:پنجاب یونیورسٹی لائبریری بک کلب کے زیر اہتمام مطالعہ کی عادات کو فروغ دینے کیلئے دو کتابوں پر تعارفی گفتگو پیش کی گئی جس میں مارشل بی روزنبرگ کی ”نن وائلنٹ کمیونیکیشن” اورڈاکٹر اکمل سومرو کی ”برطانوی استعماریت، نو آبادیات،رد نوآبادیت اور جدیدیت کا مطالعہ“ شامل تھیں۔تقریب میں چیف لائبریرین ڈاکٹر محمد ہارون عثمانی، انسٹیٹیوٹ آف ایڈمنسٹریٹو سائنسز کے اسسٹنٹ پروفیسر ڈاکٹر طیب علی خان، انسٹیٹیوٹ آف انگلش لینگویج اینڈ لٹریچر کے ایسوسی ایٹ پروفیسر ڈاکٹر شاہ زیب خان، فیکلٹی ممبران اور طلباؤ طالبات نے شرکت کی۔ اس موقع پر ڈاکٹر طیب نے انگریزی تصنیف پر سیر حاصل بات چیت کرتے ہوئے ہمدردانہ ابلاغیات کے اصولوں پر روشنی ڈالی جیسا مصنف کی جانب سے بیان کیاگیا۔انہوں نے اس بات پر زور دیا کہ ہمدردانہ بات چیت سے تنازعات کو کیسے حل کیا جا سکتا ہے اور بامعنی روابط استوار کیے جا سکتے ہیں۔ دریں اثناء اردو کتاب ”برطانوی استعماریت“ پربات چیت کرتے ہوئے ڈاکٹر شاہ زیب خان نے نوآبادیات، نوآبادیاتی نظام اور جدیدیت کی پیچیدگیوں پر روشنی ڈالی۔ انہوں نے عصری سماجی و سیاسی فریم ورک کے اندر تاریخی بیانیے کو بھی سیاق و سباق میں پیش کیا جس سے جنوبی ایشیا میں استعمار کی میراث بارے شرکاء میں بحث کو ہوا دی گئی۔ ڈاکٹر ہارون عثمانی نے تقریب کو کامیاب بنانے، پڑھنے اور تنقیدی سوچ کے کلچر کو فروغ دینے پر مقررین اور حاضرین کا شکریہ ادا کیا۔
پنجاب یونیورسٹی فیکلٹی ممبران کی انٹر پرینیورئل کوچز ٹریننگ پروگرام میں شرکت
پنجاب یونیورسٹی ہیلی کالج آف کامرس کے فیکلٹی ممبران یورپین یونین۔ فنڈڈ ٹریننگ پروگرام میں شرکت کرتے ہوئے سرٹیفائیڈ انٹرپرینیورئل کوچز بن گئے۔ اس سلسلے میں ڈائریکٹر انٹرنیشنل آفس ڈاکٹر سعدیہ فاروق اورڈپٹی ڈائریکٹر حافظ فواد علی نے رفاہ انٹرنیشنل یونیورسٹی لاہور میں 3 روزہ سرٹیفائیڈ انٹرپرینیورئل کوچ ٹریننگ کامیابی سے مکمل کی۔ پروگرام کو یوروپی یونین کے تعاون سے مالی اعانت فراہم کی گئی تھی، جس میں شرکاء کی کاروباری ذہنیت کو پروان چڑھانے اور ابھرتے ہوئے کاروباری رہنماؤں بارے معاونت کی گئی۔ اس دوران ڈاکٹر سعدیہ فاروق اور فواد علی نے کوچنگ کی تکنیکوں، کاروباری حکمت عملیوں اور افراد کو اپنے کاروباری عزائم کو آگے بڑھانے کے لیے بااختیار بنانے کے لیے عملی ٹولز کے بارے میں بھرپورمعلومات حاصل کیں۔ اس تربیت کے بعد فیکلٹی ممبران مصدقہ کاروباری کوچز کے طور پرخواہشمند کاروباری افراد کی رہنمائی کر سکیں گے جس سے پنجاب یونیورسٹی ہیلی کالج کی کمیونٹی میں جدت اور تخلیقی صلاحیتوں کو پروان چڑھانے کی کوششوں میں مزید اضافہ ہوگا۔
