امریکہ اور اسرائیل کی ایران کے خلاف جنگ نے ایک ایسے خطے میں اہم آبی ڈھانچے کی کمزوری کو نمایاں کر دیا ہے جو پہلے ہی دنیا کے سب سے زیادہ پانی کی قلت والے علاقوں میں شمار ہوتا ہے۔
محمد اے حسین کی الجزیرہ میں شائع ہونے والی رپورٹ کے مطابق
ایران کے وزیر خارجہ نے امریکہ پر الزام لگایا کہ اس نے آبنائے ہرمز میں ایران کے ساحل کے قریب جزیرہ قشم پر واقع ایک ڈیسالینیشن پلانٹ کو نشانہ بنایا، جس کے نتیجے میں تقریباً 30 دیہاتوں کو پانی کی فراہمی منقطع ہو گئی۔ اس واقعے کے صرف 24 گھنٹے بعد بحرین نے کہا کہ ایرانی ڈرون حملے سے محرق کے قریب ایک ڈیسالینیشن پلانٹ کو مادی نقصان پہنچا۔
خلیجی ممالک میں سمندری پانی کو میٹھا بنانے (ڈی سیلینیشن) کے ذریعے سال 2023 میں تقریباً 7.2 ارب مکعب میٹر (تقریباً 7.2 کھرب لیٹر) میٹھا پانی پیدا کیا گیا۔ دنیا کے کل ڈی سیلینیٹڈ پانی کا تقریباً 40 فیصد حصہ انہی ممالک سے حاصل ہوتا ہے۔ اس عمل میں سعودی عرب سرفہرست ہے جس نے تقریباً 3 ارب مکعب میٹر پانی تیار کیا، جبکہ متحدہ عرب امارات (1.9 ارب)، کویت (0.8 ارب)، قطر (0.7 ارب)، عمان (0.5 ارب) اور بحرین (0.3 ارب مکعب میٹر) پانی پیدا کرتے ہیں۔
خلیج میں مستقل دریا موجود نہیں
خلیجی ممالک بنیادی طور پر صحرائی خطے ہیں جہاں کوئی مستقل دریا نہیں پایا جاتا۔ اگرچہ بارش کے دوران کچھ موسمی ندی نالے (وادی) بہتے ہیں، لیکن وہ مستقل آبی ذریعہ نہیں بنتے۔اسی وجہ سے یہ ممالک اپنے تیزی سے بڑھتے ہوئے شہروں، صنعتی علاقوں اور زرعی زمینوں کو پانی فراہم کرنے کے لیے زیرزمین پانی اور ڈیسالینیشن پر انحصار کرتے ہیں۔خلیجی ممالک دنیا میں پانی کی شدید قلت کا شکار خطہ شمار ہوتے ہیں، جہاں مستقل دریا موجود نہیں۔ اس کمی کو پورا کرنے کے لیے یہ ممالک بڑے پیمانے پر سمندری پانی کو میٹھا بنانے (ڈیسالینیشن) کے پلانٹس پر انحصار کرتے ہیں۔ ایک رپورٹ کے مطابق خلیجی ریاستیں دنیا کے کل میٹھے کیے گئے پانی کا تقریباً 40 فیصد پیدا کرتی ہیں اور خطے میں 400 سے زائد ڈیسالینیشن پلانٹس کام کر رہے ہیں۔
خلیج کے چھ ممالک—بحرین، کویت، عمان، قطر، سعودی عرب اور متحدہ عرب امارات—کی مجموعی آبادی 62 ملین سے زیادہ ہے اور ان ممالک میں قدرتی میٹھے پانی کے وسائل نہایت محدود ہیں۔ اقوام متحدہ کے مطابق پانی کی شدید کمی کی حد فی کس 500 مکعب میٹر سالانہ ہے، جبکہ خلیجی ممالک میں قدرتی پانی کی دستیابی اوسطاً صرف 120 مکعب میٹر فی کس ہے۔
ڈیسالینیشن پر انحصار:
خلیجی ممالک میں پانی کی فراہمی کا بڑا حصہ اسی عمل سے حاصل ہوتا ہے۔ قطر اپنی مجموعی پانی کی ضروریات کا 61 فیصد جبکہ بحرین 59 فیصد ڈیسالینیشن سے حاصل کرتا ہے۔ کویت میں یہ شرح 47 فیصد، متحدہ عرب امارات میں 41 فیصد اور عمان میں 23 فیصد ہے۔ سعودی عرب اگرچہ سب سے زیادہ پانی پیدا کرتا ہے لیکن اس کی مجموعی ضروریات کا صرف 18 فیصد حصہ ڈیسالینیشن سے حاصل ہوتا ہے، جبکہ باقی زیادہ تر زیرزمین پانی سے آتا ہے۔
ڈیسالینیشن کا طریقہ کار:
سمندری پانی کو میٹھا بنانے کے دو بڑے طریقے استعمال ہوتے ہیں:
-
تھرمل ڈسٹلیشن – پانی کو گرم کر کے بھاپ بنائی جاتی ہے اور پھر اسے ٹھنڈا کر کے میٹھا پانی حاصل کیا جاتا ہے۔
-
ریورس اوسموسس – زیادہ دباؤ کے ذریعے سمندری پانی کو ایک خاص جھلی سے گزارا جاتا ہے جو نمک اور معدنیات کو روک لیتی ہے جبکہ صاف پانی آگے گزر جاتا ہے۔
جدید دور میں ریورس اوسموسس زیادہ مقبول ہے کیونکہ یہ کم خرچ اور کم توانائی استعمال کرتا ہے۔
اہمیت اور خدشات:
حالیہ علاقائی کشیدگی اور حملوں نے اس بات کو اجاگر کیا ہے کہ خلیجی ممالک میں پانی کی فراہمی بڑی حد تک ان پلانٹس پر منحصر ہے۔ ماہرین کے مطابق اگر ڈیسالینیشن پلانٹس متاثر ہوں تو خطے میں پینے کے پانی کی شدید قلت پیدا ہو سکتی ہے۔
