گورنر پنجاب محمد بلیغ الرحمن سے آج یہاں گورنر ہائوس لاہور میں متحدہ عرب امارات میں منعقد ہونے والی 25ویں ایشین یوتھ چیس چیمپین شپ میں شرکت کرنے والی چیس ٹیم آف پاکستان نے خصوصی ملاقات کی۔گورنر پنجاب نے تمام کھلاڑیوں کو چیمپئن شپ میں بہترین کارکردگی دکھانے کیلئے حوصلہ افزائی کی اور نیک خواہشات کا اظہار کیا ۔
اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ شطرنج جیسی مائنڈ سپورٹس دور حاضر کی اہم ترین ضرورت ہیں۔ ان گیمز سے بچوں کی ذہنی، جسمانی نشوونما ہوتی ہے۔انہوں نے کہا کہ شطرنج جیسی صحت مند ان ڈور کھیل سے بچے موبائل اور ٹی وی کی سکرین سے ہٹ کر صحت مند سرگرمی کی طرف مائل ہوتے ہیں۔ گورنر پنجاب نے کہا کہ شطرنج میں ہمارے پاس کافی ٹیلینٹ موجود ہے جس کی مثال بارہ سالہ آیت آصمی ہیں۔انہوں نے کہا کہ آیت آصمی نے رواں سال قازقستان میں منعقدہ ورلڈ چیس سکولز چیمپین شپ میں برونز میڈل جیت کر ملک کا نام روشن کیا اور ایک نئی تاریخ رقم کی ۔ گورنر پنجاب نے اس امید کا اظہار کیا کہ یہ بچے اپنی صلاحیتوں سے پاکستان کا نام شطرنج کی دنیا میں روشن کریں گے۔
اس موقع پر صدر، چیس فیڈریشن آف پاکستان حنیف قریشی نے گورنر پنجاب کا چیس ٹیم آف پاکستان سے ملنے اور انہیں دعائوں اور نیک تمنائوں سے رخصت کرنے پرشکریہ ادا کیا۔چیس کے تمام کھلاڑیوں نے ایونٹ میں بہترین کارکردگی دینے کے عزم کا اظہار کیا۔ملاقات کرنے والوں میں نیشنل چیس چیمپئن و فیڈے (انٹرنیشنل چیس فیڈریشن)ماسٹر نیشنل و انٹر نیشنل چیس ٹرینر عامر کریم، خالد جاوید، پنجاب مائنڈ سپورٹس اکیڈمی، سینئر وائس پریزیڈنٹ محمد سلیم اختر، جائنٹ سیکریٹری کاشف سلیم، ایگزیکٹیو ممبر سدرہ بٹ، اور ڈویلپمنٹ آفیسر محمد وقار، چیس فیڈیریشن آف پاکستان، چیس کے کھلاڑی مئشا فرقان چوھدری، آیت آصمی، حفصہ قمر، عیسی حسین لعل ، عمرو افتخار ، سحان احسن ولید احمد اجلال عامر موجود تھے ۔
