پاکستان اور امریکہ کے درمیان اعلیٰ تعلیم میں تعاون بڑھانے پر اتفاق…….امریکی سفارت خانے کے ایک وفد نے ڈپٹی پبلک افیئرز آفیسر مسٹر ڈیوڈ موئیر کی قیادت میں چیئرمین ہائر ایجوکیشن کمیشن پروفیسر ڈاکٹر نیاز احمد اختر سے ملاقات کی

امریکی سفارت خانے کے ایک وفد نے ڈپٹی پبلک افیئرز آفیسر مسٹر ڈیوڈ موئیر کی قیادت میں چیئرمین ہائر ایجوکیشن کمیشن پروفیسر ڈاکٹر نیاز احمد اختر سے ملاقات کی۔ ملاقات کے دوران دونوں فریقین نے طلبہ اور اساتذہ کے تبادلہ پروگراموں، تحقیق و جدت کے منصوبوں اور ابھرتی ہوئی ٹیکنالوجیز میں دوطرفہ تعاون کو مزید مضبوط بنانے پر اتفاق کیا۔

ملاقات میں خاص طور پر مصنوعی ذہانت (AI)، بایوٹیکنالوجی، زرعی ٹیکنالوجی، انجینئرنگ بالخصوص مائننگ انجینئرنگ اور طب کے شعبوں میں تعاون بڑھانے کے امکانات پر تبادلہ خیال کیا گیا۔

چیئرمین ہائر ایجوکیشن کمیشن ڈاکٹر نیاز احمد اختر نے مستقبل میں تعاون کے لیے ترجیحی شعبوں پر روشنی ڈالتے ہوئے نصاب کی تیاری و بہتری، اساتذہ کی استعداد کار میں اضافہ، وائس چانسلرز اور یونیورسٹیوں کی اعلیٰ انتظامیہ کے لیے امریکہ کے ممتاز تعلیمی اداروں میں قیادت کی تربیت اور پاکستانی جامعات کی امریکی ایکریڈیٹنگ اداروں سے بین الاقوامی منظوری حاصل کرنے جیسے اقدامات کو اہم قرار دیا۔

امریکی سفارت خانے کے حکام نے ملاقات کے دوران ویزا کے اجرا سے متعلق مسائل کا بھی نوٹس لیا اور یقین دہانی کرائی کہ ان مسائل کے حل کے لیے اقدامات کیے جائیں گے تاکہ تعلیمی تعاون کو مزید مؤثر بنایا جا سکے۔