سرکاری جامعات خصوصی افراد کے لئے تربیت یافتہ افرادی قوت پیدا کر رہی ہیں، پروفیسرڈاکٹر محمد علی لاہور

لاہور(3دسمبر،بدھ):وائس چانسلر پروفیسر ڈاکٹر محمد علی نے کہا ہے کہ سرکاری جامعات خصوصی افراد کے لئے تربیت یافتہ افرادی قوت پیدا کررہی ہیں،سب کو سمجھنا ہے کہ خصوصی بچے ہمارے لئے باعث رحمت ہیں۔وہ پنجاب یونیورسٹی چائلڈ ویلفیئر سنٹر کے زیر اہتمام خصوصی افراد کے عالمی دن پرمنعقدہ تقریب سے خطاب کررہے تھے۔ اس موقع پرممبر پنجاب اسمبلی سیدہ سلمیٰ سعید ہاشمی، ڈائریکٹر انسٹیٹیوٹ آف سپیشل ایجوکیشن ڈاکٹر حمیرا بانو،انچارچ سی ڈبلیو سی ڈاکٹرعائشہ وجیہہ اللہ،سی ای او اللہ والے ٹرسٹ شاہد لون، فیکلٹی ممبران،خصوصی بچے اور ان کے والدین نے بھرپور شرکت کی۔تقریب میں خصوصی بچوں نے آپریشن بنیان مرصوص پر مبنی ملی نغمے اور صوفیانہ کلام پر شاندار پرفارمنس پیش کی۔ سرتال اکیڈیمی کے بچوں کوصوفیانہ کلام پر وائس چانسلر ڈاکٹر محمد علی نے انعام سے نوازا۔ خصوصی بچوں نے پاکستان کے تمام صوبوں کی نمائندگی کے لئے لباس زیب تن کئے اورپنجاب کی ثقافت کو بھی پرفارمنس کے ذریعے اجاگر کیا۔اپنے خطاب میں پروفیسر ڈاکٹر محمد علی نے کہا کہ خصوصی بچوں کی پرفارمنس دیکھ کر بہت خوشی ہوئی،کچھ سے تو دوستی بھی ہے۔انہوں نے کہا کہ ان بچوں کی اس طرح تربیت کرنی چاہیے کہ وہ ایک نارمل زندگی گزارسکیں۔ انہوں نے کہا کہ سرکاری جامعات نان کمرشل مضامین کی سرپرستی کر کے معاشرہ متوازن بنانے میں کردار ادا کر رہی ہیں۔ انہوں نے کہا کہ پنجاب یونیورسٹی خصوصی بچوں کا ویسے ہی خیال رکھتی ہے، جیسے والدین رکھتے ہیں۔ سلمی ہاشمی نے کہا کہ پنجاب یونیورسٹی نے خصوصی بچوں کی صلاحیتوں کو اجاگر کرنے کے لئے بہترین تقریب کا انعقاد کیا۔انہوں نے کہا کہ ہمیں خصوصی بچوں کا احساس ہے اور ان سے بے حد محبت بھی کرتے ہیں۔ انہوں نے کہا کہ خصوصی بچوں کی پرفارمنس بہت متاثرکن ہے اور ایسا محسوس ہوتا ہے کہ یہ بہت باصلاحیت ہیں۔ انہوں نے کہا کہ کمی خصوصی بچوں میں نہیں بلکہ ہم میں ہے۔ انہوں نے کہا کہ ان بچوں کو معاشرے میں قبولیت اور مواقع فراہم کریں گے تو یہ معاشرے کا اہم حصہ بن سکتے ہیں۔ڈاکٹر حمیرا بانو نے کہا کہ ہمیں خصوصی بچوں کی ضروریات کو سمجھنا ہوگا۔ انہوں نے کہا کہ معاشرے میں خصوصی افراد کی صلاحیتوں کو پروان چڑھانے کے لئے قوت ارادی کی ضرورت ہے۔انہوں نے کہا کہ والدین اور اساتذہ کی کوششیں خصوصی بچوں کو معاشرے کا فعال رکن بنا رہی ہے۔انہوں نے کہا کہ تعلیم اور بنیادی سہولتیں خصوصی بچوں کا بھی حق ہیں۔انہوں نے کہا کہ ہمارے اساتذہ بین الاقوامی معیار کے مطابق خصوصی بچوں کو ٹریننگ دے رہے ہیں۔ڈاکٹر عائشہ وجیہہ اللہ نے کہا کہ خصوصی بچوں کو معاون ماحول فراہم کرنا بہت ضروری ہے۔ انہوں نے کہا کہ خصوصی بچوں کو سہولیات دیں تو وہ معاشرتی ترقی میں نمایاں کردار ادا کر سکتے ہیں۔انہوں نے کہا کہ ہمیں خصوصی بچوں کی صلاحیتوں اور اعتماد کر سراہنا چاہیے۔