پنجاب ہائر ایجوکیشن کمیشن (PHEC) نے صوبے بھر کی سرکاری اور نجی جامعات کے وائس چانسلرز کے ساتھ “معیاری تعلیم” کے موضوع پر ایک آن لائن اجلاس کا انعقاد کیا۔یہ اجلاس اس لحاظ سے قابلِ فخر موقع تھا کہ ممتاز صنعتکار، معروف سماجی شخصیت اور پاکستان کے تعلیمی و کاروباری میدان کی معزز شخصیت سید بابر علی نے بطورِ مہمانِ خصوصی شرکت کی۔ سید بابر علی نے پاکستان کے صنعتی و تعلیمی ڈھانچے میں نمایاں خدمات انجام دی ہیں اور وہ اپنی انتھک کاوشوں، جدت پسندی اور ملک و قوم کی تعمیر کے جذبے سے کئی نسلوں کے لیے مشعلِ راہ ہیں۔
اجلاس میں پاکستان کے اعلیٰ تعلیم کے نظام کو درپیش چیلنجز اور مواقع پر تفصیلی گفتگو ہوئی۔ شرکاء نے یونیورسٹیوں کی ایکریڈیٹیشن (تسلیم شدہ معیار)، تعلیمی معیار میں بہتری، اور نصاب کی ترقی سے متعلق تجاویز اور سفارشات پیش کیں۔ اس موقع پر میرٹ پر داخلوں، اساتذہ کی پیشہ ورانہ تربیت، اور صنعت کے ساتھ قریبی روابط کے فروغ پر زور دیا گیا۔اجلاس میں گورننس، وسائل کی تقسیم، اور سرکاری جامعات کے لیے مالی خود مختاری کے ساتھ بنیادی تعلیمی اقدار کو برقرار رکھنے جیسے اہم نکات بھی زیرِ بحث آئے۔
وائس چانسلرز نے سید بابر علی کی قیادت میں ہونے والی اس سیشن میں بھرپور شرکت کی اور اس اقدام کو سراہا۔
صوبائی وزیر برائے ہائر ایجوکیشن رانا سکندر حیات نے بھی وائس چانسلرز کی خدمات کو سراہتے ہوئے کہا کہ ان کی کوششیں جامعات کے معیار، شفافیت اور تعلیمی ترقی کے فروغ میں نمایاں کردار ادا کر رہی ہیں۔اس موقع پر چیئرمین پنجاب ہائر ایجوکیشن کمیشن پروفیسر ڈاکٹر اقرار احمد خان (HI, SI) کے تعاون اور رہنمائی پر خصوصی شکریہ ادا کیا گیا۔ اجلاس میں محترمہ زاہدہ اظہر، ایڈیشنل سیکریٹری (یونیورسٹیز)، ہائر ایجوکیشن ڈیپارٹمنٹ نے بھی شرکت کی۔
