اوکاڑہ یونیورسٹی کے سنڈیکیٹ کا 26 واں اجلاس صوبائی وزیر برائے ہائر ایجوکیشن رانا سکندر حیات کی زیر صدارت منعقد ہوا، جس میں 11ویں اکیڈمک کونسل کی سفارشات کو متفقہ طور پر منظور کیا گیا۔ ان سفارشات کے تحت یونیورسٹی میں تین نئی فیکلٹیز اور سولہ نئے تعلیمی پروگرامز کا آغاز کیا جائے گا، جن میں انجینئرنگ اور مصنوعی ذہانت (آرٹیفیشل انٹیلیجنس) جیسے شعبے شامل ہیں۔
اجلاس کے آغاز پر وائس چانسلر پروفیسر ڈاکٹر سجاد مبین نے گزشتہ اجلاسوں کے فیصلوں پر عملدرآمد اور حالیہ تعلیمی و انتظامی اقدامات پر بریفنگ دی۔ اجلاس کا ایجنڈا ایڈیشنل رجسٹرار جمیل عاصم نے پیش کیا۔
سنڈیکیٹ نے ہنگامی اختیارات وائس چانسلر کو تفویض کرنے کے ضوابط کی منظوری دے دی۔ اب وائس چانسلر کو ایک سال تک پوسٹ ڈاکٹریٹ رخصت دینے کا اختیار حاصل ہوگا۔ وزیر ہائر ایجوکیشن اور دیگر ارکان نے اس حوالے سے وائس چانسلر پر مکمل اعتماد کا اظہار کیا۔ فنانس اینڈ پلاننگ کمیٹی اور اکیڈمک کونسل کے اجلاسوں کی کارروائیوں کی بھی توثیق کی گئی۔
یونیورسٹی میں اسٹیچوٹری آسامیوں کی تعیناتی کے لیے سرچ کمیٹی قائم کر دی گئی ہے جبکہ بی ایس 01 تا 16 کی انتظامی آسامیوں پر بھرتی کے لیے سلیکشن کمیٹی اور تدریسی و غیر تدریسی پوزیشنز کے لیے علیحدہ سکروٹنی کمیٹیاں تشکیل دی گئی ہیں۔ یونیورسٹی کے سلیکشن بورڈ کے 55ویں اجلاس کی سفارشات کو بھی منظور کر لیا گیا۔
سنڈیکیٹ نے صفائی، باغبانی، سیکیورٹی اور ٹرانسپورٹیشن کی سروسز کو آؤٹ سورس کرنے کی اجازت دی تاکہ معیار میں بہتری لائی جا سکے۔
اجلاس کے اختتام پر وزیر ہائر ایجوکیشن رانا سکندر حیات نے یتیم طلبہ کے لیے مفت تعلیم اور طلبہ کے لیے ٹرانسپورٹ سہولت کی توسیع جیسے دو نمایاں اقدامات پر وائس چانسلر کو سراہا۔ انہوں نے یونیورسٹی کو محکمہ اسکول ایجوکیشن کی مصنوعی ذہانت سے لیس ہوسٹنگ سروسز مفت فراہم کرنے کی بھی پیشکش کی۔ وائس چانسلر نے وزیرتعلیم اور سنڈیکیٹ کے تمام ارکان کا یونیورسٹی کے ترقیاتی اہداف میں تعاون پر شکریہ ادا کیا۔

یونیورسٹی آف انجینئرنگ اینڈ ٹیکنالوجی (یو ای ٹی) لاہور کے وائس چانسلر پروفیسر ڈاکٹر شاہد منیر نے چیئرمین ٹیکنیکل ایجوکیشن اینڈ ووکیشنل ٹریننگ اتھارٹی (ٹیوٹا) مہر شاہد زمان لک سے ملاقات کی، جس میں ملک میں جدید کمپیوٹر سکلز کے فروغ اور فنی تربیت کے شعبے میں باہمی تعاون پر تفصیلی گفتگو کی گئی۔ ملاقات کے دوران دونوں اداروں نے اس بات پر اتفاق کیا کہ یو ای ٹی اور ٹیوٹا مشترکہ طور پر ایسے پروگرامز کا آغاز کریں گے جن کے ذریعے نوجوانوں کو جدید آئی ٹی اور کمپیوٹر مہارتوں سے لیس کیا جا سکے۔ اس سلسلے میں ٹیوٹا کے جاری منصوبوں اور مستقبل کے پروگرامز کو یو ای ٹی کے تعلیمی و تحقیقی وسائل کے ساتھ منسلک کرنے پر بھی تبادلہ خیال کیا گیا۔

وائس چانسلر ڈاکٹر شاہد منیر نے کہا کہ آج کی ڈیجیٹل دنیا میں کمپیوٹر سکلز ہر طالبعلم کے لیے ناگزیر ہو چکی ہیں، اور یو ای ٹی ٹیوٹا کے ساتھ مل کر ملک میں مہارت پر مبنی تعلیم کے فروغ کے لیے ہر ممکن تعاون کرے گی۔اس موقع پر ڈین فیکلٹی آف الیکٹریکل انجینئرنگ ڈاکٹر محمد شعیب سمیت دیگر سینئر فیکلٹی ممبران بھی موجود تھے۔ یہ اشتراک نہ صرف طلباء کے کیریئر کے نئے مواقع پیدا کرے گا بلکہ قومی ترقی کے اہداف کے حصول میں بھی اہم سنگ میل ثابت ہوگا۔

وائس چانسلر پروفیسر ڈاکٹر محمد کامران کی جانب سے طلباء وطالبات پنچایت میں کئے گئے فیصلوں پر عملدرآمد کے سلسلے میں اسلامیہ یونیورسٹی بہاولپور کی کینٹینز میں معیاری اشیائے خورد و نوش کی فراہمی کے لئےاقدامات کا سلسلہ شروع ہو گیا ہے۔ میس اینڈ کینٹین کمیٹی نےپروفیسر ڈاکٹر محمد اختر چیئرمین اور ممبران پروفیسر ڈاکٹر شیر محمد ،ڈاکٹر فہیم مشتاق باجوہ، محمد عرفان اور معاون سٹاف کے ہمراہ یونیورسٹی کی کینٹین سہولیات کا اچانک معائنہ کیا۔ وائس چانسلر نے کمیٹی سے کہا ہے کہ طلباء اور عملے کو اعلیٰ معیار اور سستی خوراک کی خدمات فراہم کی جائیں۔ اسی طرح کھانے کا معیار اور تازگی، منظور شدہ ریٹ لسٹوں کی نمائش اور نفاذ، کچن اور سرونگ ایریا کی صفائی اور معیارات، پینے کے صاف پانی کی دستیابی اور کچرے کو مناسب طریقے سے ٹھکانے لگانا جیسے اقدامات شامل ہیں۔ کمیٹی نے فیڈ بیک جمع کرنے کے لیے طلباء سے بات چیت کی اور کھانے کے صاف اور صحت مند ماحول کو برقرار رکھنے کی اہمیت پر زور دیا۔  طلبہ کی نشاندہی پر شکایات دور کرنے کے لیے موقع پر ہی ہدایات جاری کی گئیں۔ یہ فعال اقدام طلباءوطالبات کی بہبود اور کیمپس میں محفوظ، غذائیت سے بھرپور سستی خوراک کی فراہمی کو یقینی بنانے کے لیے انتظامیہ کی مسلسل کوششوں کی عکاسی کرتا ہے۔  پائیدار معیار اور جوابدہی کو یقینی بنانے کے لیے باقاعدہ معائنہ جاری رہے گا۔

لاہور(2 جون،سوموار): سینٹر فار ورلڈ یونیورسٹیز رینکنگ (CWUR)کی تازہ رپورٹ میں جامعہ پنجاب نے ملک بھر میں چوتھی پوزیشن حاصل کر کے اپنی ساکھ کو مزید مستحکم کر لیا ہے۔اس کامیابی پر وائس چانسلر ڈاکٹر محمد علی نے کہا ہے کہ یہ ایک تاریخی سنگ میل ہے کیونکہ اس سے قبل جامعہ پنجاب نے بین الاقوامی رینکنگ میں ایسی ممتاز حیثیت حاصل نہیں کی تھی۔انہوں نے کہا کہ یہ کامیابی ہمارے اساتذہ، تحقیق میں مصروف طلبہ و طالبات اور جامعہ کے ہر اس فرد کی انتھک محنت اور لگن کا نتیجہ ہے جو جامعہ پنجاب کو علمی، تحقیقی اور تدریسی میدان میں ایک پرامن، مستحکم اور فعال ادارہ بنانے میں مصروف ہیں۔ انہوں نے کہا کہ ہمارا سفر یہاں ختم نہیں ہوتا ابھی ہمیں بہت آگے جانا ہے، ہمارا ہدف ہے کہ جامعہ پنجاب کو مالی طور پر خود کفیل بنایا جائے اسے تحقیق کے میدان میں صف اول کی یونیورسٹیوں میں شامل کیا جائے اور جدید ٹیکنالوجی و سہولیات سے آراستہ کیا جائے۔انہوں نے کہا کہ ہم سب اس خواب کو حقیقت بنانے کے لئے ایک ٹیم کی طرح کام کر رہے ہیں۔ انہوں نے کہا کہ پنجاب یونیورسٹی سے وابستہ ہر انسان اس کامیابی پر مبارکباد کا مستحق ہے۔

 یونیورسٹی آف انجینئرنگ اینڈ ٹیکنالوجی لاہور نے اعلیٰ تعلیم کے فروغ کیلئے ماڈل ٹاؤن میں اپنی ایکسٹنشن “انسٹیٹیوٹ آف مشین لرننگ، آرٹیفیشل انٹیلیجنس اور سائبر سکیورٹی” قائم کر دیا۔ وائس چانسلر ڈاکٹر شاہد منیر نے انسٹیٹیوٹ کا افتتاح کیا۔ یہ ایکسٹنشن فیکلٹی آف الیکٹریکل انجینئرنگ کے زیر انتظام کام کرے گا۔ تقریب میں انسٹیٹیوٹ کے پہلے تعلیمی سیشن کے طلباء و طالبات کے لیے ویلکم کا بھی انعقاد کیا گیا۔ طلباء سے خطاب کرتے ہوئے ڈاکٹر شاہد منیر نے کا کہنا تھا کہ یہ انسٹیٹیوٹ نہ صرف طلباء کو جدید علوم جیسے مصنوعی ذہانت، مشین لرننگ، سائبر سکیورٹی اور ڈیٹا سائنس میں معیاری تعلیم فراہم کرے گا بلکہ یہاں جدید لیبارٹریز، ریسرچ سینٹرز، انڈسٹری پارٹنرشپس، اور عملی منصوبوں کے مواقع بھی دستیاب ہوں گے۔ انہوں نے مزید کہا کہ طلباء کو فیکلٹی کی سرپرستی میں عالمی معیار کی تحقیق اور اختراع کے ماحول میں سیکھنے کا موقع میسر آئے گا۔ ہمارا مقصد ایسے گریجویٹس تیار کرنا ہے جو نہ صرف مقامی بلکہ عالمی سطح پر بھی تکنیکی میدان میں اپنا مقام بنا سکیں۔ انسٹیٹیوٹ میں دو سالہ ایسوسی ایٹ ڈگری پروگرام، ماسٹرز (ایم ایس) پروگرام، اور ویک اینڈ سپیشلائزڈ کورسز کا آغاز کر دیا گیا ہے۔ اب طلباء کمپیوٹر سائنس، آرٹیفیشل انٹیلیجنس، سائبر سکیورٹی، ڈیٹا سائنس، بائیو میڈیکل اور الیکٹریکل انجینئرنگ جیسے جدید شعبہ جات میں خصوصی تعلیم حاصل کر سکیں گے۔

افتتاحی تقریب میں پرو وائس چانسلر، ڈینز، ڈاکٹر محمد شعیب، ڈاکٹر شازیہ، ٹریژرر، پبلک ریلیشنز آفیسر، عائشہ الطاف، ڈاکٹر جنید ارشد، ڈاکٹر فائزہ اقبال اور نئے داخل ہونے والے طلباء و طالبات کی بڑی تعداد نے شرکت کی۔

میکسیکو دنیا کا پہلا اور واحد ملک بننے جا رہا ہے جہاں اتوار کو ووٹرز خود اپنے تمام ججوں کو منتخب کریں گے۔ حالانکہ یہ بحث بھی جاری ہے کہ آیا یہ اصلاحالات عدالتوں کے اثر و رسوخ کو کم کریں گے یا مضبوط کریں گی۔

میکسیکو میں اتوار کو ووٹرز کئی ہزار وفاقی، ضلعی اور مقامی ججوں اور مجسٹریٹوں کا انتخاب کریں گے، جب کہ بقیہ ججوں کے لیے ایک اور الیکشن 2027 میں کرایا جائے گا۔

حکومت کا کہنا ہے کہ ہر سطح پر ججوں اور مجسٹریٹوں، بشمول سپریم کورٹ کے لیے یہ غیر معمولی رائے دہندگی بدعنوانی اور بعض افراد کو حاصل استثنیٰ سے نمٹنے کے لیے ضروری ہے۔ناقدین کا کہنا ہے کہ یہ عمل عدلیہ کی آزادی کو مجروح کرے گا۔ انہوں نے متنازعہ امیدواروں، مثلاﹰ بدنام زمانہ منشیات کے اسمگلر وکیل جوکون گزمین، کی شرکت پر متنبہ کیا ہے۔ ان کا کہنا ہے کہ اس سے فائدہ کے بجائے نقصان ہو گا۔

لیکن ان عہدوں کے انتخاب میں ہر کوئی امیدوار نہیں ہو سکتا ہے۔ امیدوار کو قانون کی ڈگری، قانونی امور میں تجربہ، “اچھی ساکھ” کا حامل ہونا چاہیے اور کوئی مجرمانہ ریکارڈ نہیں ہونا چاہیے۔مخالفین بشمول عدالتی کارکنان ان اصلاحات کو روکنے کی ناکام کوشش میں بڑے پیمانے پر سڑکوں پر احتجاج کر رہے ہیں۔ایک 28 سالہ وکیل اولمپیا روزاس لوویانو نے کہا،”انصاف ایسی چیز نہیں ہے جیسا کہ آپ ووٹ کے ذریعہ نمائندہ منتخب کرتے ہیں بلکہ اس کے لیے تجربہ اور خصوصی علم رکھنے والے افراد کی ضرورت ہوتی ہے۔”

لیکن ماریا ڈیل روکیو مورالس، جو دارالحکومت میں مجسٹریٹ بننے کے لیے بطور امیدوار قسمت آزما رہی ہیں، نے کہا کہ وہ الیکشن میں حصہ لینے پر خوش ہیں۔نہوں نے کہا، “اپنے شہر اور اپنے ملک کی بھلائی کے لیے، میں یہ کروں گی۔”صدر کلاڈیا شین بام نے ان خبروں کو مسترد کر دیا ہے کہ بہت سے ووٹروں کے ووٹنگ میں حصہ لینے کا امکان نہیں ہے۔انہوں نے کہا،” لوگ بہت ذہین ہیں اور جانتے ہیں کہ وہ کس کو ووٹ دینے جا رہے ہیں۔”

نیا نظام کیسے کام کرے گا

سپریم کورٹ کی تمام نو نشستوں کے ساتھ ساتھ 19 ریاستوں میں تقریباً 1,800 مقامی عہدوں سمیت تقریباً 900 وفاقی عہدوں کے لیے اتوار کو ووٹ ڈالے جائیں گے۔ ووٹنگ کا دوسرا مرحلہ 2027 میں ہو گا۔ان نئے اصلاحات کے نفاذ سے پہلے، سپریم کورٹ کے ججوں کو صدر کے ذریعے نامزد کیا جاتا تھا اور سینیٹ میں ان کی منظوری دی جاتی تھی، جب کہ وفاقی ججوں کا انتخاب ایک عدالتی کمیشن کے ذریعے امتحانات اور انٹرویو کے ذریعے کیا جاتا تھا جو امیدواروں کی صلاحیت اور قابلیت کی جانچ کرتی تھی۔نئے نظام میں، وفاقی امیدواروں کو حکومت کی تینوں شاخوں کی تشخیصی کمیٹیوں کے ذریعے جانچنے اور نامزد کرنے کے بعد عوام کے ذریعے منتخب کیا جائے گا۔میکسیکو کی انتخابی اتھارٹی کے مطابق، دوسرے انتخابات کے برعکس، عدالتی عہدے کے لیے انتخاب لڑنے والوں کو کسی بھی سیاسی جماعت کی طرف سے نامزد یا حمایت نہیں کی جا سکتی ۔ وہ پبلک یا پرائیویٹ فنڈنگ ​​بھی حاصل نہیں کر سکتے ہیں، یعنی انہیں اپنی مہم کی مالی اعانت خود کرنی ہو گی-

اصلاحات کے حامیوں کا کہنا ہے کہ اس شرط کی وجہ سے سیاسی عناصر کے انتخابات کو متاثر کرنے کے امکانات کم ہو جائیں گے، لیکن ناقدین کا کہنا ہے کہ نئے اصلاحات امیر امیدواروں کے حق میں ہیں۔امیدواروں کو ٹی وی یا ریڈیو پر مہم کے اشتہارات خریدنے سے بھی منع کیا گیا ہے، لیکن وہ سوشل میڈیا پر یا انٹرویوز اور دیگر فورمز کے ذریعے اپنی تشہیر کر سکتے ہیں۔ایک بار عہدہ سنبھالنے کے بعد، منتخب ججوں کا جائزہ ایک نئے قائم کردہ جوڈیشل ڈسپلنری ٹریبونل کے ذریعے کیا جائے گا، جس کے پاس سپریم کورٹ کے ججوں اور الیکٹورل مجسٹریٹس کے علاوہ عدالتی عملے کی تحقیقات اور منظوری دینے کا اختیار ہو گا۔ ان میں سے کچھ معاملات میں معطل کرنے، مالی جرمانہ عائد کرنے، برطرف اور نااہل قرار دینے کے اختیارات بھی شامل ہیں۔

جرمنی کو اس وقت تربیت یافتہ افرادی قوت کی شدید کمی کا سامنا ہے، اور تقریباً 7 لاکھ ملازمتیں مختلف شعبوں میں خالی پڑی ہیں۔ اس ہنرمند افراد کی کمی پر ردِعمل ظاہر کرتے ہوئے جرمنی کے وزیرِ معیشت، رابرٹ ہیبک نے ایک نیوز کانفرنس میں کہا: “ہمارے پاس ہاتھ بھی کم ہیں اور دماغ بھی۔” اس بیان کی وضاحت کرتے ہوئے انہوں نے مزید کہا کہ ملازمتوں کی اتنی بڑی تعداد میں خالی ہونے کی ایک اہم وجہ جرمنی کی عمر رسیدہ آبادی اور پیشہ ورانہ تربیت (ووکیشنل ٹریننگ) کی کمی ہے، جس کے نتیجے میں ہنر یافتہ افراد دستیاب نہیں ہو رہے۔

رپورٹس کے مطابق، جرمنی کے کئی شعبوں جیسے ٹرانسپورٹ، صحت عامہ، انفارمیشن ٹیکنالوجی، اور انجینئرنگ میں مہارت یافتہ افراد کی شدید قلت دیکھی جا رہی ہے۔

جرمنی کی ورک کلچر (کام کرنے کے انداز) کی خصوصیات

جرمنی کی ورک کلچر نظم، وقت کی پابندی، مہارت، اور کارکردگی جیسی اقدار پر مبنی ہے، جو اسے دنیا کی ایک بڑی معاشی طاقت بناتی ہے۔ یہ منظم طرزِ عمل ہر شعبے میں رائج ہے، جہاں واضح توقعات اور منظم ورک فلو ایک عام روایت ہیں۔ جرمن ملازمین اور مالکان وقت کی پابندی، بھروسا مندی، اور اعلیٰ معیار کی کارکردگی کو پیشہ ورانہ کامیابی کی بنیاد سمجھتے ہیں۔

جرمن دفاتر کی ایک نمایاں خوبی ان کا کام اور ذاتی زندگی کے درمیان توازن پر زور دینا ہے۔ سخت لیبر قوانین اور کام کے اوقات کی باقاعدہ حدود کی وجہ سے پیشہ ور افراد کو اپنی فلاح و بہبود کو بھی ترجیح دینے کی ترغیب دی جاتی ہے۔ لچکدار کام کے اوقات اور فراخ دلانہ چھٹیوں کی سہولت اس توازن کی عکاسی کرتی ہے، جس سے صحت مند اور مؤثر افرادی قوت تشکیل پاتی ہے۔

تعاون بھی جرمن ورک کلچر کا ایک اہم جز ہے۔ اگرچہ تنظیمی ڈھانچے موجود ہیں، لیکن اکثر یہ زیادہ سخت نہیں ہوتے، جس سے کھلا رابطہ اور ٹیم ورک ممکن ہوتا ہے۔ خاص طور پر آئی ٹی اور انجینئرنگ جیسے شعبوں میں ملازمین کو اپنی تجاویز اور جدتیں پیش کرنے کی بھرپور حوصلہ افزائی کی جاتی ہے، کیونکہ یہ شعبے جدید حل پر انحصار کرتے ہیں۔

بین الاقوامی پیشہ ور افراد، خصوصاً آئی ٹی کے میدان میں، اگر جرمنی میں بہتر مواقع چاہتے ہیں تو انہیں یہاں کی ورک کلچر کو سمجھنا اور اپنانا بہت ضروری ہے۔ روایات کا احترام کرتے ہوئے نئے خیالات کے ساتھ آگے بڑھنا، جرمنی کی منظم مگر جدید معیشت میں کامیابی کے مواقع فراہم کرتا ہے۔

بشکریہ اڈس ٹیلر

لاہور30 – مئی:…… وزیراعلیٰ پنجاب مریم نواز شریف نے لیہ میں لیپ ٹاپ اور ہونہار سکالر شپ کے چیک کی تقسیم کی تقریب میں اہم اعلانات کیے۔ وزیراعلیٰ مریم نوازشریف نے لیہ میں میڈیکل کالج قائم کرنے اور کلاسز شروع کرنے کا اعلان کیا۔ وزیراعلیٰ مریم نوازشریف نے ڈیرہ غازی خان اور لیہ کی یونیورسٹیوں کے لئے تین ارب روپے کے تاریخی فنڈز کا اعلان کیا۔ وزیراعلیٰ مریم نوازشریف نے ڈیرہ غازی خان اور لیہ میں نوازشریف سینٹرآف ایکسی لینس برائے ”ارلی چائلڈ ہوڈ ایجوکیشن“بنانے کا اعلان کیا۔ وزیراعلیٰ مریم نوازشریف کا110ارب روپے کے خطیر فنڈ سے پنجاب کے تمام سکولوں میں کلاس روم، ٹائلٹ اور دیگر بنیادی سہولتوں کی فراہمی کوایک سال میں مکمل کرنے کا اعلان بھی کیا۔ وزیراعلیٰ مریم نوازشریف نے اعلان کرتے ہوئے کہا کہ اب پنجاب کا کو ئی سکول ضروری سہولتوں سے محروم نہیں رہے گا۔وزیراعلیٰ مریم نوازشریف نے آپریشن بنیان مرصوص میں کامیابی پر آرمی چیف فیلڈمارشل سید عاصم منیر کو مبارکباد دی۔ وزیراعلیٰ مریم نوازشریف نے طلبہ کی طرف سے ایئر چیف بابر ظہیر سندھو کوبھی مبارکباد پیش کی اور تمام طلبہ کی طرف سے پاک فوج کے افسروں اور جوانوں اور دیگر اداروں کو خراج تحسین پیش کیا۔)

وزیراعلیٰ مریم نوازشریف نے تقریب سے خطاب کرتے ہوئے کہا کہ نوجوان سیسہ پلائی دیوار بن جائیں تودنیا کی کوئی طاقت پاکستان کو ہار نہیں سکتی۔ آبادی اور وسائل کے لحاظ سے چھوٹاملک ہونے کے باوجود جذبے سے کئی گنا بڑے ملک کوشکست دی۔ جو کہتے تھے رافیل کوئی نہیں گراسکتا، ہم نے جے ایف تھنڈر سے مار گرایا۔نوجوان اپنی طاقت پہنچانیں اپنی قوم کے لئے خود بنیان مرصوص بنیں۔ وزیراعلیٰ مریم نوازشریف نے کہا کہ 28مئی 1998ء کو نوازشریف نے ملک کوایٹمی طاقت بنایا، اب دشمن میں حملے کی جرأت نہیں۔ جو بڑی طاقتوں سے نہیں ڈرتا وہی سچا لیڈر ہوتا ہے۔ وزیراعلیٰ مریم نوازشریف نے کہا کہ کامیابی پر طلبہ، اساتذہ اور ان کے والدین کو مبارکباد پیش کرتی ہوں، سب سے میں خوش ہوں۔ ہر طالب علم کی کامیابی پر بچوں کو ملنے والی خوشی سے زیادہ خوش ہوتی ہوں۔ میرے بچوں کے پاس وسائل ہیں لیکن وسائل نہ ہونے کے باوجود پڑھنے والے بچے قابل تحسین ہیں۔ حکومت کے سارے وسائل اپنے بچوں کے سامنے رکھنا چاہتی ہوں۔وزیراعلیٰ مریم نوازشریف نے کہا کہ والدین کے پاس وسائل نہ ہوتو ریاست کو ماں بن کر سوچنا چاہیے۔محنت کرکے اچھا رزلٹ لینے والے ہر بچے کے پاس ریاست خود پہنچے گئی۔

ہونہار سکالرشپ 30ہزار سے 50ہزار اور لیپ ٹاپ 40ہزار سے ایک لاکھ کر دیئے تاکہ بچوں کو کسی کا محتاج نہ ہونا پڑے۔طلبہ میرا شکریہ ادا نہ کرے میں تو صرف ان کا حق ان تک پہنچارہی ہوں۔ والدین کی دعائیں اور آپ کے خواب پورے کرنے کے لئے میں ہوں۔ وزیراعلیٰ مریم نوازشریف نے کہا کہ ابھی پہلا سال گزرا ہے،جیسے جیسے وقت گزرے گا طلبہ کے لئے مزید بہتری لائیں گے۔ پنجاب کا کوئی بچہ وسائل نہ ہونے کی وجہ سے تعلیم سے محروم نہیں رہے گا۔ 6 ماہ میں پاکستان کا پہلا تاریخی ارلی چائلڈ ہوڈ ایجوکیشن سنٹر بنایا۔ دن رات عوام کے لئے سوچتی ہوں اور رات 12 بجے تک کام کرتی رہتی ہوں۔ ۔وزیراعلیٰ مریم نوازشریف نے کہا کہ قوم کو میزائل نہیں فتنے تباہ کرتے ہیں۔ نوجوانوں کو غلط راستے پر ڈالنے والے ان کو تباہ کرتے ہیں۔شہداء کی قبریں روندنے والے تاریخ کے کچرا دانوں میں جاتے ہیں۔ اپنے اداروں کی عزت کرنے والے سر اٹھا کر جیتے ہیں۔ وردی پہننے والے ملک کی حفاظت پر قربان ہوگئے ہیں۔وردی جلانے والوں نے دراصل ملک و قوم کے وقار پر ناپاک حملہ کیا۔ وزیراعلیٰ مریم نوازشریف نے کہا کہ نوجوانوں کو کہتی ہوں کہ ملک اور قوم کے خلاف کبھی نہیں جانا۔ ادارے آپ کے اپنے ہیں، یادگاریں آپ کی ہیں اور میٹرو بس بھی ہم سب کی ہے۔ فتنہ فساد پھیلانے والوں کی باتوں میں کبھی نہیں آنا، جو ان کی باتوں میں آگئے وہ جیلوں میں پڑے ہیں۔ وزیراعلیٰ مریم نوازشریف نے کہا کہ اپنے بچے باہر اور دوسرے کے بچوں کو فتنہ فساد پر لگا دیا ہے۔10,9اور28 مئی نے بتایا دیا کون ڈویلپمنٹ اور ڈیفنس کے ساتھ ہے اور کون ڈس ٹرکشن کے ساتھ کھڑا ہے۔سب جاتنے ہیں کہ 9 مئی کو کیا گیا اور10 مئی کو کیا گیا،دونوں کیا فرق تھا۔