جامعہ سندھ میں نیشنل اکیڈمی آف ہائر ایجوکیشن (NAHE) کے زیرِ اہتمام اساتذہ کے لیے نیشنل آؤٹ ریچ پروگرام برائے فیکلٹی (NOPF) اور انتظامی افسران کے لیے نیشنل آؤٹ ریچ پروگرام برائے مینجمنٹ (NOPM) اختتام پذیر ہو گئے۔ اس سلسلے میں وائس چانسلر سیکرٹریٹ کے سینیٹ ہال میں مشترکہ اختتامی تقریب منعقد کی گئی۔
تقریب میں منیجنگ ڈائریکٹر نیشنل اکیڈمی آف ہائر ایجوکیشن، ہائر ایجوکیشن کمیشن ڈاکٹر نور آمنہ ملک نے بطور مہمانِ خصوصی شرکت کی۔ انہوں نے شرکاء سے خطاب کرتے ہوئے ادارہ جاتی قیادت، ٹیم ورک اور مسلسل خود ترقی کی اہمیت پر زور دیا۔ انہوں نے افسران پر زور دیا کہ وہ حاصل کردہ تربیت کو عملی شکل دیں، پیشہ ورانہ طرزِ عمل اور مؤثر ابلاغ کو برقرار رکھیں اور یونیورسٹی کے وسیع تر وژن کے مطابق کام کریں۔ ڈاکٹر نور آمنہ ملک نے بین الاقوامی تربیتی مواقع اور شعبہ جاتی سربراہان کے لیے ایک خصوصی پروگرام کے جلد آغاز کا اعلان ب
ھی کیا۔
وائس چانسلر پروفیسر ڈاکٹر فتح محمد مری نے ان پروگرامز کو ادارہ جاتی ترقی کے لیے انقلابی قرار دیتے ہوئے جدت، اشتراکِ عمل اور تاحیات تعلیم کو اداروں کی ترقی کے بنیادی محرکات قرار دیا۔ تربیتی کوآرڈینیٹر پروفیسر ڈاکٹر عرفانہ ملاح نے پروگرامز کے دائرہ کار اور نتائج پر روشنی ڈالی، جبکہ شرکاء نے تربیتی عمل کو فکری اور بااختیار بنانے والا تجربہ قرار دیا۔
