کنگ ایڈورڈ میڈیکل یونیورسٹی میں 45ویں سالانہ بین الاقوامی سائنسی کانفرنس KEMUCON 2025 کی شاندار اختتامی تقریب منعقد ہوئی۔ تقریب کے مہمانِ خصوصی صوبائی وزیر خزانہ میاں مجتبیٰ شجاع الرحمٰن تھے، جبکہ سابق صوبائی وزیر صحت پروفیسر ڈاکٹر جاوید اکرم نے مہمانِ اعزاز کی حیثیت سے شرکت کی۔ تقریب کی صدارت وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز نے کی۔
اختتامی کلمات میں وائس چانسلر پروفیسر ڈاکٹر محمود ایاز نے کہا کہ KEMUCON 2025 میں مختلف شعبہ جات اور پس منظر سے تعلق رکھنے والے مندوبین نے شرکت کی، تاہم وہ ایک مشترکہ وژن، علمی ہم آہنگی اور جدت و معیارِ امتیاز کے عزم کے ساتھ رخصت ہو رہے ہیں۔ انہوں نے زور دیا کہ کانفرنس کے دوران حاصل ہونے والی توانائی، علم اور بصیرت کو عملی اقدامات اور مثبت تبدیلی میں ڈھالنا ہوگا، کیونکہ اصل کام کانفرنس ہال سے باہر شروع ہوتا ہے۔
اپنے خطاب میں صوبائی وزیر خزانہ میاں مجتبیٰ شجاع الرحمٰن نے کہا کہ کنگ ایڈورڈ میڈیکل یونیورسٹی معیاری طبی تعلیم اور تحقیق میں نمایاں مقام رکھتی ہے۔ انہوں نے وزیر اعلیٰ پنجاب مریم نواز کی قیادت میں صحت کی سہولیات اور مریض دوست خدمات کے فروغ کے لیے کیے گئے اقدامات کا ذکر کیا اور KEMUCON 2025 کے کامیاب انعقاد پر جامعہ کی انتظامیہ کو مبارکباد دی۔
صدر KEMCAANA ڈاکٹر دانش بھٹی نے کہا کہ دنیا بھر میں موجود کنگ ایڈورڈ کے گریجویٹس اپنے ادارے سے مضبوط تعلق رکھتے ہیں اور تعلیمی، تحقیقی اور فلاحی سرگرمیوں میں فعال کردار ادا کر رہے ہیں۔ صدر KEMCA-یو کے ڈاکٹر آصف خان نے کہا کہ KEMUCON عالمی سطح پر علمی روابط کے فروغ کے لیے ایک مؤثر پلیٹ فارم ہے اور یقین دہانی کرائی کہ KEMCA-یو کے آئندہ بھی کنگ ایڈورڈ میڈیکل یونیورسٹی کی بھرپور معاونت جاری رکھے گا۔
