سنگھ گریجویٹ کالج لاہور میں پہلی انٹر ڈیپارٹمنٹل کرکٹ لیگ 2025 نہایت شاندار انداز میں فائنل میچ کے ساتھ اختتام پذیر ہوگئی۔ یہ لیگ وزیراعلیٰ پنجاب میڈم مریم نواز شریف اور وزیرِ برائے ہائر ایجوکیشن رانا سکندر حیات کی جانب سے تعلیمی اداروں میں کھیلوں کی بحالی کے وژن کا عملی آغاز ثابت ہوئی۔فائنل میچ کے آغاز سے قبل آرٹس اور سائنس کے پروفیسرز کے درمیان ایک دوستانہ میچ کھیلا گیا جس میں سائنس گروپ نے 5 اوورز میں 76 رنز بنائے، تاہم آرٹس گروپ نے یہ ہدف باآسانی حاصل کر لیا۔ پرنسپل پروفیسر ڈاکٹر محمد حماد اشرف نے اپنی عمدہ بولنگ سے شائقین سے خوب داد سمیٹی اور طلباء و طالبات کو صحت مند سرگرمیوں کی طرف بھرپور ترغیب دی۔

لیگ کے فائنل میں BBA Hunters اور Hamas Tigers کے مابین نہایت سنسنی خیز مقابلہ ہوا۔ BBA Hunters نے پہلے کھیلتے ہوئے 102 رنز کا ہدف دیا جسے Hamas Tigers حاصل کرنے میں ناکام رہی۔ اس طرح BBA Hunters پوری لیگ میں ناقابلِ شکست رہتے ہوئے چیمپئن قرار پائی۔ ٹیم کے احمد نے 40 رنز کی شان دار اننگز کھیل کر مین آف دی میچ کا اعزاز حاصل کیا۔تقریب کے مہمانِ خصوصی پرنسپل ڈاکٹر محمد حماد اشرف نے کھلاڑیوں میں انعامات تقسیم کیے۔ اس موقع پر وائس پرنسپل ایڈمن پروفیسر عمران اکرم، پروفیسر چوہدری محمد شفیق اکبر، پروفیسر ڈاکٹر عاصم رزاق اور دیگر اساتذہ بھی موجود تھے۔

طالبات کی لیگ میں بھی کامرس ڈیپارٹمنٹ نے فائنل جیت کر چیمپئن ہونے کا اعزاز حاصل کیا۔ اس کامیابی پر پروفیسر توفیق الرحمٰن اور میڈم ساجدہ کو خصوصی مبارک باد پیش کی گئی۔تقریب میں خطاب کرتے ہوئے مقررین نے کہا کہ کھیل طلبہ میں برداشت، ٹیم ورک اور مثبت مقابلے کی روح پیدا کرتے ہیں۔ کامیابی اور ناکامی زندگی کا حصہ ہیں، اور ہر شکست ایک نئی شروعات کا موقع دیتی ہے۔

اس ایونٹ کی شاندار کامیابی کا سہرا کالج کے پرنسپل ڈاکٹر حماد اشرف کی سرپرستی اور پروفیسر چوہدری محمد شفیق اکبر کی انتھک محنت کے سر باندھا گیا جنہوں نے اس پورے ٹورنامنٹ کو منظم بنانے میں کلیدی کردار ادا کیا۔ اس کے علاوہ پروفیسر ڈاکٹر ارشد اقبال، پروفیسر ڈاکٹر محمد شعیب، پروفیسر ڈاکٹر نجم الدین فارانی، پروفیسر حسن رشید، پروفیسر احسن ہارون، پروفیسر جاوید وٹو، پروفیسر ولید احمد، ملک کاشف، آفتاب، ذیشان بٹ اور متعدد دیگر اساتذہ و اہلکاروں نے بھی بھرپور تعاون کیا۔ماس کمیونیکیشن ڈیپارٹمنٹ نے پورے ایونٹ کی بھرپور میڈیا کوریج فراہم کی، جس پر پروفیسر ناصر ادیب، پروفیسر ڈاکٹر عمارہ، پروفیسر شمائلہ اور ان کی ٹیم کو خصوصی شکریہ ادا کیا گیا۔آخر میں اساتذہ اور طلباء نے وزیراعلیٰ پنجاب میڈم مریم نواز شریف اور وزیر ہائر ایجوکیشن رانا سکندر حیات کا شکریہ ادا کیا اور کھیلوں کی بحالی کو خوش آئند قرار دیا۔

سید سلیمان ندوی آڈیٹوریم، اسلامیہ یونیورسٹی بہاولپور فیکلٹی آف اسلامک اینڈ عریبک اسٹڈیز، اسلامیہ یونیورسٹی بہاولپور میں، ڈائریکٹوریٹ آف اسٹوڈنٹس افیئرز کے تعاون سے اسلامک لرنرز اسٹوڈنٹس سوسائٹی کے زیرِ اہتمام تقریری مقابلہ بعنوان سیرت  النبی ﷺ  ایک نصابِ حیات منعقد ہوا۔پروگرام کی سرپرستی ڈپٹی ڈائریکٹر اسٹوڈنٹس افیئرز، فیکلٹی آف اسلامک اینڈ عریبک اسٹڈیز، ڈاکٹر سدرہ شعیب نے کی، جنہوں نے شرکاء اور معزز مہمانانِ گرامی کا خیرمقدم کرتے ہوئے سوسائٹی کی علمی، فکری اور تربیتی سرگرمیوں پر روشنی ڈالی۔ فیکلٹی کے مختلف شعبہ جات سے تعلق رکھنے والے طلبہ و طالبات نے سیرتِ طیبہ ﷺ کے مختلف پہلوؤں پر مدلل، پُراثر اور علمی تقاریر پیش کیں۔ مقررین نے اس امر پر زور دیا کہ سیرت النبی ﷺ محض ایک تاریخی بیان نہیں بلکہ ایک جامع نصابِ حیات ہے جو انسان کی انفرادی و اجتماعی زندگی کے ہر پہلو کی رہنمائی فراہم کرتا ہے۔ فیکلٹی کے اساتذہ کرام کی کثیر تعداد نے پروگرام میں شرکت کی، جن میں ڈاکٹر غلام حیدر مگھرانہ چیئرمین، شعبہ حدیث اور ڈاکٹر سجیلہ کوثرچیئرپرسن، شعبہ مطالعۂ مذاہب و بین المذاہب ہم آہنگی بطورِ معزز مہمان شریک ہوئے۔ججز کے فرائض ڈاکٹر مظہر حسین ایڈوائزر آئی یو بی ڈبیٹنگ سوسائٹی اور ڈاکٹر محمد رمضان اسسٹنٹ پروفیسر، شعبہ اُردو نے انجام دیے۔ انہوں نے مقررین کی علمی استعداد، موضوع سے ہم آہنگی اور اظہارِ بیان کی بنیاد پر کامیاب طلبہ و طالبات کا انتخاب کیا۔ اسلامک لرنرز اسٹوڈنٹس سوسائٹی کے تمام ممبران نے منظم انداز میں پروگرام کا انعقاد کیا، جسے مہمانانِ گرامی، اساتذہ اور طلبہ کی جانب سے بھرپور سراہا گیا۔ صدرِ مجلس، ڈین فیکلٹی آف اسلامک اینڈ عریبک اسٹڈیز، پروفیسرڈاکٹر  شیخ شفیق الرحمٰن نے تمام شرکاء، ججز، اساتذہ اور منتظمین کا شکریہ ادا کرتے ہوئے کہا کہ سیرت النبی ﷺ ہمیں یہ تعلیم دیتی ہے کہ انسان کو زبان کا استعمال علم، خیر اور اخلاق کے فروغ کے لیے کرنا چاہیے۔ یہی حقیقی نصابِ حیات ہے جو دنیا میں کامیابی اور آخرت میں نجات کا ذریعہ ہے۔

اسلام آباد: ہائر ایجوکیشن کمیشن (HEC) نے بلوچستان اور سابقہ فاٹا کے طلبہ کے لیے مجوزہ اسکالرشپ پروگرام کے اپٹیٹیوڈ ٹیسٹ کی تاریخ میں تبدیلی کا اعلان کر دیا ہے۔ تازہ شیڈول کے مطابق نیا ٹیسٹ 14 دسمبر 2025 کو لیا جائے گا۔ایچ ای سی کے مطابق ٹیسٹ کی تاریخ میں تبدیلی انتظامی وجوہات کی بنا پر کی گئی ہے، جبکہ طلبہ کو ہدایت کی گئی ہے کہ وہ وقتاً فوقتاً سرکاری ویب سائٹس پر اپ ڈیٹس چیک کرتے رہیں۔

مزید معلومات اور تازہ ترین اپڈیٹس کے لیے امیدوار درج ذیل ویب سائٹس پر رابطہ کرسکتے ہیں:www.etc.gov.pk اور www.hec.gov.pkادارے نے امیدواروں کو مشورہ دیا ہے کہ وہ نئی تاریخ کے مطابق اپنی تیاری کو حتمی شکل دیں اور ٹیسٹ سے متعلق ہدایات وقت پر حاصل کرلیں۔

#HEC #Aptitude Test # fata #