ہائر ایجوکیشن کمیشن (HEC) پاکستان کی جانب سے آج “پاکستان ڈیجیٹل لیپ” کے عنوان سے ایک تاریخی اور سنگِ میل ایونٹ کا انعقاد کیا گیا، جو پاکستان میں اعلیٰ تعلیم کے شعبے کو ڈیجیٹل بنانے کی جانب ایک اہم پیش رفت ثابت ہوا۔تقریب میں معزز وائس چانسلرز، کارپوریٹ سیکٹر کے نمائندگان اور اعلیٰ تعلیمی شعبے کے دیگر اہم اسٹیک ہولڈرز نے شرکت کی، جنہوں نے جدید ٹیکنالوجی پر مبنی انفراسٹرکچر کی رونمائی دیکھی جو ملک بھر کے لاکھوں طلبہ کے لیے تعلیم کے میدان میں انقلابی تبدیلی لائے گا۔
ایونٹ میں ایچ ای ڈی پی (HEDP) منصوبے کے تحت ورلڈ بینک کے تعاون سے ایچ ای سی کی جانب سے نافذ کردہ نمایاں اسٹریٹیجک آئی ٹی اقدامات کو پیش کیا گیا۔ اس منصوبے نے ملک بھر کے 60 لاکھ طلبہ کی زندگیوں پر مثبت اثرات مرتب کیے ہیں۔ اس موقع پر چیئرمین ایچ ای سی ڈاکٹر مختار احمد نے تاریخ رقم کرتے ہوئے ہولوگرافک اوتار کے طور پر ایونٹ کی میزبانی کی، جو پاکستان کی تاریخ میں پہلی بار ہوا۔\
ایچ ای سی کے اسٹریٹیجک آئی ٹی منصوبوں میں درج ذیل اقدامات شامل ہیں:
- Astrolabes ڈیٹا سینٹرز
- As-Sadeem کلاؤڈ کمپیوٹنگ سلوشنز
- Al-Meissa ہائی پرفارمنس کمپیوٹنگ
- Maktab ERP-SLCS
- Al-Fihri لرننگ مینجمنٹ سسٹم
- Jidar نیٹ ورک سیکیورٹی
- اسمارٹ کلاس رومز
یہ اقدامات پاکستان کے اعلیٰ تعلیمی اداروں میں عالمی معیار کی تعلیم اور مہارتیں فراہم کرنے میں مدد دیں گے۔ ایونٹ میں HEC کی کامیابیوں کو اجاگر کرنے کے لیے ڈیجیٹل انفراسٹرکچر کی شاندار نمائش بھی کی گئی جس میں شامل ہیں:
- 7000 کلومیٹر فائبر آپٹک نیٹ ورک
- 96 اداروں میں 20,000 وائی فائی پوائنٹس
- متعدد دیگر آئی ٹی خصوصیات
ایچ ای سی کی جانب سے شروع کردہ 25 جامعات کے پائلٹ پروجیکٹ کی کامیابی نے پورے ملک کی سرکاری جامعات میں ان آئی ٹی اقدامات کے نفاذ کی مانگ پیدا کر دی ہے۔اس موقع پر چیئرمین ایچ ای سی ڈاکٹر مختار احمد نے کہا:
“ہم نے پاکستان کی جامعات اور طلبہ کو وہ ٹیکنالوجی فراہم کی ہے جس کی انہیں سخت ضرورت تھی۔ ان ٹیکنالوجیز کی بدولت ہمارے طلبہ دنیا کی بہترین یونیورسٹیوں سے مقابلہ کر سکیں گے اور ادارے اپنی لاگت میں بھی کمی لا سکیں گے۔”
