ڈیجیٹل پاکستان کو مضبوط بنانے اور ڈیجیٹل خلا کو کم کرنے کے لیے پاکستان ٹیلی کمیونیکیشن اتھارٹی (PTA) نے ایک اہم قدم اٹھایا ہے۔ پی ٹی اے نے PTCL، نیاٹیل، ٹرانس ورلڈ، سائبرنیٹ، اور وٹین کے اشتراک سے ایچ ای سی سے منظور شدہ منتخب جامعات میں مفت وائی فائی ہاٹ اسپاٹ پروگرام کا آغاز کیا ہے، جس میں خواتین کی تعلیمی اداروں پر خصوصی توجہ دی گئی ہے۔
اس چھ ماہ کی مہم کے تحت طلبہ کیمپس میں مفت انٹرنیٹ استعمال کر سکیں گے، جس کا مقصد تعلیم و تحقیق کے عمل کو فروغ دینا ہے۔ یہ پروگرام پی ٹی اے کے اس وژن کا حصہ ہے جس کا مقصد نوجوانوں کو ڈیجیٹل طور پر بااختیار بنانا اور ملک بھر میں جامع و مساوی کنیکٹیوٹی کو یقینی بنانا ہے۔
مفت وائی فائی کے ساتھ ساتھ، پی ٹی اے نے خواتین کے لیے اسمارٹ فون اسکیم کا بھی اعلان کیا ہے۔ اس اسکیم کے تحت پاکستان، آزاد کشمیر، اور گلگت بلتستان میں سم رکھنے والی خواتین کو تقریباً 200 مقامی طور پر تیار کردہ اسمارٹ فونز فراہم کیے جائیں گے۔ انتخاب کا عمل کمپیوٹرائزڈ قرعہ اندازی کے ذریعے ہوگا تاکہ شفافیت اور مساوات برقرار رہے۔
ٹیلی کام کے شعبے میں ایک تاریخی کامیابی کا اعلان کرتے ہوئے، پی ٹی اے نے بتایا کہ پاکستان میں موبائل صارفین کی تعداد 20 کروڑ سے تجاوز کر چکی ہے، براڈ بینڈ صارفین 12.5 کروڑ سے زائد ہو چکے ہیں، جب کہ فائبر ٹو دی ہوم (FTTH) صارفین کی تعداد 1.5 کروڑ تک پہنچ گئی ہے۔
اس سنگ میل کی خوشی میں، 20 جون 2025 کو تمام صارفین کو 2 جی بی مفت ڈیٹا اور 200 آن نیٹ منٹس دیے جا رہے ہیں۔ یہ آفر *2200# ڈائل کر کے حاصل کی جا سکتی ہے۔
مزید پڑھیں: ٹیکنو اسپارک گو 2 کی لانچنگ – کم قیمت میں اسمارٹ فیچرز
مساوی رسائی کے مشن کو آگے بڑھاتے ہوئے، پی ٹی اے نے وزارتِ آئی ٹی، پی ٹی سی ایل، اور یوفون کے اشتراک سے ایک ڈیجیٹل آؤٹ ریچ پروگرام بھی شروع کیا ہے، جس میں بلوچستان اور ضم شدہ قبائلی اضلاع کے طلبہ کے لیے نئے انٹرنیٹ لیبز کا قیام اور مفت لیپ ٹاپ کی تقسیم شامل ہے، تاکہ محروم علاقوں میں بھی ڈیجیٹل سہولیات پہنچائی جا سکیں۔
