قرآن کے میسج کو سمجھنے اورمسلم ممالک کے مابین روابط کو مضبوط کرنے کیلئے عربی زبان کا فروغ ضروری ہے، ڈاکٹر محمد علی۔۔۔۔۔۔۔۔ پنجاب یونیورسٹی شعبہ عربی کے زیر اہتمام عربی زبان کے عالمی دن پر ’آپ بیتی۔عربی ادب میں‘ کے موضوع پردو روزہ بین الاقوامی کانفرنس ۔۔۔۔۔۔۔۔  سعودی عرب، اردن، فلسطین، عراق، مصر، الجزائراور پاکستان سے مندوبین، محققین، فیکلٹی ممبران اور طلباؤطالبات نے بڑی تعداد میں شر کت کی۔

وائس چانسلر پنجاب یونیورسٹی پروفیسر ڈاکٹر محمد علی نے کہا ہے کہ قرآن پاک کے میسج کو سمجھنے اورمسلم ممالک کے مابین روابط کو مضبوط کرنے کے لئے عربی زبان کا فروغ ضروری ہے۔ وہ پنجاب یونیورسٹی شعبہ عربی کے زیر اہتمام عربی زبان کے عالمی دن پر ’آپ بیتی۔عربی ادب میں‘ کے موضوع پرالرازی ہال میں منعقدہ دو روزہ بین الاقوامی کانفرنس کے افتتاحی سیشن سے خطاب کررہے تھے۔ اس موقع پرپرووائس چانسلر پروفیسر ڈاکٹر خالد محمود، ڈین فیکلٹی آف اورینٹل لرننگ پروفیسر ڈاکٹر محمد کامران، پرنسپل اورینٹل کالج پروفیسر ڈاکٹر نبیلہ رحمان، چیئرمین شعبہ عربی پروفیسر ڈاکٹر حامد اشرف ھمدانی، سعودی عرب، اردن، فلسطین، عراق، مصر، الجزائراور پاکستان سے مندوبین، محققین، فیکلٹی ممبران اور طلباؤطالبات نے بڑی تعداد میں شر کت کی۔ اپنے خطاب میں وائس چانسلر پروفیسر ڈاکٹر محمد علی نے کہا کہ مسلم امہ کی مضبوطی، اتحاد اوریکجہتی کیلئے عربی زبان بہت اہمیت کی حامل ہے۔انہوں نے کہا کہ ہمارے پاس جو ہے وہ تقسیم کرکے معاشرے کو بگاڑ سے بچانا چاہیے اوراللہ تعالیٰ کی تقسیم پر راضی رہنا چاہیے۔ انہوں نے کہا کہ ہمیں فرقہ واریت سے باہرنکلنا ہوگا تاکہ اسلامی،فلاحی اورمثبت سوچ کے ساتھ مملکت کو اکٹھا کیا جاسکے۔ انہوں نے کہا کہ برصغیر میں اسلام کی ترویج کیلئے صوفیاء کا کردار ناقابل ِ فراموش ہے۔ انہوں نے بہترین کانفرنس کے انعقاد پر منتظمین کی کاوشوں کو سراہا۔ پروفیسر ڈاکٹر محمد کامران نے کہا کہ اردو اور عربی زبان کا آپس میں گہرا تعلق ہے۔ انہوں نے کہا کہ آپ بیتی لکھنا ایک مشکل کام ہے۔ انہو ں نے کہا کہ علمی و باہمی روابط کو فروغ دینے، ایک دوسرے کے تجربات سے سیکھنے اور طلباء کے علم میں اضافہ کے لئے ایسی سرگرمیوں کا انعقاد خوش آئند ہے۔ پروفیسر ڈاکٹر نبیلہ رحمان نے کہا کہ کانفرنس میں پیش کیا جانے والا لٹریچر، آئیڈیاز اور موضوعات شاندار ہیں۔ انہوں نے کہا کہ آپ بیتی ہمیں یاد دلاتی ہے کہ ادب کا تعلق صرف خیال سے نہیں بلکہ حقیقت سے بھی ہے۔ پروفیسر ڈاکٹر حامد اشرف ھمدانی نے کہا کہ عربی زبان کے عالمی دن پر دو روزہ کانفرنس میں وائس چانسلرڈاکٹر محمد علی،ملکی و غیر ملکی مندوبین، محققین، اساتذہ اور طلباء کو خوش آمدید کہتے ہیں۔انہوں نے کہا کہ کانفرنس میں 65سے زائد تحقیقی مقالے پیش کئے جائیں گے۔کانفرنس بروز جمعرات (آج) بھی جاری رہے گی۔