وزیراعظم محمد شہباز شریف نے کہا ہے کہ دانش یونیورسٹی ٹیکنالوجی اور جدید علوم کے فروغ پر توجہ مرکوز کرے گی،یونیورسٹی میں داخلے کے حوالے سے ملک کے دور دراز کے علاقوں، گلگت بلتستان اور آزاد جموں و کشمیر کے لائق اور مستحق طلباء کو موقع دیا جائے۔پیر کو وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے دانش یونیورسٹی کے بورڈ آف ٹرسٹیز کےاجلاس کی صدارت کرتے ہوئے کیا۔اجلاس میں وزیر وفاقی تعلیم و فنی تربیت ڈاکٹر خالد مقبول صدیقی ،وفاقی وزیر قانون و انصاف اعظم نذیر تارڑ ، وفاقی وزیر اقتصادی امور احد خان چیمہ اور دانش یونیورسٹی کے بورڈ آف ٹرسٹیز کے چیئرمین ، اراکین اور متعلقہ اعلیٰ سرکاری افسران نے شرکت کی۔
وزیراعظم نے بورڈ آف ٹرسٹیز کے چیئرمین اور اراکین کو اجلاس میں خوش آمدید کہا اور ان کے لئے نیک خواہشات کا اظہار کیا۔انہوں نے کہا کہ آپ کی کاوشیں علم کی روشنی پھیلانے میں اہم کردار ادا کریں گی ۔وزیراعظم نے دانش یونیورسٹی کی عمارت کو سادہ اور پر وقار طرز پر تعمیر کرنے کی ہدایت کی اور کہا کہ دانش یونیورسٹی میں اعلیٰ معیار کی ریسرچ کو یقینی بنایا جائے اور فیکلٹی ممبران کو تعینات کرنے کے لئے حکمت عملی بنائی جائے ،دانش یونیورسٹی کی تعمیر کے حوالے سے اچھی شہرت اور متعلقہ تجربہ رکھنے والے کنٹریکٹرز کو پری-کوالیفائی کیا جائے،دانش یونیورسٹی میں داخلے کے حوالے سے ملک بھر کے دور دراز کے علاقوں، گلگت بلتستان اور آزاد جموں و کشمیر کے لائق اور مستحق طلباء کو موقع دیا جائےاورسرکاری سکولوں میں دانش یونیورسٹی کے حوالے سے آگہی پھیلائی جائے۔اس موقع پر دانش یونیورسٹی کے جاری کام کے حوالے سے بریفنگ میں بتایا گیا کہ دانش یونیورسٹی پراجیکٹ مینجمنٹ یونٹ کا قیام عمل میں لایا جا چکا ہے،دانش یونیورسٹی کا چارٹر وزارت قانون و انصاف سے منظور ہو چکا ہے جسے منظوری کے لئے کابینہ اور پارلیمنٹ کو بھیجا جائے گا،دانش یونیورسٹی کے حوالے سے ملک بھر میں آؤٹ ریچ پروگرام شروع کیا جا رہا ہے،دانش یونیورسٹی میں ابتدائی طور پر عصری تقاضوں سے ہم آہنگ سینٹر آف ایکسیلینس قائم کیا جائے گا،ملک بھر کے مستحق طلباء کے لئے دانش یونیورسٹی میں داخلے کے حوالے سے ٹریننگ کیمپس شروع کئے جائیں گے،یونیورسٹی کے اکیڈمک وژن کے حوالے سے بین الاقوامی شہرت یافتہ ماہرین تعلیم سے رابطہ کیا گیا ہے۔
