لاہور (نمائندہ خصوصی) — وزیرِ اعلیٰ پنجاب کی معاونِ خصوصی برائے خصوصی تعلیم سانیہ عاشق نے “مریم نواز اسکول اینڈ ریسرچ سینٹر فار آٹزم” کے منصوبہ جاتی مقام کا دورہ کیا، جہاں انہوں نے جاری کام کی پیش رفت کا جائزہ لیا اور اس بات کو یقینی بنایا کہ منصوبہ بین الاقوامی معیار اور وزیرِ اعلیٰ پنجاب کے وژن کے مطابق مکمل کیا جا رہا ہے۔اس موقع پر سانیہ عاشق نے کہا کہ یہ منصوبہ وزیرِ اعلیٰ پنجاب مریم نواز کے اس پختہ عزم کی عکاسی کرتا ہے جس کے تحت آٹزم کے شکار بچوں کے لیے ابتدائی مداخلت، تشخیص اور خصوصی معاونت پر مشتمل ایک جدید اور ہمہ جہت سہولت قائم کی جا رہی ہے۔ انہوں نے متعلقہ حکام کو ہدایت کی کہ تعمیراتی و تعلیمی پہلوؤں میں عالمی بہترین طریقۂ کار اپنایا جائے تاکہ بچوں اور والدین کو مؤثر اور معیاری خدمات فراہم کی جا سکیں۔
حکام نے بریفنگ میں بتایا کہ مرکز میں خصوصی تربیت یافتہ عملہ، جدید تحقیقی سہولیات اور شواہد پر مبنی تعلیمی و علاجی پروگرامز شامل ہوں گے، جو آٹزم کے بچوں کی جامع نشوونما میں مددگار ثابت ہوں گے۔
