وزیر اعظم محمد شہباز شریف نے کہا ہے حکومت آئی ٹی اور مصنوعی ذہانت کو فروغ دینے کے لئے ترجیحی بنیادوں پر کام کر رہی ہے،مصنوعی ذہانت کو ملکی معیشت کی ترقی کے لیے استعمال کرنا چاہتے ہیں،ڈیجیٹل معیشت کے نفاذ کو مصنوعی ذہانت کے ذریعے مزید موثر بنایا جائے گا۔ہفتہ کو وزیر اعظم آفس کے میڈیا ونگ سے جاری بیان کے مطابق وزیراعظم کی زیر صدارت مصنوعی ذہانت (اے آئی) کے فروغ کے حوالے سے اہم اجلاس منعقد ہوا۔اجلاس کے دوران گفتگو کرتے ہوئے وزیر اعظم نے کہا کہ حکومت آئی ٹی اور مصنوعی ذہانت کو فروغ دینے کے لئے ترجیحی بنیادوں پر کام کر رہی ہے،مصنوعی ذہانت کو ملکی معیشت کی ترقی کے لیے استعمال کرنا چاہتے ہیں،ڈیجیٹل معیشت کے نفاذ کو مصنوعی ذہانت کے ذریعے مزید موثر بنایا جائے گا،مصنوعی ذہانت کے حوالے سے قومی پالیسی کا نفاذ موثر طور پر کیا جائے گا۔ وزیر اعظم نے کہا کہ مصنوعی ذہانت کے استعمال کے حوالے سے ڈیٹا پروٹیکشن اور ڈیٹا ساورنٹی اور مصنوعی ذہانت کو مد نظر رکھا جائے اور مصنوعی ذہانت کے ذمہ دارانہ استعمال کو یقینی بنایا جائے۔
وزیراعظم نے مصنوعی ذہانت کے فروغ اور نفاذ کے حوالے سے سٹیئرنگ کمیٹی تشکیل دینے کی ہدایت کی۔اجلاس کو مصنوعی ذہانت کے حوالے سے حکومتی سطح پر اقدامات سے آگاہ کیا گیا۔وزیر اعظم کو بریفنگ میں بتایا گیا کہ اے آئی کے نفاذ کے حوالے سے ماہرین پر مبنی اے آئی ایڈوائزری پینل تشکیل دیا جا رہا ہے۔اجلاس میں وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی و ٹیلی کام شزا فاطمہ ،وزیر مملکت برائے خزانہ و ریلوے بلال اظہر کیانی ، وزیراعظم کے معاون خصوصی بلال بن ثاقب سمیت متعلقہ اعلیٰ سرکاری افسران اور ماہرین نے شرکت کی۔
