لاہور کالج وومن یونیورسٹی(ایل سی ڈبلیو یو) نے ایک نمایاں بین الاقوامی تحقیقی کامیابی کا اعلان کیا ہے جو ڈاکٹر صائمہ ایمن کی زیرِ نگرانی اور چیئرپرسن شعبہ اطلاقی نفسیات و ڈائریکٹر وِل، پروفیسر ڈاکٹر آمنہ معظم کی سرپرستی میں حاصل کی گئی۔ اس اہم کامیابی میں وائس چانسلر پروفیسر ڈاکٹر عظمیٰ قریشی کی بصیرت افروز قیادت شامل ہے، جنہوں نے تحقیقاتی ٹیم سے ملاقات کر کے طلبہ کو اس شاندار کارنامے پر سراہا۔
یہ گرانٹ سال 2025 کے لیے “ریسرچرز اِن دی گلوبل ساؤتھ گرانٹ” کے تحت Society for the Psychological Study of Social Issues (SPSSI)، جو کہ American Psychological Association (APA) کا ڈویژن 9 ہے، کی جانب سے عطا کی گئی۔ یہ نہایت مسابقتی بین الاقوامی گرانٹ گلوبل ساؤتھ میں اہم سماجی مسائل پر اثر انگیز تحقیق کو تسلیم کرتی ہے۔
شعبہ اطلاقی نفسیات کی ڈاکٹر صائمہ ایمن اس فنڈڈ منصوبے کی پرنسپل انویسٹی گیٹر (PI) ہوں گی۔ منصوبے کا عنوان ہے:
“خاموشی کو توڑنا: پاکستانی اسلامی سماجی و قانونی تناظر میں گود لیے گئے افراد/نگہداشت کا تجربہ رکھنے والے افراد کو درپیش چیلنجز”۔
اہم “میگا ایڈاپشن پراجیکٹ” ایم ایس کلینیکل سائیکالوجی کے پانچ تحقیقی مطالعات پر مشتمل ہے، جو گریجویٹ محققین کے لیے ایک مضبوط علمی تربیتی پلیٹ فارم فراہم کرے گا۔ اس منصوبے میںطوبیٰ اعجاز،تحریم ،عائشہ،مائرہ منور،زینب اعجاز اور ،انسا شفقتز شامل ہیں:
اشتراکی شراکت دار
یہ منصوبہ قومی اور بین الاقوامی سطح پر مضبوط اشتراک کی عکاسی کرتا ہے۔
بین الاقوامی شراکت دار:
ڈیوڈ ایس۔ پی۔ ہلشٹیڈ-ایسپلنڈ (Adoptionscentrum)
ایل سی ڈبلیو یو سے شراکت دار:
ڈاکٹر اسما سیمی ملک
چیئرپرسن، شعبہ عمرانیات
قومی شراکت دار:
مومنہ رضا
انٹرنیشنل اسکول، لاہور
یہ تحقیق دو بین الاقوامی اور ایک قومی کانفرنس میں پیش کی جا چکی ہے، جو اس کے ابتدائی علمی اثرات اور عالمی تعلیمی روابط کی عکاسی کرتی ہے۔
منصوبے کا مقصد اسلامی سماجی و قانونی اصولوں کے دائرے میں بالغ گود لیے گئے افراد کی دوہری شناخت (پیدائشی اور گود لینے والے خاندان) کو تسلیم کرنے کے لیے جامع پالیسی مکالمے کو فروغ دینا ہے، تاکہ آگاہی، سماجی شمولیت اور شواہد پر مبنی اصلاحات کو تقویت مل سکے۔
