اسلامیہ یونیورسٹی بہاول پور کے زیرِ اہتمام فیض ادبی میلہ سیزن 4 اختتام پذیر

بہاول پور (پ ر) اسلامیہ یونیورسٹی بہاول پور کے زیرِ اہتمام فیض ادبی میلہ سیزن 4 اختتام پذیر ہو گیا۔اختتامی روز مصنوعی ذہانت اور سوشل میڈیا کے موضوع پر دانشور جامی چانڈیواور ڈاکٹر روبینہ شاہ جہاں ڈین فیکلٹی آف آرٹس پشاور یونیورسٹی پشاورکی زیر صدارت سیشن میں خلیل کنبھار، گل نو خیز اختر، ڈاکٹر نیر مصطفیٰ اور دیگر نے خطاب کیا۔ براڈ کاسٹر اور ماہر تعلیم ڈاکٹر نصراللہ خان ناصر مرحوم کی یاد میں تعزیتی ریفرنس منعقد ہوا جس میں ڈاکٹر روبینہ رفیق ڈاکٹر مقبول گیلانی ڈاکٹر زوار شاہ اور دیگر نے خطاب کیا۔ اختتامی سیشن ڈاکٹر روبینہ ترین سابق چیئرپرسن شعبہ اردو زکریا یونیورسٹی ملتان کی زیر صدارت منعقد ہوا۔ اس موقع پر ڈاکٹر تقی عابدی، جامی چانڈیو، ڈاکٹر عاصم ثقلین ،رانا محبوب اختر، شوکت اشفاق نے خطاب کیا۔ نظامت کے فرائض ڈاکٹر واصف اقبال نے سرانجام دیئے۔ فیض ادبی میلے کے روح رواں ڈین فیکلٹی آف آرٹس پروفیسر ڈاکٹر سید عامر سہیل نے کہا کہ اسلامیہ یونیورسٹی بہاول پور میں شعبہ اردو و اقبالیات کے زیر اہتمام چوتھا فیض ادبی میلہ جامعہ کی 100 سالہ تقریبات کا حصہ ہے ۔ انہوں نے اس میلے کے انعقاد پر وائس چانسلر پروفیسر ڈاکٹر محمد کامران کی سرپرستی فیکلٹی و یونیورسٹی انتظامیہ کے تعاون اور پاکستان بھر سے آئے مندوبین کی شرکت پر شکریہ ادا کیا۔ چوتھے فیض ادبی میلے میں کتاب میلہ اور ثقافتی رنگ پر مشتمل محفل بھی منعقد ہوئی۔