Ilmiat

انٹرنیشنل اسلامک یونیورسٹی ، خیبر میڈیکل یونیورسٹی،نمل یونیورسٹی ،اقرا یونیورسٹی ،فیڈرل اُردو یونیورسٹی،ایئر یونیورسٹی ،بحریہ یونیورسٹی اور نیشنل ڈفینس یونیورسٹیزکا 63 رکنی طلباءوطالبات نے فیکلٹی ممبران کے ہمراہ پارلیمنٹ ہاوس کا دورہ کیا۔ منگل کو سینیٹ سیکرٹریٹ سے جاری بیان کے مطابق وفد کو سینیٹ میوزیم کا دورہ کرایا گیا جہاں پر انہیں ایوان بالا کی تاریخ پر مبنی ڈاکومنٹری بھی دکھائی گئی۔ وفد نے سینیٹ میوزیم میں ملک کے ممتاز سیاستدانوں کے مجسموں اور تاریخی تصاویر میں دلچسپی کا اظہار کیا۔ وفد نے سینیٹ ہال کا بھی دورہ کیا جہاں پر سینیٹ حکام نے وفد کو ایوان بالا کے کام کے طریقہ کار، قانون سازی،فکشنز اور سینیٹ اجلاس کی کاروائی سے متعلق تفصیلی بریفنگ دی۔ وفد نے سینیٹ میں قائد حزب اختلاف سینیٹر شبلی فراز کے ساتھ گروپ فوٹو بھی بنوائی ۔

حکومت پاکستان رابطہ عالم اسلامی (مسلم ورلڈ لیگ) کے تعاون سے اس سال ستمبر میں بچیوں کی تعلیم پر ایک تاریخی عالمی کانفرنس کی میزبانی کرے گی۔ اس تقریب کا مقصد متعدد اسلامی ممالک کے وزراء تعلیم سمیت بین الاقوامی اور قومی معززین کے ایک متنوع گروپ کو اکٹھا کرنا ہے تاکہ تعلیم کے شعبے میں لڑکیوں کو درپیش بے شمار چیلنجوں سے نمٹنے اور ان کا حل تلاش کیا جا سکے۔ تین روزہ کانفرنس کا بنیادی مقصد ادارہ جاتی ردعمل کو فعال کرنے اور عالمی سطح پر لڑکیوں کی تعلیم کے فروغ کے لیے وسائل کی بہتر تقسیم کو یقینی بنانے کے لیے موثر حکمت عملیوں کو تلاش کرنا اور وضع کرنا ہے۔

کانفرنس میں نامور سکالرز، ماہرین تعلیم، پالیسی ساز اور مختلف سٹیک ہولڈرز شرکت کریں گے جو لڑکیوں کی تعلیم کے شعبے میں اپنی مہارت، تجربات اور بہترین طریقوں کا اشتراک کریں گے۔ وزیر اعظم کی ہدایت پر تقریب کے مناسب اور موثر انداز میں انعقاد کو یقینی بنانے کے لیے ایک کمیٹی قائم کی گئی ہے۔ اس کمیٹی کی سربراہی سیکرٹری تعلیم محی الدین وانی کر رہے ہیں جبکہ باقی نمائندوں میں نوشین افتخار ایم این اے، ڈاکٹر تنویر انجم دفتر خارجہ، فیڈرل ڈائریکٹوریٹ آف ایجوکیشن اور کیپیٹل ڈویلپمنٹ اتھارٹی شامل ہیں۔ کمیٹی کا مقصد اس ہائی پروفائل ایونٹ کے بلا رکاوٹ انعقاد کو یقینی بنانا ہے۔

کانفرنس میں دنیا بھر سے مندوبین جن میں تعلیمی ماہرین، پالیسی ساز، پریکٹیشنرز اور مختلف بین الاقوامی اداروں کے نمائندے شامل ہوں گے کی شرکت متوقع ہے۔ یہ تقریب تجربات کو شیئر کرنے، لڑکیوں کو تعلیم تک رسائی میں درپیش کثیر جہتی چیلنجوں پر تبادلہ خیال اور ان رکاوٹوں کو دور کرنے کے لیے اختراعی حل تلاش کرنے کے لیے ایک اہم پلیٹ فارم کے طور پر کام کرے گی۔ کانفرنس ستمبر 2024 میں منعقد ہوگی جبکہ اس کی حتمی تاریخوں کا اعلان جلد کیا جائے گا۔

یہ تقریب بچیوں کی تعلیم کے عالمی فروغ کی جانب ایک اہم قدم کی نشاندہی کرتی ہے جو اس اہم اقدام میں سب سے آگے رہنے کے لیے پاکستان کے عزم کو ظاہر کرتی ہے۔ اس طرح کی ایک اہم کانفرنس کی میزبانی کرکے پاکستان کا مقصد تعلیم پر عالمی مکالمے میں خاطر خواہ تعاون کرنا ہے اور دنیا بھر میں لڑکیوں کے لیے ایک زیادہ جامع اور مساوی تعلیمی منظر نامے کی طرف ایک راستہ بنانے میں مدد کرنا ہے۔

اسلامیہ یونیورسٹی بہاول پور نے پاکستان کی تحقیق، تعلیم اور ترقی کے شعبوں میں قومی اور عالمی سطح پر نمایاں خدمات انجام دے رہی ہے۔ فیکلٹی آف انجینئرنگ اسلامیہ یونیورسٹی بہاولپور کے سابق طالب علم حافظ محمد اظہر علی بشیر نے پاک چین سیٹلائٹ مشترکہ تعاون کے پروگرام میں نمایاں کردار ادا کیا ہے۔ حافظ محمد اظہر پاک سیٹ ایم ایم سیٹلائٹ PakSat-MM1  کے لیے مشترکہ ڈیزائن اور ڈویلپمنٹ ٹیم کے اہم رکن تھے۔ انہوں نے لوڈ انجینئر اور ٹیسٹ انجینئر کامیابی سے خدمات سرانجام دیں۔ انہوں نے چینی خلائی ادارے میں میں مختلف تیکنیکی مراحل کے دوران سیٹلائٹ سسٹم کی کارکردگی کو کامیابی کو یقینی بنانے کی ذمہ داری ادا کی۔ انہوں نے چین میں PakSat-MM1 سیٹلائٹ کی اسمبلی، انٹیگریشن اور ٹیسٹنگ کے مرحلے میں سرگرمی سے حصہ لیا اور  مدار میں ٹیسٹنگ کے مرحلے میں حصہ لیا۔

پاکستان کی خلائی ایجنسی، سپارکو نے 30 مئی 2024 کو پاک چائنا ایم ایم 1 کمیونیکیشن سیٹلائٹ کو خلا میں چھوڑا تھا۔ جدید ترین مواصلاتی ٹیکنالوجی سے لیس یہ سیٹلائٹ زمین کے 30 سے 35 فیصد حصے کو تیز رفتار سیٹلائٹ انٹرنیٹ خدمات فراہم کرے گا۔ یہ پڑوسی ممالک، پورے ایشیا، یورپ اور افریقہ کے کچھ حصوں میں مواصلاتی صلاحیتوں میں اضافہ کرے گا اور پاکستان کے دور دراز علاقوں کو تیز رفتار انٹرنیٹ فراہم کرے گا۔ توقع ہے کہ یہ پیشرفت پاکستان کی سیٹلائٹ انٹرنیٹ مارکیٹ میں گیم چینجر ثابت ہوگی اور اس سے فوج، ٹیلی کمیونیکیشن، موسم کی پیشن گوئی، تیل و گیس، این جی اوز اور اقوام متحدہ کے دفاتر سمیت مختلف شعبوں کو فائدہ پہنچے گا۔ وائس چانسلر پروفیسر ڈاکٹر نوید اختر، ڈین فیکلٹی آف انجینئرنگ پروفیسر ڈاکٹر محمد امجد، ڈین فیکلٹی آف اپلائیڈ ہیلتھ سائنسز پروفیسر ڈاکٹر سعید احمد، ڈائریکٹر ایلومینائی ڈاکٹر شاہد محمود اور فیکلٹی ممبران نے اس اہم ترین قومی خدمت اور جامعہ کا نام روشن کرنے پر پر ایلومینائی حافظ محمد اظہر بشیر اور انکی ہمشیرہ ڈاکٹر عائشہ بشیر چیئر پرسن شعبہ فزیوتھراپی اسلامیہ یونیورسٹی بہاولپور کو خراج تحسین پیش کیا اور مبارک باد دی ہے۔

سیکرٹری وفاقی وزارتِ تعلیم و پیشہ وارانہ تربیت محی الدین وانی نے کہا ہے کہ اساتذہ کا تعلیم کے فروغ میں انتہائی اہم کردار ہے، وزارت اساتذہ کی تربیت اور تعلیمی نظام میں جدت لانے پر کام کر رہی ہے۔ وہ پیر کو وفاقی وزارتِ تعلیم و پیشہ وارانہ تربیت کی پہلی وفاقی فاؤنڈیشنل لرننگ پالیسی کے اجرا کی تقریب سے خطاب کر رہے تھے۔ اس موقع پر ملک میں ابتدائی تعلیمی بہتری پر کام کرنے والے شرکا اور ساتھیوں کا شکریہ ادا کرتے ہوئے انہوں نے اساتذہ کے ساتھ تعاون کی ضرورت پر زور دیا کیونکہ ان کا تعلیمی عمل میں نہایت اہم کردار ہے۔ انہوں نے کہا کہ بچوں کیلئے سٹڈی پروگرام شروع کیا ہے جبکہ اساتذہ کی استعداد کار کو بہتر بنانے کیلئے بھی تربیتی پروگرام شروع کئے گئے ہیں۔

محی الدین وانی نے کہا کہ وفاقی سرکاری سکولوں میں نئی لائبریریاں بنانے کے ساتھ ساتھ کتابوں کی تعداد میں اضافہ کیا جا رہا ہے۔ انہوں نے امید ظاہر کی کہ اسلام آباد کےتمام سکولوں میں لائبریریاں آباد ہوں گی اور طلبا ڈیجیٹل سے ہٹ کر کتابوں کی طرف مائل ہوں گے۔ اس موقع پر انہوں نے فریال علی گوہر کو آئی سی ٹی میں ریڈنگ کے کلچر کے فروغ کے لئے ریڈنگ انوائے نامزد کیا۔انہوں نے کہا کہ ہم اس پالیسی کا نفاذ اس کی حقیقی روح کے ساتھ کریں گے جس میں تمام شراکت داروں کی شمولیت ہوگی اور جسے ہر علاقے کے مطابق ترتیب دیا جائے گا۔ تقریب میں اہم ڈویلپمنٹ پارٹنرز سمیت یونیورسٹی کے وائس چانسلرز، پارلیمنٹیرینز اور ملک میں تعلیم پر کام کرنے والی تنظیموں نے شرکت کی جبکہ تقریب کی میزبانی معروف مصنف اور سماجی کارکن فریال علی گوہر نے کی۔

تقریب میں سی ای او پاک الائنس فار میتھس اینڈ3 سائنس سلمان نوید خان نے وفاقی فاؤنڈیشنل لرننگ پالیسی 2024 کے آٹھ ستونوں کا جائزہ پیش کیا۔ پراجیکٹ ڈائریکٹر پاکستان فاؤنڈیشنل لرننگ ہب سام ولسن نے کہا کہ پالیسی بنانا آسان ہے لیکن اس کا نفاذ درحقیقت اصل کام ہے۔ ڈائریکٹر اکیڈیمکس وفاقی ڈائریکٹوریٹ آف ایجوکیشن رفعت جبین نے آئی سی ٹی میں ’’ریڈنگ آور پروگرام‘‘ کی کامیابی سے متعلق گفتگو کی اور وفاقی وزارتِ تعلیم و پیشہ وارانہ تربیت کی تعلیم کو بہتر بنانے اور سکولوں میں ریڈنگ کے کلچر کے فروغ کی کوششوں کی تعریف کی۔ سینئر اکانومسٹ ورلڈ بینک انگا آفاناسیووا نے3 آئی سی ٹی میں بچوں میں تعلیم کی کم سطح اور اساتذہ کی تعلیمی مواد سے متعلق کم علمی کو اجاگر کیا جو اکثر جانچے جانے پر اپنے ہی طلبا سے کم سکور حاصل کرتے ہیں۔

U.S. Chargé d’affaires Andrew Schofer

:قائم مقام امریکی سفیر اینڈریو شوفر نے چیئرمین ایچ ای سی ڈاکٹر مختار احمد اور یوٹاہ یونیورسٹی کے پروفیسرز کے ہمراہ اسلام آباد میں تین روزہ بین الاقوامی اجلاس کا افتتاح کیا۔اس اجلاس میں 180 سے زائد پاکستانی اور امریکی یونیورسٹیوں کے سربراہان اور اساتذہ کو اعلیٰ تعلیم کے معیار کو بہتر بنانے، طلباء کےلئے ملازمت کے مواقع فراہم کرنے اور شراکت داری قائم کرنے کے لئے اکٹھا کیا گیا۔ یہ سمٹ یو ایس اے آئی ڈی کی 19 ملین ڈالر مالیت کی ہائر ایجوکیشن سسٹم سٹرینتھننگ ایکٹیویٹی کا حصہ ہے جو 16 پاکستانی پبلک یونیورسٹیوں کو اعلیٰ تعلیم کے شعبے میں بہتری اور طلباء کو فراہم کی جانے والی خدمات کو بہتر بنانے میں معاونت کرتی ہے۔

امریکی چارج ڈی افیئرز اینڈریو شوفر نے پاکستان کی معاشی ترقی کو آگے بڑھانے میں اعلیٰ تعلیمی اداروں کے اہم کردار پر زور دیا۔ تقریب سے خطاب کرتے ہوئے انہوں نے کہاکہ پاکستان کی ترقی میں اعلیٰ تعلیمی اداروں کا اہم کردار ہے، جب یونیورسٹیاں مساوی تعلیم فراہم کرتی ہیں، نوجوانوں کو روزگار کے مواقع فراہم کرتی ہیں اور عملی تحقیق اور اختراع میں رہنمائی کرتی ہیں تو افراد اور معاشرہ دونوں خوشحال ہوتے ہیں۔چیئرمین ایچ ای سی ڈاکٹر مختار احمد نے یوٹاہ یونیورسٹی اور پاکستانی یونیورسٹیوں کے درمیان ہونے والے خیالات کے تبادلوں اور اس مضبوط شراکت داری کو سراہا۔

وزیراعظم محمد شہباز شریف نے پاکستانی نوجوان اسرار خان کو 2025 کیلئے آکسفورڈ یونین کا صدر منتخب ہونے پر دلی مبارکباد پیش کرتے ہوئے کہا ہے کہ انہوں نے پوری قوم کا سر فخر سے بلند کر دیاہے۔

پیر کو سماجی رابطے کی ویب سائٹ ایکس پر پوسٹ میں انہوں نے کہا کہ وہ اسرار خان کو ہیلری ٹرم 2025 کیلئے آکسفورڈ یونین کا صدر منتخب ہونے پر دلی مبارکباد پیش کرنے میں پاکستانی عوام کے ساتھ شامل ہیں۔یہ بلوچستان، پاکستان کے ایک طالب علم کے لیے بہت بڑی کامیابی ہے جبکہ محنت اور استقامت کی روشن مثال ہے۔

آکسفورڈ یونین کے نومنتخب صدر اور پاکستانی طالب علم اسرار خان نے منتخب ہونے پر وزیر اعظم شہباز شریف کے تہنیتی کلمات پر ان کا شکریہ ادا کیا ہے ۔ اسرار خان تیسرے پاکستانی اور صوبہ بلوچستان سے پہلے طالب علم ہیں جو اس عہدے پر فائز ہوئے ۔

اسرار خان نے بھی وزیراعظم کو اپنی مدت کے دوران آکسفورڈ یونین کے دورے کی دعوت دی۔پیر کو سماجی رابطے کی ویب سائٹ ایکس پر وزیر اعظم کے پیغام کے جواب میں اسرار خان نے کہا کہ وزیر اعظم شہباز شریف آپ کے پرخلوص کلمات کے لیے شکریہ اداکرتا ہوں ۔ پاکستان کی نمائندگی کرنا اعزاز کی بات ہے۔ مجھے اپنی مدت کے دوران آکسفورڈ یونین میں آپ کی میزبانی کرتے ہوئے خوشی ہوگی۔

انہو ں نے شہباز شریف کی بطور وزیراعلیٰ پنجاب شاندار اقدامات کو اجاگر کرتے ہوئے وزیراعظم سے پسماندہ پس منظر سے تعلق رکھنے والے طلباء کے لیے آکسفورڈ میں سکالرشپ سکیم کے قیام میں تعاون اور پاکستان میں طلبہ یونینز کی بحالی پر غور کرنے کی درخواست کی ۔ یہ نہ صرف طلباء کو یونیورسٹی کے معاملات میں آواز اٹھانے کے لیے ضروری ہے بلکہ بات چیت، بقائے باہمی اور اختلاف رائے کے احترام پر مبنی جمہوری کلچر کو فروغ دینے کے لیے بھی ضروری ہے۔