پنجاب یونیورسٹی انسٹیٹیوٹ آف اپلائیڈ سائیکالوجی کے زیر اہتمام مسلم سائیکالوجی پر کانفرنس کا انعقاد

پنجاب یونیورسٹی انسٹیٹیوٹ آف اپلائیڈ سائیکالوجی کے زیراہتمام سوسائٹی فار ایڈوانسمنٹ آف مسلم سائیکالوجی،پاکستان سائیکالوجیکل ایسوسی ایشن لاہور چیپٹر اور فاؤنٹین ہاؤس کے اشتراک سے بیسویں ’مسلم سائیکالوجی کانفرنس‘ کاانعقاد کیاگیا۔ اس موقع پر وائس چانسلر پنجاب یونیورسٹی پروفیسر ڈاکٹر محمد علی، ڈائریکٹر انسٹیٹیوٹ آف اپلائیڈ سائیکالوجی اور پی پی اے کی صدر پروفیسر ڈاکٹر رافعہ رفیق، سوسائٹی فار ایڈوانسمنٹ آف مسلم سائیکالوجی کے صدر ڈاکٹر امجد طفیل، نامور ماہرینِ نفسیات، محققین، فیکلٹی ممبران اورطلباؤطالبات نے بڑی تعداد میں شرکت کی۔ اپنے خطاب میں وائس چانسلرپروفیسر ڈاکٹر محمد علی نے کہا کہ نفسیات ایک نہایت اہم مضمون ہے۔ انہوں نے موضوع پر تفصیل سے روشنی ڈالتے ہوئے پاکستان میں مسلم سائیکالوجی اور ذہنی صحت کے فروغ پر پُراثر خیالات کا اظہار کیا۔ انہوں نے کہا کہ کووڈ۔19کے دوران ماہرینِ نفسیات نے معاشرے کے لیے اہم کردار ادا کیا۔ انہوں نے کہا کہ مسلم سائیکالوجی ہمیں اپنے ملک سے محبت کا درس دیتی ہے۔ ان کا کہنا تھا کہ پاکستان وسائل اور بہترین مواقعوں سے بھرپور ملک ہے۔ انہوں نے کامیاب کانفرنس کے انعقاد پر منتظمین کی کاوشوں کو سراہا۔پروفیسر ڈاکٹر رافعہ رفیق نے کامیاب کانفرنس کیلئے تعاون کرنے والوں کا شکریہ ادا کیا۔ انہوں نے کہا کہ تقریب کا مرکزی موضوع ’آفات اور ایمرجنسی صورتحال میں ذہنی صحت: مسلم نقط نظر‘ تھا، جس نے ماہرینِ نفسیات، سکالرز اور طلبہ کو ثقافتی بنیادوں پر مبنی ذہنی صحت کی حکمتِ عملیوں پر بھرپور بحث و مباحثہ کے لیے پلیٹ فارم مہیا کیا۔ کانفرنس میں ڈاکٹر علی اکبر، ڈاکٹر امجد طفیل، ریاض فتیانہ، پروفیسر ڈاکٹر اسمعۃ اللہ، ڈاکٹر عثمان رشید، ڈاکٹر فاطمہ کمران، پروفیسر ڈاکٹر روحی اور ڈاکٹر عفیفہ نے بطور پینلسٹ اور کلیدی مقررین خدمات سرانجام دیں اور تقریب کی پیشہ ورانہ تنظیم میں اہم کردار ادا کیا۔