گورنمنٹ کالج یونیورسٹی لاہور کی سنڈیکیٹ کا 72واں اجلاس،وائس چانسلر پروفیسر ڈاکٹر محمد عمر چوہدری کی زیرِ صدارت منعقد ہوا، جس میں متعدد اہم تعلیمی و انتظامی فیصلوں کی منظوری دی گئی۔
اجلاس میں یونیورسٹی نے خصوصی افراد کے لیے ٹیوشن فیس مکمل طور پر ختم کرنے کی منظوری دی، جبکہ اسلامی تعاون تنظیم (OIC) کے رکن ممالک کے طلباء کے لیے نشستوں میں اضافہ اور اوورسیز طلباء کے لیے فیس میں کمی کا فیصلہ کیا گیا۔
سنڈیکیٹ نے نئے تعلیمی پروگرامز کی بھی منظوری دی، جن میں بی ایس کریمنالوجی، ایم فل پیس اینڈ کنفلکٹ اسٹڈیز، پی ایچ ڈی مالیکیولر بائیولوجی، اکاؤنٹنگ اینڈ فنانس، اورفارماکولوجی شامل ہیں۔
اجلاس میں ہیلتھ انشورنس پالیسی کی منظوری بھی دی گئی، جس سے یونیورسٹی کے ملازمین مستفید ہوں گے، جبکہ 2023 سے زیرِ التواٹی ٹی ایس انکریمنٹ کیسزبھی منظور کر لیے گئے۔سنڈیکیٹ نے مالی سال 2025-26 کے لیے3250 ملین روپے کے بجٹ کی منظوری دی۔ اس کے ساتھ ہی نان گزٹڈ ملازمین کے لیے لیٹ سٹنگ الاؤنس میں اضافہ اوروزیٹنگ فیکلٹی کی تنخواہوں میں بہتری کی بھی منظوری دی گئی۔
وائس چانسلر ڈاکٹر محمد عمر چوہدری نے بتایا کہ آئندہ بورڈ آف اسٹڈیز میں انڈسٹری سے بھی ماہرین کو شامل کیا جائے گا تاکہ نصاب کو عملی تقاضوں سے ہم آہنگ کیا جا سکے۔
اجلاس میں ممبر صوبائی اسمبلی سلمہٰ بٹ، سلطان باجوہ، ہائر ایجوکیشن کمیشن، پنجاب ہائر ایجوکیشن، لاء اور فنانس ڈیپارٹمنٹ کے نمائندے بھی شریک تھے۔ اس موقع پرڈین پروفیسر ڈاکٹر بابر عزیز اوررجسٹرار ڈاکٹر شوکت علی بھی موجود تھے۔
