اسلام آباد: ممتاز ماہرِ تعلیم اور علمی رہنما پروفیسر ڈاکٹر نیاز احمد اختر (ستارۂ امتیاز) نے آج باضابطہ طور پر ہائر ایجوکیشن کمیشن (HEC) کے چیئرمین کا عہدہ سنبھال لیا۔ ایچ ای سی سیکریٹریٹ آمد پر ان کا استقبال ایگزیکٹو ڈائریکٹر ایچ ای سی پروفیسر ڈاکٹر ضیاء الحق اور دیگر سینئر افسران نے کیا۔
نئے چیئرمین ایچ ای سی کا وژن اعلیٰ تعلیمی نظام میں معیار کی یقین دہانی کو مضبوط بنانا، عالمی شراکت داریوں کے ذریعے تحقیق کو فروغ دینا، صنعت سے ہم آہنگ تعلیمی پروگرام متعارف کرانا اور اساتذہ کی پیشہ ورانہ ترقی کو بہتر بنانا ہے، تاکہ پاکستان میں علم پر مبنی معیشت کے فروغ کے لیے اعلیٰ تعلیم کو جدید تقاضوں سے ہم آہنگ کیا جا سکے۔
پاکستان بھر کی اعلیٰ تعلیمی برادری نے حکومت کے اس فیصلے پر بھرپور اطمینان اور خوشی کا اظہار کیا ہے اور کہا ہے کہ ڈاکٹر نیاز احمد اختر کی تقرری ایک نہایت اہم مرحلے پر ہوئی ہے، جو اعلیٰ تعلیمی شعبے میں اصلاحات اور ترقی کے لیے سنگِ میل ثابت ہو سکتی ہے۔
