سُپیریئر یونیورسٹی نے ترکی کی استنبول آیدن یونیورسٹی میں منعقدہ تیسری بین الاقوامی بحالی و معاون صحت سائنس کانفرنس (RASCON-2025) کامیابی سے مکمل کرلی ہے۔ یہ عالمی سطح پر صحت و تعلیم کے اشتراک کے فروغ کے لیے ایک نئی مثال بن گئی ہے۔اس بین الاقوامی کانفرنس میں پاکستان سمیت 10 ممالک کے وفود اور 70 سے زائد اداروں کے 125 سینئر محققین نے شرکت کی۔ اس اجلاس نے دنیا بھر کے ماہرینِ صحت کو ایک پلیٹ فارم پر جمع کر کے سائنسی تحقیق اور علاج معالجے کے شعبوں میں نئے رجحانات پر تبادلۂ خیال کا موقع فراہم کیا۔
افتتاحی تقریب میں دی سپیریئر گروپ کے ڈائریکٹر مسٹر حمزہ رحمان، پاکستان کے قونصل جنرل استنبول جناب خواجہ خرم نعیم، اور یوریشین یونیورسٹیز یونین (EURAS) و استنبول آیدن یونیورسٹی کے صدر ڈاکٹر مصطفی آیدن شریک ہوئے۔ اس موقع پر سُپیریئر یونیورسٹی کے فیکلٹی آف الائیڈ ہیلتھ سائنسز کے ڈین پروفیسر ڈاکٹر محمد نوید بابر نے بھی اظہارِ خیال کیا۔تقریب میں مختلف تحقیقی مقالے، کلینیکل ورکشاپس، اور خصوصی سیشنز شامل تھے جن میں صحتِ عامہ اور بحالی کے جدید طریقۂ علاج، چیلنجز اور اختراعات پر تفصیلی گفتگو کی گئی۔
